醫院「世界級」病人多 生得仔女你就要有責任

醫院「世界級」病人多 生得仔女你就要有責任

社會熱話

廣告

哈,唔知係咪開始適應呢度呢,時間過得特别快,「世界級」病人又開始多返:

半夜三更,一個中年男人(小朋友嘅爸爸)同一個阿婆(小朋友祖母)帶住個小朋友嚟睇發燒…

「姑娘,佢今晚發燒呀!」

「係呀?咁幾點發現架?有冇自己探過熱?有冇俾過退燒藥?」

跟住個男人將一個hello kitty 耳探機放響我枱面,但就咁睇個放入耳仔位置,我相信係塞唔入個細路個耳窿入面。咁探得有幾準可想而知!

「你自己睇睇!」個男人同我講。

我㩒咗一下,出華氏,咁於是我就講:
「其實我依家用公家探到你個仔39.9,發燒!」

「唔係呢,你可唔可以幫我睇吓個探熱針係咪壞?」個男人又講。

其實,護士,係唔識幫你睇吓你啲電器有冇壞!

「嗱我哋不如處理咗個細路先,佢發燒,要入去見醫生!」我就帶佢哋入去候診室。

無耐,呢兩個大人走過嚟問:
「姑娘,有無退熱貼俾佢用呀?咁退唔到熱!」

同時,我後面個同事話:
「喂,叫你哋同小朋友溫水擦浴,五分鐘就做完?」

於是我就拉返佢哋入去間房度訓示同埋教過點做溫水擦浴,講完,我叫佢哋抺多廿分鐘先好出嚟。

點知又轉個頭,個阿婆走嚟同我講佢搞唔到掂,要我去幫佢,於是我問:
「你個仔呢?」

「佢唔知行咗去邊!」阿婆答。

我開大咪請呢位男士返入嚟。未幾,佢真係行返入嚟,不過交叉腳咁,另外成身酒臭味。

其實你可唔可以處理咗個小朋友,返屋企先飲呢?咁等唔切咩你?

另外,都係呢樣,唔識揍,唔好生好唔好?

生得佢,你就要有責任。我知唔係天生識揍仔,亦唔係個個做護士。但係,咁可以問人、睇書囉!唔好旨意個老人家,佢都七老八十,仲周身病痛,幾十年無揍仔,抱住個豆丁又係咩都唔識。

講返發燒,大家都誤會打冷顫同埋手腳冰冷,係個小朋友覺得凍,所以起勢同佢著好多衫。其實,發燒你可以理解成係小朋友個控制體溫嘅機制失靈。打冷顫係產生熱力嘅本能反應,發高燒嘅表現;而手腳冰冷係人體機制,將血液集中流向身體中央,減少熱力流失。所以其實係假象。如果你探到佢嘅體溫,確定佢係發燒,我哋就可以針對根本做出相應嘅措施。

至於退熱方法,其實退熱貼只係可以舒緩徵狀,並唔能夠幫手退燒。退燒除咗食退燒藥之外,都可以用一啲物理嘅方法處理嘅:
1. 除去過多嘅衣物。
2. 如果無嘔吐,多飲水。令佢多小便將體熱除小便帶走。
3. 作溫水擦浴,其實只不過用一啲約正常溫溫度嘅水同小朋友擦身:頸背、背部等,尤其是縐褶嘅地方如:腋下、大腿內側。咁可以幫小朋友有效地降溫。

咁當然,如果發燒持續,有嘔吐及腹瀉,甚至有抽筋,咁當然就要盡快求醫!

文章授權:小咩的醫院生活日誌