新政策出爐  樓價升勢暫告一段落？

大部分專家，都係上岸人士，未必咁貼身，筆者想聽聽真係計劃買樓的朋友，不出所料，不少朋友都暫時擱置高價買樓的念頭。

朋友Ａ： 「唔買住啦，咁貴…同老婆商量過，諗住遲啲抽居屋。」

筆者： 「居屋唔一定抽到架喎。」

朋友Ａ： 「阿媽話交番間公屋出嚟，用綠表抽易好多。」

筆者： 「如果有綠表咁又唔同，嚟緊有好多綠置居單位添。」

朋友Ａ： 「好似之前新蒲崗個盤，呎價6千唔使，平好多！」

朋友Ｂ： 「咪係囉，有綠表唔好嘥嘛，就算冇都可以抽白居二。」

筆者： 「咁你呢？」

朋友Ｂ： 「我都唔買住啦，咁貴…冇乜水位，都係租住先。」

筆者： 「幫業主供樓喎，唔覺得唔抵咩？」

朋友Ｂ： 「我而家住嗰度，租1.5萬，賣700萬，得2.6厘咋！」
筆者： 「你覺得好唔抵？」

朋友Ｂ： 「P按計俾完4成首期，月供1.58萬，仲未計管理費！」

筆者： 「咁有8千幾係本金嘛！」

朋友Ｂ： 「4成首期加雜項300幾萬，投資其他嘢賺得仲多啦！」

朋友Ａ： 「嚟緊好多咩過渡性住屋，又咩共居，租金可能會平。」

筆者： 「咁始終都要有磚頭楂手嘅。」

朋友Ｂ： 「買一定會買，平番啲先。」

朋友Ａ： 「而家啲新盤咁好賣，係咪會平先？」

朋友Ｂ： 「靠高成數按揭之嘛，如果冇得借8成就唔會咁啦。」

筆者： 「贊成…睇定樓先啦，嚟緊應該會有價講。」

文:1% Anthony

首先，要了解今天樓價為甚麼貴…

原因很多，甚麼低息、錢多、供不應求…十萬個理由。

不過落場實戰，就會發現，最重要其實是心理因素！

罪魁禍首…是政府的辣招！

自從推出15%印花稅，業主都擔心賣咗買唔番，個個都唔肯賣樓，就算賣都要賣超高價，市場供應急劇下跌，買家被迫追價，令到現時二手市場成交極少，但大部分都是高價成交。

市場亢奮，無論甚麼政策，市場都會解讀為冇影響。

莫非你期望林鄭說，忽然發現幾百公傾土地？可建廿萬伙？

不切實際吧！…其實今次施政報告，挺有創意。

這些新思維，可以令到一些有置業需要的人士，停一停，諗一諗。

例如綠置居，很多朋友擔心會因此減少公屋單位，更難上樓，照計應該唔會，因為每賣出一間綠置居，應該收回一間公屋，或一張綠表，應該不會對公屋輪候冊有影響。

買家高追，很多時是源自恐慌，驚唔買更貴。

只要令他們的心安定下來，不急於高追，樓價有望降溫。

綠置居恒常化，讓公屋富戶多一個選擇，不須急於高追二手居屋。

至於白居二、首置盤，可以讓真正有自住需要的年青人，多一個選擇，不須急於高細價上車盤、納米樓。

另外租盤供應都有增加…例如提出發展閒置政府建築物、閒置土地組合屋、市建局待收購舊樓等，提供過渡性房屋，租盤多了，租金有望降溫，令現時租樓住，等待機會買樓，不須急於高追。

當然，買家不高追，不代表業主、發展商願減價。

那就要看未來供應的綠置居、首置盤等如何定價了。

如果跟市場價掛鈎，發展商又懂得製造市場氣氛，樓價就很被動，如果綠置居、首置盤等，定價可以跟市場價錢脫鈎，居回主動權，絕對是好事，試想想，如果某新盤呎價2萬，旁邊有個首置盤，呎價7千，即使你想買這個新盤，都會停一停、諗一諗：「嘩！貴咁多，好唔抵喎！不如搏一搏睇吓抽唔抽到先啦！」

概念雖好，往後就看林鄭如何落實了。

如果可以調整辣招，令業主放番啲盤出街，效果就更好。

想買樓自住的朋友，可以先睇睇樓，相信樓價升勢將放緩，甚至暫告一段落，有機會可以講吓價。想買樓投資的朋友，是時候想想，是否應該盲目看好高追，還是重訂投資策略，放眼其他機會了。