職場生涯

30歲一年轉一次工 職場生涯可以點

投資

廣告

30歲一年轉一次工 職場生涯可以點

問 1:

龔成兄,小弟3張野,工作仲係一事無成,話就話叫做左5年工程,但每份工都做唔長,1年轉1份,hea返工,困難個d就射比人,遇到困難就逃避,拖,做衰左就轉工,不停loop。

今年又比我扼左份工,做醫院的,不過我d知識知識有限,同個新人冇乜分別,又唔夠醒目,唔識搞人際關係同溝通技巧,成日比d判頭耍,本身笨,吸引力低,但又怕比人講,所以問多幾句就扮明,有時做野又要返手跟,無自信,請問有乜方法可以催眠自己比心機做野,我唔想唔夠1年又要轉工。

龔成老師答:

你要改一個習慣:「逃避問題」。

問題是令我地成長的路,你要明白,問題一定有,大家都是由乜都唔識開始,有問題,有野唔明,其實好正常,唔識唔好怕問人,果一下可能要克服心理,但其實呢樣野好正常,每個人都有。

如果你真係打算在這行長做,一定要停止「逃避問題」,有問題就要解決,否則你一世都唔識。

另外,你可能要學下同同事地溝通,試下溶入佢地的興趣,由興趣打關係最易入手。同手溝通的技巧,就係講佢有興趣的、關心的。到你同佢fd左後,要問野都易好多。

記住,無人一開始就識,我地都係不斷學先有進步,呢個過程好正常,唔洗怕。(對照龔成信箱Q4088)

點睇周大福

問 2:

你好 龔生 周大福在 在8.23入 應該算是高位 請問現在應該放還是持有?

龔成老師答:

周大福(1929)有一定的質素,無論是規模及品牌,都是行業裡的龍頭,優質的。而愈優質的股票,我地就愈應該繼續持有。

現時股價不算貴,這刻繼續持有無問題的,到真正股價過高時才考慮賣出都未遲。(對照龔成信箱Q4085)

東駿控股買唔買得過

問 3:

想問08383買唔買得個?

龔成老師答:

東駿控股(8383)過往的盈利不足$1000萬,上年度更出現虧損。就算假設一間企業,每年有$1000盈利,以佢從事從事包裝印刷業務計,業務沒有太大的獨特性,盈利難以大增,市盈率不會太高。就算比20倍市盈率佢(已經比多),佢的市值應該只值$2億。

但這股現時的市值卻高達$10億,已經與企業價值脫離,除非有其他非常利好的因素,否則這股不要買。(對照龔成信箱Q4086)

會德豐點睇

問4:

龔成先生!小弟最近研究左會德豐(20)一排,由佢公佈004分折業務後60幾跌番50幾後好像冇乜起色,但小弟從pe 或公司項目睇都好正面,點解依排股價同其價值咁大落差?多謝指教

龔成老師答:

會德豐(0020)有質素的,但不易分析,因為持有好多類業務,所以分析要花點時間。

另外,由於佢有地產業務,而地產部分每年都會重估的,物業價格上升的部分,都會在損益表中入賬,成為盈利的一部分,但這部分的盈利其實不是來自經營。

因此,這類股的市盈率好似好低,但要扣除這部分,調高翻,才是較實在的市盈率。

另外,不要太著重短期股價,集中長期企業價值就得。九龍倉置業(1997)上市後,股價有所回落,這難免對會德豐的短期股價有影響,始終會德豐持有6成九龍倉置業。(對照龔成信箱Q4087)

呢啲股票點睇

問 5:

龔成老師:我本身持有800股1928@37·25,20000股[email protected],及4000股[email protected],之前178跌至2.8,帳面上蝕損較大,之後178升回3.1及868升至9蚊。

由於868之前估計價值至少12倍pe(雖然15倍長期理應可達),加上多天創新高,我便於9蚊放了868,以此盈利預備抵銷將來178再調整時於帳面上沒有損失(178已持有多時,看好此股長期,但明白需耐心持有),再轉至另一隻值博率較高,估值仍低的968(10000股,$2.75),我這個動作是否錯誤?

因預備來年結婚,因此經常於持股時經常留意帳面的增值

龔成老師答:

上述股票本質無問題喎,其實你太著重短期股價,反而有心理上的問題。

我地買股票就是買企業,係等佢的長期成長,要有耐心先得,太短視根本無意思。另外,將信義玻璃(0868)轉到信義光能(0968),雖然有少少風險提高,但問題不太大,所以不用擔心。

反而我擔心你的投資心理,如果你接下來打算結婚,即是資金有實質的用途,那就要持有足夠的現金,股票投資相對要減少。

因為買股票是等企業成長,中短期可以上落,萬一當你要錢的時候,股價下跌你就會有較大的損失(因為就算股票優質,中短期都可以跌)。

同埋,你開始有太緊張股價的情況出現,這會影響投資的理性。(對照龔成信箱Q4089)

新創建集團而家入好嗎

問6:

成哥,剛買了您本50穩健收息股,入面有介紹659,想問下,如果現在入市,股價會否太貴?

因11月頭見到659,因為有特別股息,所以好吸引,但當時我覺得股價太高,無入注。現在恒指上3萬後回跌,d大藍籌又跟住跌,所以我應該等待659再回吐定可小注入?

659同3比較,哪一隻比較適合持有?謝謝

龔成老師答:

新創建集團(0659)最近有特別股息,所以股息率好高,但相信下年未必有。所以計算時會當佢無特別股息計,會穩陣d。

新創建分7大業務:道路、環境、物流、航空、設施管理、建築及交通、策略性投資。整體的質素算不過不失,業務分散於多個範疇,部分與公共事業有關,過往的生意雖然穩定上升。

企業本身不是沒有優勢,長遠仍有增長能力,但由於賺錢能力略有下降,加上企業本身已很龐大,增長期望不會太多,過往過價大致穩定。

預期佢的股息約為4%-4.5%,吸引力中等,未到吸引水平,但企業本身都有投資價值,其實已可分注買入。

如果佢同煤氣(0003)比較,煤氣的優質度較高,但就較貴,其實兩隻都可持有,我會偏向煤氣多少少,但煤氣較適合月供。(對照龔成信箱Q4090)

價值投資法

問 7:

龔sir,我睇緊80後百萬富翁,入面提到價值投資法,如何判斷公司有價值值得投資,有那些因素呢,謝謝!

龔成老師:

有好多因素的,其實我地要找到有獨特優勢的企業,這些優勢令企業賺錢比其他企業多,所以長遠的回報較好。

例如壟斷事業、行業有保護,令競爭者好難入侵。又例如企業的財務穩健,以及股本回報率高,都是其中的指標。其實你可睇《50優質潛力股》,裡面有講到優質股的基本指標。(對照龔成信箱Q4060)

多謝各位提問,若然你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網的,當然,會將發問者的身份,以及有關個人的部分刪去。
另外,由於提問人數眾多,見諒無法即日回覆,如果是普通的提問,預起碼要3天以上才能回覆,若然是較複雜的提問,起碼要7天才能回覆,希望各位能諒解。

編按:龔成是於公屋長大的80後青年,畢業後於銀行從事投資相關工作,雖然月薪僅萬多元,但因為理財及投資有道,只花五年時間,於28歲已累積到100萬元資產,目前淨流動資產有數百萬元。著有暢銷書《80後百萬富翁》、《80後2百萬富翁》及《財務自由行》,並出任創富課程導師。

facebook專頁:https://www.facebook.com/80shing

個人網站:https://80shing.skx.io/

延伸閱讀:

工作5年儲蓄 $100萬 學識理財你都做到

賺錢,投資,理財