診所職場事 寶豬趣聞 蟲蟲下集

職場

廣告

上回講到診所門外出現咗一條懷疑被棄嘅神秘芽菜。

疑似芽菜主人喺當日冇再打過電話嚟問關於蟲嘅嘢,佢選擇咗直接嚟診所。
佢一嚟到診所就行埋嚟登記處問:「姑娘?你收唔收到我嘅嘢呀?」

我:「你寄過啲咩過嚟呀?」
佢:「咩嘢寄呀~我噚晚親自擺喺門口㗎!」
我:「哦~打嚟留言嗰位~」

佢:「係呀,我等咗你成日你都冇覆我嘅,醫生有冇講啲咩呀?」
我:「啊~因為呢~我哋今日返嚟嗰時唔見門口有嘢啊,你放咗啲咩喺門口呀?」
佢:「我放咗喺門口喎」

佢行出門口望再入返嚟。

佢:「門口冇咗啦喎,你係咪攞咗唔出聲呀?」
係咪芽菜呀?係咪芽菜呀?係咪芽菜呀?我好想就咁問呀!
我:「冇呀,我哋今日一返嚟已經冇嘢喺門口,你拎咩裝住㗎?」

佢:「臨時臨急…冇嘢裝呀,我就咁擺咗佢喺度咋」

我:「唔好意思呀,唔好介意呀,我想問『佢』即係咩呀?」
佢:「蟲囉!」
係咪芽菜呀?係咪芽菜呀?係咪芽菜呀?我好想就咁問呀!

我:「條蟲你記唔記得係咩樣呀?」
佢:「蟲有樣㗎咩?」
啊,係喎,俾你發現咗我係低能添。

我:「係咪手指尾咁長?白白哋咁呀?」
佢:「係呀!你係咪攞咗呀?」
我:「我今朝呢…或者我轉咗方法問你呀~你呢幾日有冇食過芽菜呀?」

佢諗咗陣。

再諗咗陣:「譚仔係咪有芽菜?」
我:「係呀~」
佢:「咁有呀,做咩呀?」
我:「我今朝呢…就見到有條芽菜喺門口嘅,唔知係咪你所講嗰條蟲呢」

我已經聽到隔離藥房個同事喺度笑。
佢:「…..芽菜會成條出返嚟嘅咩?」
我:「你冇咀嚼過嘅話,係有機會嘅」
佢頭也不回離開診所。

我同事:「你正衰人嚟㗎!做咩話俾佢知係芽菜呀?你咪照當係蟲咁俾醫生睇囉!」
指芽為蟲呀?

如果錯過了上集,不妨馬上重溫。

診所職場事 寶豬趣聞 蟲蟲下集

一朝早又要聽留言。

你有三個新訊息。
早上3:12:「喂?診所呀?我而家有條蟲喺度呀,我阿媽話係蟲,佢唔上唔落呀,可唔可以而家過嚟呀我?」
邊個佢?你阿媽唔上唔落,定係條蟲唔上唔落?夜媽媽你哋兩個做咩玩蟲呀…

早上3:20:「喂?我哋喺門口呀,開門呀唔該,佢仲喺我度呀」
早上3:32:「我哋等咗十幾分鐘啦,你係咪唔開門呀?我阿媽拎咗佢出嚟啦,擺低佢喺門口㗎啦,你俾醫生睇吓我駛唔駛食杜蟲花塔呀?你晏啲有藥攞嘅打返俾我呀,我電話係9XXXXXXX。你記得覆我呀」

….門口….門口有啲咩呀?

我同同事講:「有人打嚟話放低咗啲嘢喺門口…」

同事:「咩嘢嚟㗎?」
我:「如果我冇理解錯嘅,有可能係屎…或者蟲」
同事:「我未食早餐呀,不如你去呀」
我:「我食緊早餐…」
同事:「唔好啦~我驚呀,你聽㗎嘛,你去呀」

我戰戰兢兢行出門口環望四周。冇膠袋冇樽仔,咩都冇喎,唔通清潔姐姐搞掂咗?
正當我準備推門返入診所,我見到…門下邊角位…




我踎低望,喂~應該真係芽菜嚟喎,仲係唔新鮮嘅。
我返入去同同事講:「出面得條芽菜咋」
同事笑到痴咗:「哈哈哈哈哈哈哈哈哈,你講笑咋嘛?」
我:「唔信嘅你出去睇吓啦」
同事行出去望完,已經再講唔到嘢,淨係識喺度『哈哈哈哈哈哈哈哈哈』

我:「咁駛唔駛打返俾佢呀?」
同事:「哈哈哈哈哈哈哈哈哈,打返俾佢同佢講放低嘅嘢變咗條芽菜呀?」
我:「一係等佢晏啲自己再打嚟啦~」

結果,佢冇再打過嚟。不過嚟咗睇醫生…再續。

寶豬的趣聞﹐還有精彩的的以下這三篇。

公主出巡

診所職場事 寶豬趣聞 蟲蟲下集

風和日麗的早上,幾位青春靚女各人都拖住一個喼嚟到診所。
行頭位嘅A小姐熟練咁放低身份證俾我:「登記呀」
A小姐立即擰轉頭同其他朋友講:「身份證呀,拎出嚟啦」
BCD立即拎出身份證擺低晒俾我。
登記後,我:「可以袋返好啲身份證㗎啦,咁醫生就未返嘅,你哋預15分鐘後返啦,你哋排第十六十七十八十九個啊~」
A望望鐘,同其他友人講:「冇問題呀,仲夠時間」

十分鐘後,一開門就登記咗嘅人陸續返到嚟診所。
A望望啲人,再望望我。
A行埋嚟登記處問我:「呢啲人係睇醫生㗎?」
我話路過參觀你信唔信?
我:「係呀,你哋排第十六嘛~」

A:「頭先冇咁多人㗎喎?你俾佢哋打尖呀?」
我:「唔係呀,佢哋登記咗就行咗出去咋,我有同你講排十六啊~」
A:「我都聽唔到!咁而家我哋點呀?」
我:「如果你哋要睇都要照排隊啊」
A:「等幾耐呀?我哋要搭飛機呀」
我:「你幾點機呀?」
A:「11點半呀」
我:「而家10點啦喎?最遲50分鐘前Check in,都要十點八去到呀?呢度入機場都要時間呀~」
其實你而家可以起行㗎啦。

A:「係呀,所以你醒目嘅就快手啲啦」
BCD行埋嚟問:「咩事呀?」
A :「冇事!個死蠢俾好多人打咗我哋尖,不過放心!我會拆得掂!你哋坐陣!」

我:「唔好意思呀小姐,我頭先已經同你哋講咗排第十六個,我絕對唔會俾人打尖~」
A :「我前面咁多人喺度,唔係打尖係咩呀?」
啊!企喺你前面嘅就個個都係打你尖,原來係咁理解嘅。
我:「佢哋個個都登記晒~你喺度嘈都冇用,如果你係想拎平安藥嘅,我可以幫你配咗先」
A:「我哋個個都要3日假紙呀!藥就唔需要囉!」
我:「假紙呢層就…你哋要等見醫生啦!」
A:「死蠢!你係咪聽唔明我哋有幾急呀?你浪費緊本公主嘅時間呀!」
公主呀?包機啦咁~
我:「真係唔好意思,我哋係絕對唔會俾人打尖,而且假紙唔係你話要幾多日就幾多日~」

B又行埋嚟問:「點呀?我哋要起程㗎啦,如果唔係趕唔到喎」
A同B講:「呢個死蠢弱智㗎!唔怕!我哋玩完返嚟再攞假紙!我實搞得掂!」

佢哋一行幾人又拖坐個喼離開診所,A仲醒咗個中指手勢俾我:「你繼續喺度打工啦!」
玩得開心啲啊~
返到嚟,你應該可以唔駛打工,真係令人羨慕啊~

亂收費

診所職場事 寶豬趣聞 蟲蟲下集

電話響起~
我:「你好,乜乜診所」
佢:「診所呀?你哋星期日開唔開㗎?」
我:「開啊,應診時間係10-7」
佢:「星期日都開,醫生好發錢寒㗎?」
你想我點答你?
我:「….」
佢:「你哋會唔會亂收費㗎?」
我:「唔會呀,就算要開特效藥要加錢都會講咗俾你知先。」
佢:「即係會亂收費啦」
吓?講明俾你知都叫亂收㗎?
我:「你可以選擇唔要嘅~我哋唔會迫你要特效藥」
佢:「我有得揀咩」
我:「可以唔要…」
佢:「咪係囉!咪即係迫我要囉!」
媽,我好亂呀。
我:「……」

佢:「你一個收費包晒唔得㗎咩?」

我:「如果包晒嘅話,個價就會高咗~咁有時有啲人未必需要特效藥嘛」
佢:「拉上補下囉,你咁亂收費,係人都知你發錢寒啦」
我:「好多謝小姐你嘅意見,我會話聲俾醫生知以作參考㗎啦」
佢:「你mark低我個名呀」
我:「咩事呢?」
佢:「我星期日會過嚟睇」
我:「我哋冇預約嘅,嚟到登記排隊就得㗎啦」
佢:「你真係好唔掂呀,呢樣又唔得嗰樣又唔得咁樣又唔得」
我:「….規矩嚟嘅」
佢:「By the way我要星期日過嚟睇,你平時收人幾多錢呢part我就唔理啦,你收我平啲就得㗎啦,我星期日過嚟,我唔係啲咩閒人,冇咁多時間同你講同你等,你明㗎啦,我叫乜乜乜,嗌我乜小姐is fine」

嘟。

fine…早抖啦你。

神奇女子

診所職場事 寶豬趣聞 蟲蟲下集

有日一位女士睇完醫生出完藥俾完錢。
佢企咗喺度,郁都唔郁。
我:「小姐?冇事嘛?」
佢冇回應,任何反應都冇,眼神望向遠方。
我:「小姐?小姐?係咪好唔舒服呀?不如你坐低抖抖,見好啲先走?」
佢仍然唔理我。
同事拍拍我膊頭,示意我入藥房。

入到去,我:「唔駛睇住佢呀?」
同事:「唔駛啦,由佢啦,佢次次都係咁」
我:「咁神奇?」
同事表示冇我嘅事,我就出返去。

小姐仍然好堅定咁企喺度。
我冇理就繼續做手上嘅文書嘢啦~
做呀做~突然好大聲嘅『呀!』
哇,頂你個制呀,嚇到我頭髮都豎起。

我:「小姐?咩事呀?」

佢終於有反應:「我張收據呢?」
我:「咪喺袋入面囉?假紙都係~」
佢望望我:「你知我諗乜咩?」
做咩突然跳制呀你~我講東,你講西嘅?
我:「er……………唔知」
佢:「你做咩同我講嘢?」

同事即刻捉住我膊頭拉我入藥房。
同事:「咪叫咗你唔好理佢囉」
我:「但係佢問我嘢喎」
同事:「佢唔係同你講嘢呀」
我:「吓………………..」
同事:「你唔好多事啦,唔好應佢呀」
我:「哦….」

我內心好想知好好奇好想知好好奇好想知好好奇…
又出返去,小姐望住我,我又望住佢,我好好奇好想知呀~
佢:「你係咪諗緊我?」

我冇出聲。
佢再講:「我天生係與別不同,我知你諗咩,你係咪諗緊我?」
我都係唔出聲。心入面諗緊『比~卡~蕉~~~』
佢:「你唔信呀?你試吓諗樣嘢」
我有諗我真係有諗。『比~卡~蕉~~~』
佢:「你諗緊我呢?」

死開啦,自戀狂。
我開口:「唔係,你估錯咗啦!」
佢:「呀!!」

同事又捉咗我走了。
對唔住啦,我以後唔搭嗲啦~對佢。

延伸閱讀:

【寶豬趣聞】消毒藥水

診所職場事 寶豬趣聞 蟲蟲下集