26歲仔儲錢不多 想$3,000月供股票點入手
問 1：月供股票
龔成 您好。小弟26 所儲到的錢也不多 最近開始想慢慢開始投資 想請教一下
我投資的資本 是5萬 我的目標只想平穩增長 並不是短炒 另外我想月供2-3000 的股票 請問我該怎樣開始 可以有什麼股票建議我開始入手嗎？十分感謝您的解答！
龔成老師答：
對，短炒股票無法幫你賺錢的。
如果你現時有$50000，但近期個市都不平，建議你不要用盡，只能用其中一半，投資穩健股及收息股，餘下的先持有現金，等個市回才動用。
至於每月供股票，這是長期累積財富的方法，如果你是新手，最好是投資盈富基金（2800），這是一個包括50隻質素不錯股票的組合，長期月供能平均風險，適合你的。（對照龔成信箱Q3978）
問 2：
本人持有 1177 285 1448 175 1478 230 呢幾隻應繼續持有嘛…謝謝
邊隻可繼續買入多一點
龔成老師答：
中生製藥（1177）、比亞迪電子（0285）、褔壽園（1448）、吉利（0175）、丘鈦科技（1478）都是有潛力的股票，都可以繼續持有。
由於不少現時估值都有少少高，如果要增持的話，可考慮中生制藥、比亞迪電子、福壽園，等回少少就可增持，但都要小注小注咁買。（對照龔成信箱Q3997）
問 3：
龔SIR你好 本人最近有一些工作前途的問題, 本人今年38age, 在保險公司做內部文職己有十幾年經驗, 人工升幅有限, 到現在都只是20k左右
知道再做文職工作也不會有好高人工, 加上自己在國內也有投資物業, 每月也有供款, 因此想找一些工作有較高人工, 而朋友一直都覺得我做sales好適合我
在10年前我想做保險agent, 但踫上金融海嘯, 沒有信心因此無轉行. 現在想做保險agent, 比自己一個新出路, 原因如下: 請你比d意見我
原因:
1. 自己性格幾適合做
2. 自己都喜?做關於保險, 投資, financial planning既工作
3. sales工作如果做得好, 可以賺更多錢 (但又怕meet唔到target, 收入不定, 怕無法做國內投資)
如果你是我, 你會如何選擇, 轉行做sales比個機會自己, 還是做回back office文職定薪工作呢?
龔成老師答：
如果是我，我一定試做agent。
你本身有理財的底，加上你認為自己性格適合，其實好值得一試，就算不是保險，也可以試做其他的sales，例如股票、地產，因為你有知識，你一定吹到好多野出來，你就自然有生意。
其實你想想，如果失敗了有咩損失？其實無乜損失，大不了就再重新找過工作，但若然成功了，就另一個世界。所以，我鼓勵你試。
至於供樓果度，如果你擔心，可以預先儲定多d錢，令自己個心完d，咁就無問題。同埋，人係絕路的時候，反而會用盡方法逼自己賺錢，反而賺到更多錢。（對照龔成信箱Q3998）
問 4：
創業前一問
Halo 襲成, 睇左你80後百萬富翁本書有所啟發, 明白到單靠打工好難發達, 所以打算創業。但幾年前創業失敗, 主要宣傳不足, 租金壓力, 及對該行業了解不足。所以今次打算一步一步來。
我本身做秘書, 今次打算開ig花店, 剛報讀了花藝師課程, 12月至2月上課, 一星期上一次, 都剛quit左文職, 搵緊花店工作, 打算落手落腳手, 向人偷師, 睇下人地點經營
但有朋友則提議我繼續留在投資公司做秘書, 可以儲多點錢開店, 臨開店前先做花店都未遲, 因為無資金就講咩都無用
想問一下襲成你點睇。謝謝
龔成老師答：
香港租金成本貴，所以創業盡量都要找避開貴租的方法。例如先開網上商店，之後再租格仔鋪、樓上鋪，有一定的客源後，才建立地鋪（當然，這不是必然）。
以一邊打工一邊創業的方法，是較穩陣的，所以你無論做邊份工，一邊打工儲錢、供生活費，一邊建立網上的花店，是最好的方法。
至於做花店還是秘書，除非秘書的人工好高，否則，做花店是較好的，因為每個行業都有佢的獨特性，你一定要學習相關知識，要落手落腳做先會知。例如當中的成本、供應商、售價、推廣策略、存貨技巧、擴大客源方法，所以我較建議你做花店。一邊做花工打工，一邊搞自己網上花店。（對照龔成信箱Q3999）
問 5：
你好龔成老師。睇左你本80後百萬富翁 真係令我對搵錢?概念唔同晒 明白到唯有投資先可以致富。
我短期有個目標 4年半儲夠一百萬
我而家儲左25萬 每月大約有8000可以用黎投資 想問下老師我應該點分配我投資項目?
我打算買合和公路 煤氣 匯豐 同埋置富作收息之用 但係剩係收息我計過好似又到唔到一百萬的目標。
希望老師你能比少少意見我 謝謝你
龔成老師答：
我假設你有5年時間，每月$8000，一年約$10萬，5年有$50萬，加上原有的$25萬即$75萬。要在5年內將$75萬增值至$100萬，總回報率為33%先做到。
不過由於有些錢不是全部這刻就有，所以每年的平均回報，最好增取到10%，那就穩陣。
這個回報率，你最好用平穩增加股，再加上收息股去分配，就不難做到。
你上述提到的股票都可以，但最好加上盈富（2800）、金沙（1928）等這類穩健股，才令你的組合有更好的增值。
另外，由於現時市況不平，你不要盡用$25萬去投資股票，只能動用一部分，餘下持有現金等機會。反而每月可儲$8000，其實已經可以開始做月供股，買入價平均，就算現市況不平都無問題。但不要用盡$8000，可考慮$5000-$6000。（對照龔成信箱Q4001）
問 6：
龔老師，我想問點樣睇一間公司值唔值個股價，即係先唔講佢既潛在價值，例如有無得計佢既現金或者市值等等從而推算股價合唔合理？
龔成老師答：
估值是一個十分重要的事，但亦是不易解釋的課題，因為在我的課堂中都要講接近2堂才講得完。
簡單來說，一間企業的價值主要分資產價值及業務價值，這是不同角度去分析一間企業，大多數情況，後者都會較為重要。
當計算業務價值時，往往會考慮佢的生意盈利情況，並以市盈率作基礎去進行估值。在整個計算過租中，不考慮當刻的股價及市值，估值完成後，才會比較現價，得出現時是平是貴。（對照龔成信箱Q4002）
問 7：
龔sir ,之前對投資一直都有戒心，直至睇到你寫既文先發現投資風險可以降到好低，係到多謝你先！
最近留意到隻建溢隻團(638),發覺佢之前雖然蝕錢，但都一直派息，近黎開始賺錢，派息都開始有增長，但係交投量十分低，請問會唔會容易大上大落？佢又算唔算一隻優質股？可否考慮長線投資？麻煩曬！
龔成老師答：
建溢集團（0638）唔係話佢差，但如果你是初階者，相信其他類型的股票會較適合你。
佢主要從事設計、製造及銷售電器與電子產品（即機械人、電器、電子玩具及相關產品）、摩打及編碼器菲林，以及房地產發展。
雖然生意有平穩增長，但如你所見，佢之前蝕錢，睇翻佢的業績，5年裡面有2年虧損，雖然近1年有錢賺，但我地從企業本質的角度，無辦法得出「這企業的盈利有保障」，這個結論。
所以，雖然這刻經營環境令佢有盈利，但無人知過2年的經營環境，會否又令佢轉差，所以要小心分析。你見佢的股價波動都幾大，因此未必合初階者。現時佢市盈率不高，如果之後的盈利能保持，股價可以不錯，所以，不能說這公司好差，但不是優質股，如果你真的好喜歡，又或對這企業已有充份的認識，可小注。（對照龔成信箱Q4003）
問 8：
老師你好，如何睇現今的樓價？
打算3年後買樓，但樓價越來越癲，怕3年後儲蓄追不上樓價，係呢個情況下問家人借錢買左樓先，還是等多3年照自己的計劃好？
龔成老師答：
現時的樓價，已超過當中的價值，所以投資價值已不高。
不過，2017年特首的施政報告，完全睇唔到解決到問題，所以暫時睇，樓市仍會向上。
香港最大的問題是供應嚴重不足，人口不斷增加，但好似近幾十年的大型新市鎮，已經見唔到，好似海怡半島、黃埔花園這類大型屋苑，近年都見唔到，亦睇唔好之後有。咁樣前提下，見唔有供應有解決。
供應是最核心的問題，2017年特首的施政報告，只是將原來的供應搬來搬去，例如增加綠置居等，呢d唔係核心，真正的土地供應先係，近10年，完全見唔到政府解決到「核心」。
樓價已貴，但相信會再貴，下年美國加息，利率會去到正常少少的水平，要睇住個市，如果有回落，就是機會。（對照龔成信箱Q4004）
問 9：
你好，我是新手，請問現在購入一手盈富基金是好時機嗎？
龔成老師答：
恆指去到30000點，已過了買入時機。
不過，如果你本身無貨，點都要入少少，因為大市未到狂熱期，你不能以100%現金的狀態進入的，這會令你損失了機會成本。
盈富（2800）是適合新手的，如果一手不是你資金的全部，入一手無問題的。（對照龔成信箱Q4005）
問 10：
龔sir, 想問問你意見，之前1997上市，資產質素極高，有時代廣場、海港城、荷李活商場，市值二千多億，現價約50元，市值大概千多億，價格比資產有折讓，而且資產有質素，值得現在投入嗎？
龔成老師答：
佢持有的物業優質的，商場都是處於好有利的位置，長遠的發展不錯，同時估值好高，質素不用懷疑，長遠的加租能力不弱，所以長遠發展不差的。
但要留意，九龍倉置業（1997）本身有幾百億負債，加上估值$2000億，只是市場及佢自己找的估算價值，到股票市場後，好多時都會有一定的折讓的，所以真正的計法有點複雜。
同埋，這股新上市，而新股我一向有保留，因為會以較高估值去上市，所以，最好耐心小小等這股回，之後才入，策略會較好。（對照龔成信箱Q4006）
多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。
另外，由於提問人數眾多，見諒無法即日回覆，如果是普通的提問，預起碼要3天以上才能回覆，若然是較複雜的提問，起碼要7天才能回覆，希望各位能諒解。
編按：龔成是於公屋長大的80後青年，畢業後於銀行從事投資相關工作，雖然月薪僅萬多元，但因為理財及投資有道，只花五年時間，於28歲已累積到100萬元資產，目前淨流動資產有數百萬元。著有暢銷書《80後百萬富翁》、《80後2百萬富翁》及《財務自由行》，並出任創富課程導師。
facebook專頁：https://www.facebook.com/80shing
