著住老西食廢氣 你估地產經紀有幾難撈?

社會熱話

廣告

啲人成日以為我哋做地產經紀,寫幾隻字填幾張表就有佣金,好似好筍咁,事實就係有苦自己知。

底薪奇低

先唔講佣金,講底薪,入行第一年未考經紀牌,底薪只有5千蚊;就算考到牌,底薪都係得7千蚊。今時今日,喺香港月薪無1萬蚊,又要搭車又要食飯,點生活呀?

再者,就算真係做到生意開到單,由開單嗰日起計,最快要半年先收到果筆佣,啫係頭個半年要捱麵包。所以,雖然地產經紀入行門檻低,但係面對如此低薪對待,好多人捱唔到一年就走。

日曬雨淋食廢氣

依家新盤密密推,淨係今個月已經至少有3個新盤。好似我做一手樓盤嘅經紀,真係「好天曬落雨淋」,日日返工就係企街、企地盤、企馬路撈客。夏天著呢套西裝,冬天又係著呢套西裝,唔係熱死就係凍死,仲要無假放!有時連透啖氣嘅時間都無呀!

仲有,最煩唔係無客,有好多客嚟排隊,所以客我哋有,但係地產商每次逐少逐少咁推盤,所以無盤先係最煩。咁多人入紙抽籤,個客抽多2次都唔中就唔繼續抽,一個一個客咁流走,同時又係咁畀老細捽數,媽呀好大壓力!

回佣做壞規矩

依家買一手樓,買家唔使畀佣,佣金由發展商畀,而呢一筆佣絕對唔係袋袋平安!點解?首先,呢筆佣金要同公司拆賬,佢7我3,已經得返雞碎咁多。然後,有經紀為求開單,提議畀回佣個客,啫係由發展商畀嘅佣金抽幾成畀個客。

回佣已經係分薄我哋嘅收入,更甚係當第二個經紀向佢提出畀6成回佣,轉個頭個客就會問我攞7成回佣,我肯畀佢先同我簽單,呢個行為簡直就同喺我銀包度搶錢無分別,我仲要笑笑口打開埋個銀包畀佢搶,個銀包就繼續薄過紙。

競爭大 打交爭客

話就話好多客嚟排隊睇樓,但每個客都係辛辛苦苦撈返嚟,但係總有啲代理唔守規矩,走去搶客,我都親眼見過人哋爭客爭到係條街打交。咁又難怪嘅,全港有近3萬8千個持牌經紀,競爭大,大到可能半年都開唔到一張單。係就係有啲人做地產經紀做到揸跑車住私樓,不過有更多係咬住底薪過活。