23歲月儲1萬至萬3 點樣分散投資好 | 理財入門 | 龔成信箱
撰文： 龔成 ｜圖片：新傳媒資料室
23歲月儲1萬至萬3 點樣分散投資好
問 1：
龔老師你好。小弟23歲 月儲1萬-萬3 而家手頭上 只得一手騰訊 380買入 打算長放係到唔會賣
而家約有4萬流動資金 遲d出完花紅 約有8萬流動資金. 請問應該怎樣分散投資呢？ 謝謝
龔成老師答：
騰訊（0700）可以一直持有，這股有潛力，但現價卻不平，最好的方法是持有，但現時入貨則不能大注。
至於流動資金方面，你收到花紅後，總數約$8萬，可將其中$40000投資平穩增值股，例如盈富（2800），雖然現價不平，但你股票數量不多，這是作平衡投資。
至於每月能儲$1萬，你可以考慮將其中的$6000做月供股票，供那類股，視乎你可承受的風險程度。盈富（2800）、領展（0823）、港鐵（0066）、中銀（2388）、長建（1038）、粵海（0270）、恆生（0011）等都可考慮。（對照龔成信箱Q4383）
呢4隻股票點睇
問 2：
成哥，我而家有
太古地產
興業太陽能
福壽園
同仁堂科技
以上各一手
仲月供緊恆生 比亞迪 金沙 我而家23 想28既時候有一百萬 有咩潛力股系可以推介？
我諗住換左恒生同太古 因為好似冇咩動靜 想請教下你意見 謝謝！
龔成老師答：
你不用太理會中短期的股價，股票是企業，短期股價未必能反映到企業這刻的價值，不用太心急。
你而家23歲，只要保持儲錢及投資優質股，要28歲有$100萬，相信是不難的，關鍵在於堅持。
你原有組合的股數不多，一直持有就可以了。至於月供部分，保持月供就可以，如果你想進取點，可以略加大比亞迪（1211）月供的金額。（對照龔成信箱Q4380）
技術分析一問
問 3：
點解你話技術分析無用？
你有無試過架？
龔成老師答：
大約十幾二十年前，我初接觸股市，是技術分析的追隨者，我本身數學不錯，會考欏A，十分中意圖表，花大量時間去研究，我睇左幾十本技術分析的書，去上堂學，去證券行學，用左幾年，用左勁多時間研究，最後，發覺一事無成。
最後完全放棄技術分析，因為發覺完全唔WORK，出面真正賺錢的人同經金經理，居然無人用技術分析！！
而用技術分析果D人，都係講到好賺錢，但自己D錢唔係靠技術分析賺翻來的人。
當時我都唔想放棄呢套方法，講真花左咁多時間去學，但我諗通左，學一樣錯的野，學得幾勁都係廢！！
後來我睇翻，D投資賺大錢的人，用咩方法投資，原來大部分都係基本分析，所以我就跟住學，不斷研究，一用就用左十幾年，同時完全放棄技術分析。
自從用左基本分析後，就賺多輸少，賺7位數亦是用基本分析。（對照龔成信箱Q4381）
優質潛力股
問 4：
小弟今日買左兩本書 優質潛力股同80後百萬富翁 而80後百萬富翁係一日裡面差唔多睇哂 內容亦都消化緊.
我個人覺得我同龔成老師都幾相似. 畢業後23歲開始打工儲錢 亦都用同一個方式去儲錢 收入-儲蓄=支出
因為小弟份糧係由 月薪(扣除MPF約萬一） 加 Tips. 所以每個月只會用Tips裡面的錢去比家用 交雜費等等. 底薪只儲不用.
有d朋友覺得我月儲1萬會好變態 但其實我比正常人小左d應酬 所以都幾鐘意呢個法則 最先給予將來的自己,最後才買奢侈品.
書中有提到 每年回報20%其實唔多 而我從呢幾個月開始 亦都開始留意投資 希望可以發掘到好既優質股.
以前初讀introduction of Finance 已經教什麼是 PV 同 FV 所以清楚了解現金只會一直眨值 懂得投資先可以為自己增值.
再加上而家讀完龔成老師既書 得到更多既睇法. 希望我可以成為下一個龔成老師 5年時間儲100萬. 做一個阿乘以複利息 一路壯大自己資產. 謝謝
龔成老師答：
其實，只要肯儲錢，有少少投資知識，要「5年時間儲100萬」，其實是好合理的，我當年都是合理地做到，我相信有好多人做得比我更好。我希望書能令你，更有決心去完成這事，因為能否儲到$100萬，其中一個關鍵是「決心」。
你要保持提升股票知識，因為股票是一個很大的學問，要以不斷學習的心進行。投資知識與你的財富，成正比，加油！（對照龔成信箱Q4382）
買樓自住好唔好
問 5：
龔老師。我有現金90萬，應該吾夠買樓自住，家有老婆、一對小學仔女、一個工人，請問宜家應該買其他投資產品，例如股票、基金、定期，定係買個新樓盤，係蚊型單位，放租幫補，等第時樓價再升，換大單位呢？
我未試過任何投資，宜家租緊樓，只買保險，請指教下，宜家樓升快到癲。謝謝。
龔成老師答：
你應該用3步去完成買樓自住這個目標。
第一，儲錢並投資，令你的財富增值。這刻的樓市不平，投資價值不算高，但由於香港樓供應不足，長遠仍是會上升的，但這刻投資，略有保留。所以你應該用其他工具，例如股票，將資金合理增值。
但要留意，不是叫你炒股，而是將資金，投資有質素，能平穩增長的股票中，同時加大儲蓄，令你的首期金額加大。由於你無投資經驗，你只能投資一半以下的資金，同時要低風險進行，同埋要在這段時間，努力學投資知識。
第二步，買入細單位收租，你在進行第一步的時，同時等樓市回落，不要預期回得多，只要有回落，同時你已儲了一定的資金，就可以買樓。
這要睇你當時的情況，能否買心目中物業，若不能，就只有買細單位收租先。
因為太多人以「人工追資產」，但正確的方法是「資產進資產」，之前的買優質股，以及這一步買細單位，目的都是幫你追大單位。
當你不斷儲錢，提升首期，你就較易進行第三步，即是將細單位換大單位過程。上述方法要時間的，但一定比你一下子追大單位，來得好。記住，你在這段時期，要保持學習投資知識，先可以把握到機會，同埋有效進行上述過程。（對照龔成信箱Q4384）
投資新手問投資
問 6：
成哥你好，一直都有留意你，我是投資新手，你是我一直以來的學習對象，謝謝你付出。
想問你些問題，現時恆指已破三萬點，大市已經很火爆，之前買了1177，你覺得之後應怎麼樣走比較好？有無上升潛力？
龔成老師答：
現時恆指不平宜，但未到貴。
中生製藥（1177）已經不平宜，只要你投資的注碼不大，其實無問題的。這股長期仍會向上，但在現時的市況，佢將會幾波動，所以最好分注入。
另外，投資是建立組合，不要只集中在一隻股票中。（對照龔成信箱Q4385）
投資倍升股
問 7：
老師老師，你有無d好初班的股票班？
龔成老師答：
我暫時無初班，因為【投資倍升股課程】，係一個好完整的課程，已經由最基本的股票概念講起，由淺入深。只要課後有溫習，之前上堂的學員，都能掌握內容的。（對照龔成信箱Q4386）
月供股票問題
問 8：
想請教有關月供股票問題
如果打算依架開始供, 公用股(2/3/66?) + 銀行股(5/11?) + 823可以嗎? 入面的股你又點睇?
定係其實公用股唔適合供, 因為無咩波幅?
龔成老師答：
波幅愈大的股票，長期月供，的確能產生將平均價拉低的效果。但面留意，我地建立投資組合，重點是當中股票的質素，波幅及平均買入價，不是影響我地持有這股的核心，所以我不會將這個視為分析點。
上述的股票，都可以進行月供，供那一隻，除了考慮質素外，另一因素是你的投資目標。你相偏向增值，還是收息？
領展（0823）、港鐵（0066）的增長會較好，其餘的會較為平穩，以及收息較為穩定。（對照龔成信箱Q4387）
中國平安點睇
問 9：
你好，想問2318現價高嗎？
龔成老師答：
中國平安（2318）是有質素的股票，但現價有少少貴，保險公司除左本身的保險業務外，同時會將浮存金作投資，當投資市場興旺時，佢的投資收入會增加，令佢業績向好。
不過，這方面的收入，穩定性不及自身的保險業務，所以會令盈利較為波動，最終令股價較為波動。所以，這股現價已有少少貴，可考慮先小注，到回落後才真正買入。（對照龔成信箱Q4388）
呢三隻股票點睇
問 10：
請問短線1093,175,2601邊隻比較好?
如有4萬5現金應如何投資?
本身有匯豐~港交所~騰訊
龔成老師答：
抱歉，我不懂，亦不建議人短線投資，因為我之前做銀行，見到輸得最多的一群人，就是短線投資者。因為短線是「輸就輸得多，贏就贏得少」的方法。
如你有$5萬，在現時市況，只可投資其中的一半，要預留一定的現金，等機會。石藥集團（1093）、吉利（0175）、中國太保（2601）都是有質素的股票，可以長線投資，不過現時的股價不平宜，最好先小注買入，回落才大注買。（對照龔成信箱Q4389
多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。
另外，由於提問人數眾多，見諒無法即日回覆，如果是普通的提問，預起碼要3天以上才能回覆，若然是較複雜的提問，起碼要7天才能回覆，希望各位能諒解。
編按：龔成是於公屋長大的80後青年，畢業後於銀行從事投資相關工作，雖然月薪僅萬多元，但因為理財及投資有道，只花五年時間，於28歲已累積到100萬元資產，目前淨流動資產有數百萬元。著有暢銷書《80後百萬富翁》、《80後2百萬富翁》及《財務自由行》，並出任創富課程導師。
