細數香港大白象項目

社會熱話

廣告

噚日政府新聞網嘅林鄭大戰5D海豚再一次勇奪「傑出公關災難大獎」,教識市民先殺而後紀念嘅道理,更成功喚起大眾對大白象工程s嘅記憶。正所謂,念念不忘,必有回響。希望提多幾次,工程終有完嘅一日。反正都回水冇望。

港珠澳大橋香港段

由香港一班海豚非自願犧牲而成嘅港珠澳大橋香港段,2009年動工起一直被低調處理。直到2015年9月,港珠澳大橋香港口岸工程中的人工島被揭出現移位問題,期後路政署亦承認人工島移動了6至7米。

2011年向立法會申撥費用:559億元
2014年11月最新估算:698億元
超支金額:139億元
預計竣工:2017年底

為咗唔阻住大家返工,細心嘅路政署於2015年11月25日深夜發表聲明,指原定於2016年完工嘅港珠澳大橋面臨完工壓力,預計要到2017年年底才能完成。不過呢份低調嘅貼心就得唔到承建商嘅欣賞,仲向政府提出大量申索,誓要追返成本差價。有傳媒引述消息人士話,申索金額已經接近工程預留的16億元應急款項。

廣深港高速鐵路香港段

要數大白象工程點少得高鐵。2010年4月開始動工的高鐵,多來一直都係超支同延遲嘅代表。

2010年獲得立法會財務委員會通過撥款﹕650億
2011年向立法會申撥費用:650.2億元
2014年8月最新估算:715.2億元
2016年最新估算﹕844億元
預計竣工日期:2018年第三季
超支金額:約200億元

作為一個精明投資者,如果件貨值的話,有時買貴咗都算,但依家回報都低埋咁點計先。

政府早前公布廣深港高鐵香港段工程超支,導致經濟回報率下跌。再加上本地人口增長放緩及珠三角經濟增長減慢,高鐵最新估算中長期客量分別跌0.4%同6%。政府仲同時調低埋每年乘客節省嘅時間總數,由2009年嘅4,200萬小時,調低到3,900萬小時。買貴咗,回報又少咗,老老實實,有冇得斬倉先?

沙田沙中線

無錯呀,又係港鐵喇,心繫生活每一錢嘛。

2011年向立法會申撥費用:798億元
2014年最新估算:839億元
超支金額:41億元
預計竣工日期:「大圍至紅磡段」的目標通車是「盡可能」於2019年通車,而「紅磡至金鐘段」的目標通車日期是2020年12月 。

睇完上面嘅百幾億,你可能會諗41億算係咩。但如果話你知,工程開展至今,工地內不同工種均出現近兩成勞工短缺,就算推行專為沙中線而設嘅培訓計劃,都只係請到210人。要2019年通車?機會真係~~~~~~

蓮塘/香園圍口岸與相關工程

為咗更緊貼祖國,起多個口岸迎接內地同胞是常識吧。

2013年向立法會申撥費用:162億元
2014年10月最新估算:249億元
超支金額:87億元
預計竣工日期:2018年

根據政府解釋,做價貴咗全因為工資同重型機器租金上升,仲認衰仔話當初估算不準確。不過好可惜,喺一眾當時仲正正常常嘅議員追問下,政府都無法承諾日後不再追加撥款。嗯,你懂的。

西九文化區

要推動文化,首先你要有錢。

2008年獲注資﹕216億元
超支金額:未知,但肯肯定會超
預計竣工日期:首批設施預計2018年底落成

踩海豚踩得好開心嘅林鄭月娥就話表示,216億元是夠興建第一及第二期設施的,但由於08年到13年嘅建築成本已升逾181%嘅,估計唔夠興建文化區第三期設施。你明點解係肯肯定超支喇。

香港三跑

一向鍾意幫年青人起機嘅香港政府,今次決定幫自己起機。

2015年3月17日﹕獲行政會議通過
工程預計﹕1,415億元
超支金額﹕未知,但根據慣例是會超的
預計於2016年動工,最快於2023年竣工

機場第三條跑係香港開埠以來最昂貴基建工程。雖然機管局有晒計劃集資,又借貸發債、又喺未來10年暫停向政府發放股息,仲向旅客及航空公司徵費。聽落好似幾穩陣,但根據經驗,超支、延遲冇難度喇。

大嶼山-全民新空間

成立兩年嘅大嶼山發展諮詢委員會昨日公布首份工作報告,計劃將大嶼山規劃成14個康樂及旅遊地點。

工程預計﹕未知
超支金額﹕未知
預計完工日期﹕香港後花園RIP

報告計畫喺大東山增設觀星設施及露營場地、大嶼山南部嘅水口就話增設碼頭、滑翔傘等。唔好搞大嶼山後花園啦,依家大東山有呢啲設備都有咁多人上去,起咗仲得了既?雖然呢個計劃未有預算,亦都未有實質計劃,但聽落都知伏伏地,回頭是岸啦,政府。