5874bf285b516_76064893358b3e48d95d3d

東涌人悲歌 你仲瞓緊覺我已經搭緊車

當大家都話住新界西屯門元朗好慘,其實東涌人都有段悲歌。細個為咗父母返工,由大埔搬咗嚟東涌,但係仲喺大埔讀小學中學。

每朝6點,住大埔的同學仲熟睡中嘅時候,住東涌的我就已經要起身;

到7點,住得近學校的同學仍然瞓緊覺,住喺大埔但返學校要坐車的同學啱啱起身,住東涌的我就已經上咗往大埔的巴士;

到7點半,住得近學校的同學啱啱起身,住喺大埔但返學校要坐車的同學準備出門搭車,住東涌的我仲喺巴士;

到8點15分,住得近學校的同學及住喺大埔但返學校要坐車的同學已經入到班房,住東涌的我因為巴士遇到塞車,一落車就要跑,喺打鐘前一刻先啱啱好踏入校門,仲喘緊氣。

到大個喺中環返工,份人工畀晒交通費咁濟,搭地鐵由東涌站去中環站,車程雖然只係半個鐘左右,但一日來回就要$44.8,一個月搭車最少千幾蚊。

如果渣車仲大穫,由東涌去港島一定要經西區海底隧道,單程隧道費要$65,來回隧道費就用咗$130,真係TT呀。

同朋友聚會,為咗方便大家,好多時會揀旺角,不過Sorry,住東涌去邊都要一個幾鐘車程。夜晚10點散場,住九龍的朋友用15分鐘返到屋企,住新界東及港島的朋友用30至45分鐘返到屋企,住東涌的我就最少要坐一個鐘車,成11點幾先返到。東涌人的一日係比其他人早開始同遲完結。

現在仲要愈來愈多人嚟行山,週末要出街,等車時間就愈來愈長。

最近內地霧霾殺到香港,住其他地區的香港人最多呢幾日少啲戶外活動,過幾日空氣污染情況就會好啲。咁東涌呢?由健康空氣行動公布的數據,東涌連續3年錄得最多污染日數,比屯門、元朗仲要多呀,點避呀?

冬天個陣仲要低市區幾度,日日著好多衫,返到公司又畀人笑「有無咁凍呀?」有,真係有!

仲有個東涌街市搞咩老香港風貌,我寧願要番富東逸東個啲宵夜車仔檔。

廣告

相關文章