月入$13,000見家長 伯母叫我女朋友考慮清楚
喺香港地作為一個無家底嘅男士，對已經踏足社會嘅Lady嚟講已經冇咗一大截吸引力！不過唔緊要，筆者尚算俊俏，係死好命情況下識到現時呢位絕世好女友，佢唔拜金、唔會當街掌摑我十四巴，拍咗幾年拖，佢終於決定帶我返屋企見家長！
眾所周知，見家長即係送羊入虎口，由你踏入佢屋企門口果一刻開始，你就要接受連珠炮發嘅審問：
「你哋點識㗎？」
「做嘢果陣識㗎，Auntie！」
…
「你做邊行？」、「住邊啊？」、「屋企有無兄弟姊妹？」
跟住落嚟我大約答咗百幾條呢類問題。不過其實我唔介意答呢類窺探我背景嘅問題，最令我苦惱嘅係，答每一條問題都要思考點樣表達先至可以做到大方得體，喺伯母心目中留下一個完美嘅印象。
終於到食飯環節，我將多年嚟從未實踐過嘅table manners發揮得淋漓盡致，伯母都開始直入主題，殺我一個措手不及：
「咁Purple你依家月入幾多啊？」
我心諗，唉玩完啦今次！
「um…萬三依家，不過我都係出嚟做咗一年嘢。」
我豪無廉恥咁用啱啱出社會工作作為擋箭牌！
「係咁上下啦，以後會升職加人工㗎嘛你仲後生！」
估唔到伯母咁通情達理，感動到我眼淚在心裡流。
不過無幾耐我就同呢個女朋友分手，佢都坦言伯母叫佢考慮清楚係咪同我一齊，而佢亦都有所動搖！當一個女仔心入面諗「有得揀，點解唔揀個條件好啲嘅時候！」咁呢段愛情已經唔係由感情主導，變成係由背景、家底主導，我都係比心機搵多啲錢先追女仔啦，唉。
講完感情事，不如又如大家傾下職場！
呢期好多英雄片上映，令我諗起其實公司都存在一種「奇俠」，佢地異常勤力，但同時都係我工作上最驚遇到嘅人！
恐怖點一：好心做壞事
大家熟悉嘅「鐵甲奇俠」同「勤力奇俠」雖然都係「奇俠」，但前者個「奇」係指Iron Man可以做出神乎奇技，能人所不能之事，而後者個「奇」係指奇奇怪怪，成日為做而做。
勤力奇俠精於將所有事情複雜化，因為太快做完佢咪展現唔到「勤力」呢個特質！不過最恐佈係佢地真心以為自己嘅勤力係對件事有幫助，上司見到佢咁比心機做壞事又唔好意思打沉佢，同事又被逼接受佢地嘅「多舊魚」，食到滯曬都唔敢嬲佢地嬲出面，因為勤力奇俠只係𠴱人低能，但工作以外絕對係一個正常人！
恐怖點二：容易扭曲思維
同其他超級英雄一樣，「勤力奇俠」都有黑暗嘅一面！當「勤力奇俠」每日都由朝忙到晚，但眼見其他同事有講有笑，得閒仲可以上下Youtube碌下Facebook，心理好容易唔平衝。
「點解得我盡心盡力為公司好，佢哋就可以咁HEA咁唔認真！」
喺佢哋眼中，要長期黑住塊面對住個Mon，再瘋狂敲打個健盤先叫做嘢！當佢地認定咗你係冗員之時，你就準備時不時聽佢地有骨嘅說話啦！
恐怖點三：欠缺職場常識
「勤力奇俠」都有一個共通點，就係冇任何職場常識！好多時開會大家講嘅嘢都係為講而講，但講者無心，勤力奇俠就聽者有意！佢會將上司係會上亂嗡廿四嘅嘢付諸實行！
「老細話我哋食lunch雖然係12點至1點，但最好早3個字返到，收拾心情準備工作，不如食近少少啦！」
「！＆＠＃！＠＃＆！＠＃」
對住勤力奇俠你又唔可以話佢錯，又唔忍心鬧佢，因為已經夠晒可憐，其他同事都當佢係麻煩友、係傻仔！明明好簡單做1個鐘嘅工作，佢就會諗多好多、做多好多，最後仲要將件事複雜到達唔成目的，要其他人執手尾。
