辭工

我有層樓值700萬 放租辭工去台灣夠食住生活 | 網民熱話

社會熱話

廣告

網民熱話】無錯,啲人講得好啱,家陣你人在香港,只要有層樓,就天下無敵。我有個朋友,佢絕對絕對絕對唔係咩上等人,只係一般普通市民,佢打嘅同我一樣係一份牛工,只不過,佢好早年買落層細價樓,由於銀碼細,好快就供甩咗。

撰文:不覊 |圖片:新傳媒資料庫、unsplash、photoAC、電視截圖

而樓價呢幾年有升無跌情況吓,佢層樓亦一路一路係咁升係咁升。我好記得當年佢買呢層樓,都唔過300萬,但直至今天,佢層樓已經市值 700 幾萬。

佢同我講,由於層樓位於市區,都算係幾值租,多就無,每月可以收到 18,000 蚊租咁啦。

前果排,呢個老友同我講,佢返工做得唔開心,主要係俾上司糟質,又覺得自己接近4張,無咩大發圍,轉行亦係唔可能的事。

加上最近佢啱啱甩咗拖,單身寡佬,老豆老母又老早返大陸買咗間屋養老,唔多洗佢負擔。

佢話人生行到呢一步,好想有個華麗轉身,左度右度,諗起近年好鬼鍾意過台灣玩。佢好鬼鍾意潛水,墾丁係佢幾經常去的地方,又識到啲當地人,就成日心思思想過去生活。

反正無家室無負擔,於是過去睇吓。發覺原來過台灣租間幾百呎屋都只係四、五千蚊港紙,如果唔嫌舊,再平啲都仲有。但無論環境、空間都比香港好得多。

至於食方面就更加唔洗講,台灣一向多美食,最緊要係平貴適隨尊便,晚上去夜市食個夠本,都係三十零蚊港紙。

朋友最愛去台灣食自助餐,真係吃到飽、飽到嘔,去漢來食自助晚餐,成層樓咁多嘢食,為起 200 港幣,真係抵到阿媽都唔認得。

佢計過,如果唔太花費,一條友洗費加租金,加埋間唔中去玩水嘞,都只不過係一萬蚊港紙,佢將香港層樓放租,收返萬八,嘩,都有成八千銀落袋,好過香港捱到死吓死吓啦。

終於,佢同我講,佢決定咗過去體驗一下生活,仲叫我得閒放假過去搵吓佢,佢帶我周圍去玩。

相比好多人,比你響香港溫份幾皮嘢人工又點,如果仲要供樓,又或者成世租樓,真正有排捱,講緊嘅,咪就係我囉。

辭工去台灣生活是不少香港人的想法,以下這個90後也是一例。

作為一個九十後,真係對香港好失望。尤其係呢個特首選舉完咗之後,更加唔敢想像之後五年民意仲有咩地位、會幾咁難捱……
加上喺香港,唔好話實現自己嘅創業夢,本身呢幾年搵工都已經夠難,要搵份似係人做嘅工仲難。

個個老細都唔係人嚟,工時本身都夠晒長但仲逼人開OT、香港啲顧客又零舍麻煩,但又得嗰雞碎咁多錢追極都追唔到通脹……

揸住張沙紙都唔知有咩用,讀過書都賺得唔夠洗碗多,好絕望,喺香港,真係睇唔到自己有咩正面嘅將來,真係好想好想好想走去台灣唔返嚟…

特別喺小圈子個結果出咗嚟之後,我更加積極搵吓啲移民資料。睇過歐美各國,個個都要百幾二百萬咁,心諗唔通真係走投無路?但又突然醒起我仲未睇吓近水樓台嘅台灣移民資料,睇完,當堂令我覺得呢個世界充滿希望!

去過台灣旅行兩次嘅經驗話我知,嗰度嘅生活節奏比香港舒服好多唔洗趕頭趕命,而最緊要嘅係,體驗過當地嘅醫療服務後,更加覺得台灣人真係溫柔又貼心好多。

嗰次入院睇急症,唔洗等十幾個鐘,而且醫生護士都好溫柔,直頭有種重返童年畀人照顧嘅感覺。

我覺得,病嘅時候係要需要有人呵護吓自己,但喺香港睇親醫生都黑口黑臉,燒到百幾度都當你呃佢醫生紙咁嘅臉口,入醫院又畀人呼呼喝喝咁。病人啫,犯法啊?

對於情竇待開嘅一眾港男嚟講,台灣真係一片福地。嗱我唔係話港女差,不過就真係比台妹比下去囉。台妹識打扮又識哄人,而且又特別鍾意我哋啲港男,作為港產小毒毒嘅我喺一班台妹眼中竟然可以一嚐做搶手貨嘅滋味,一直令我對呢個地方好迷戀……

同埋移民過台灣真係快靚正,移民申請快到三個月就搞得掂,唔似美帝咁玩你十幾廿年後嚟個特朗普,又無了期咁等落去唔知等到幾時。

我本身已經大學畢業咗成年,如果我去台灣讀埋個碩士,畢業後住夠五年,最近1年喺台灣平均月賺夠一萬港紙就可以定居。

其實呢個方法幾吸引,但係無啦啦走去讀個碩士我又唔係好想。不過總算畀我見到另一個方法係我比較有興趣嘅。

其實我一直都有個夢想係想開間cafe,如果想長期做生意,只要創業基金有最低50萬台幣就可以拎到台灣嘅創業家簽證,每年通過當局查核,做夠5年,每年住夠183日,就可以入籍,呢個方法真係好吸引!

一來個本唔係好多,但又可以畀我發吓創業夢喎!

而且我又好鍾意揸電單車,有啲台灣朋友同我講,台灣之所以周圍都係綿羊仔,就係因為油費夠晒平,揸足成個月都唔洗一舊水港紙!咁又可以完咗我個車主夢!

同埋喺台灣啲樓平香港幾倍,同一個價錢,喺香港屈間百幾呎劏房嘅時候,已經可以喺台北買到千幾呎單位,想像吓呢一個將來係幾咁美好?

做老闆、做業主、做車主、畀女圍、做自己想做嘅嘢、擁有自己想要嘅嘢、過啲輕鬆嘅生活……

依家開始努力儲筆錢,目標喺林太卸任前走佬!