最少延遲15分鐘 最後更新:
關閉
大戶殺牛熊 絕不留手

唔少炒家都會遇過以下情況:手上隻牛證或熊證已經非常接近回收價,喺呢一刻當然仍心存僥倖,希望個市出現轉機,令自己的貨免被收回。不過,十次有九次大家都唔會如願,在大部份情況下,恒生指數都會觸碰到收回價,令大家嘅牛證或熊證被殺。

而且最令人氣憤係,當恒指觸碰完收回價之後,好多時都會調頭走,去返一個原本唔洗死的位置。結果,死就係死嗰一下,可能只係一兩分鐘,甚至只係幾秒鐘。

5月10日星期二就出現了以上情況,恒指一開市就跌破20,000點,令所有收回價係20,000點的牛證全部被殺,但之後好快就升返上20,000點以上,而且尾市仲倒升,超越20,200點添。擁有該批牛證的炒家,都有一種被大戶故意殺死的感覺,內心好唔忿氣。

不過大家試想想,如果你是大戶,當恒指非常接近某個收回價時,佢點解要放過大家?佢點解唔用力推一推恒指去觸碰收回價?答案是很明顯的,大戶一定盡可能把握機會把大家殺死,以賺取最大利潤。

如何避免被大戶殺死?辦法就是為你手上的牛熊證設立止蝕位。建議止蝕位可以分階段,即是有幾個唔同的止蝕位,觸碰到其中一個就放一部份貨。

目標是牛熊證在觸碰回收價之前,就已經把資金逐步撤走,雖然整體是蝕了,但避免了全軍覆沒。

牛熊證,絕不能抱僥倖心理,如果你手上的牛熊證總是被回收,就證明你缺乏有效的止蝕策略,大戶唔殺你殺邊個?

在演藝界打滾,曾任導演、編劇、演員,在投資方面亦頗有心得,2006年開始買股票及基金,第一隻便買中滙豐控股(00005)每股勁賺10元,2008年開始涉獵期指和期權,2012年炒牛熊證,兩者合共累賺50萬元。
(此欄已暫停)