職場高層心態 在座咁多位都無鬼用
廣告
文：Purple弟弟
筆者職場生涯當中有大部分時間都係做中下階層打工仔，做過好多唔同公司，見盡各種上司！而我發現佢哋大部份都有一種唔要得嘅心態，就喺當所有低職銜過佢嘅同事係工具、係垃圾！
而造就呢種局面嘅原因往往都係因為高層人員好多時係皇親國戚，又或者係空降請返嚟，完全唔了解大家工作內容。以筆者做過嘅廣告公司為例，主要有做sales嘅，寫手同designer，但當時嘅高層係完全唔了解大家做緊啲咩！
佢會鬧designer：「成個星期先做到一張poster？垃圾！」
事實做一張圖，要確保上面資料無誤，又要符合客人要求！仲要諗埋個客嘅品牌形象，用咩配色字形都係一門學問。
會鬧個writer：「打個百幾字要用成日？垃圾！」
但其實，呢百幾字可謂係精髓中嘅精髓，用有限字數完美帶出客人產品特點又要唔hardsell，仲要有返咁上下觸覺，適當加入時事熱話「抽水」，不失大雅又make到noise，又係一問學問。
會鬧個sales：「我哋公司以前咁多客，你一個都call唔到返嚟？垃圾！」
時代唔同，客戶落廣告方式都唔同！近年KOL盛行，靚女開個ig都成千上萬followers，人氣分分鐘拍得住啲明星，搶咗唔少客戶，而大公司好多都自己run自己嘅fan page，全部宣傳嘢都自己做返晒。
高層又有冇諗過？冇，因為佢哋諗到嘅只有自己！
高層往往仲停留喺我見到你有「勞力」先等於工作嘅諗法，從而忽略咗員工中間用「腦」嘅辛勞，一張圖、一篇文、一個客，背後都係同事絞盡腦汁嘅成果。
但可惜高層眼中只有數字，對佢嚟講所有嘢都係「1」，係一個最細最易達標嘅工作量，「一張圖」、「一篇文」、「一個客」，哇，成件事幾簡單，點解你哋班人要做咁耐甚至做唔到！然而佢哋仲會以為自己好有料，開會會比一啲知易行難又或者你啊媽係女人嘅建議你，情況就好似：
「你用電腦眼痛啊？咁用少啲咪得！」
Designer無言了。
「你諗唔到點寫咪睇下其他類似品牌嘅page囉！」
Writer其實一早睇完。
「你無客咪勤力啲cold call！」
Sales心諗即係勤力就一定有回報嘅。
