新盤高成數按揭 2大中伏位

筆者： 「好多人都係咁解讀，係咪真？」

朋友： 「真係好多人排隊喎！」

筆者： 「點解佢哋會嚟排隊先？」

朋友： 「搶樓？」

筆者： 「發展商叫晒入飛買家同一時間嚟登記再即場抽簽。」

朋友： 「係咩？上次陪朋友揀樓唔係咁架喎，分時段架喎。」

筆者： 「唔同發展商有唔同做法，你有冇去幫手做勢？」

朋友： 「唔係嘅，個個都話剛性需求好大！」

筆者： 「真係？有幾大？」

朋友： 「大部份都係首置。」

筆者： 「發展商都話大半係年青人，好多係阿爸阿媽陪去。」

朋友： 「即係點？」

筆者： 「你覺得18歲…有咩剛性需求呢？點剛呢？」

朋友： 「哦~~唔通只係父母用仔女名買樓？」

盲都見到！點解政府視若無睹？

政府連番出招，有咩用？被發展商完爆！

要冷卻樓市，其中一招必有效…不容發展商提供高成數按揭！

樓市亢奮，明顯是由新盤帶動，再帶起各區二手。

一手新盤開價絕對唔平，動輒比周邊的半新樓高出一、兩成，甚至三成，點解仍然可以取得壓倒性優勢？除了因為宣傳、策略，大家都明白，最主要是因為發展商見招拆招，政府收緊按揭，發展商就不斷借錢，甚至推出免壓力測試高成數按揭，唔好話代理，就算維園阿伯都知道，買樓越嚟越難，想買樓唯有買一手。

高成數按揭

去年市場淡靜，有發展商推出「呼吸Plan」起死回生，意思係只要你識呼吸，就借錢給你。自此之後高成數按揭成為發展商必殺技，試想想…

二手（$1,000萬）：只可借50%，首期要500萬；

一手（$1,200萬）：可以借85%，首期只需180萬！

就算新盤貴兩成，又如何？有得揀嗎？

不同樓盤有不同計劃

以一個$1,200萬的三房單位為例：

• 銀行Plan（正常借5成）
  30年、按息2.15%，月供約22,630元！
• 銀行Plan（如果放寬可借8成）

30年、按息2.15%，月供約36,208元！

• 發展商高息Plan

25年、按息6%（P+1），月供高達61,683元！

很貴嗎？不要緊！

發展商再出招，首三年只供息，約40,000元！

代理： 「同樣8成計，供多幾千蚊之嘛！

買家： 「咁又係喎，但係三年之後咪供得仲多？」

代理： 「到時樓價升咗幾百萬，賣咗佢賺錢好過啦。」

買家： 「如果我自住唔想賣呢？」

代理： 「仲簡單，到時搵間銀行做轉按咪得囉。」

中伏啦！…第一，係咪真係賣到？賺到幾百萬？

現時這口價，已經比周邊半新樓高出一截，週邊呎價賣1.5萬，你買呎價1.8萬了，為甚麼可以再賣高一截？呎價賣2.1萬？新樓？有優勢？別忘記！當年三年後你賣出來，已經是二手了，買家是不會有高成數按揭的！優勢何在？憑甚麼比人貴兩成？很多時候新樓入伙都需要一點時間消化這個溢價，再坐一會。

又中伏啦！…第二，係咪真係可以轉按？

別傻啦，如果你是因為首期不夠而借高成數按揭，三年後你轉按，銀行是不會跟發展商一樣，批8成按揭給你的，只能借5成！換句話說你要先捧3成首期到銀行，1200萬樓價計就是360萬！沒有？Sorry…只能繼續供貴息了！供得好辛苦？就算冇乜錢賺都想賣？祝你好運吧！因為應該唔止你一個遇到這個情況，會有其他高成數按揭買家想賣樓，萬一市況唔就，加上供應多，就可能要蝕讓了！