租客

樓價開始跌 租金跟住跌 租客鋤價 六大秘技租平樓 | 香港樓市2018

樓市

廣告

【租客鋤價 六大秘技租平樓】市況不穩、港股疲弱,加上有新房策及加息影響,樓價開始出現兩極化情況,即既繼續有破頂成交,也有劈價出售交易。買家普遍持觀望態度,令租務市場轉趨活躍,轉買為租個案增加,同時更錄得減租成交。

撰文:浩德、樓居士  | 圖片:新傳媒資料室、網上圖片

九龍站The Austin累減3,500元

利嘉閣地產分行經理陳港威表示,九龍站The Austin 1座低層C單位錄得租賃成交。

業主約於1個月前,叫價23,000港元放租,1個月內累減3,500元或約15.2%,至近日終獲19,500元承租,折合實用面積呎租約52元。

該單位實用面積約378方呎,採開放式設計,外望樓景。據了解,業主於2013年11月份,以約877.1萬元買入物業,現出租可享租金回報約2.7厘。

紅磡海逸豪園低層減4%租出

利嘉閣地產分行高級經理曾淑貞透露,紅磡海逸豪園1期3座低層B室單位業主原叫租23,800港元,及後減至22,800元並成功租出,減幅逾4%,折合實用面積呎租約41.5元,建築面積呎租約32.6元。

該實用面積約550方呎,建築面積約700方呎,單位為兩房兩廳間隔,外望海景。

資料顯示,業主於2010年2月,以約455萬元買入,現租出可享租金回報率達6厘。

嘉湖山莊3房減租1,000元

天水圍嘉湖山莊亦錄減租個案,祥益地產高級區域經理黃肇雯指,該單位為嘉湖山莊翠湖居2座高層G室,實用面積548平方呎,3房間隔。

放盤約兩個星期,原本叫租1.3萬元,最終業主減租1,000元,以1.2萬元市價租出,實用面積呎租約22元。

體驗1分鐘貸款批核,隨時提款話咁易!

太古城單位減租1成

另鰂魚涌太古城單位最新錄的減租交易,太古城齊宮閣低層G室,實用面積702平方呎,原屬3房屋則,業主早年將單位改為兩房。

業主於5月中旬以2.8萬元放租,屬市價,最後以2.5萬元租出,較原開價減3,000元,減租1成,實用呎租約36元,成交租金屬原兩房戶租金水平。

租客鋤價六大秘技

市場都持觀望態度,正在租樓住的準上車客,大可以繼續租住先。

既然現在風水輪流轉,樓市非一味「只升不跌」,租客自然要把握機會鋤租。

不過鋤租都有唔少技巧,正所謂講錢傷感情,一個唔好彩同業主鬧翻,隨時要搬屋,新入伙啲運輸費、傢俬、雜費都唔少架,呢六個絕招可以幫你同業主討價還價!

第一招:用數據拋業主

既然要講價,自然要做定功課,搵定最近樓價跌幾多,租金跌幾多等資料,最好搵埋附近租盤做緊的價,與及其他區域劈租實例。

例如根據差餉物業估價署(差估署)最新數據顯示,1月私人住宅租金指數報168.8點,回落至近一年低位,租金四個月共跌近5%。鋤租時最少都要減5%啦,

如果你搵新界樓兩房單位開你7,500元,你隨口就講出幾個劈租個案,話天水圍三房都係咁既價錢喎。有咁多個案,睇怕業主都唔好意思再企硬。

體驗1分鐘貸款批核,隨時提款話咁易!

第二招:靠嚇 數衰經濟前景

如果歷史數據拋唔到業主,就要靠嚇,從經濟及租金前景著手,話畀佢知全球經濟都唔多掂,香港經濟亦走緊下坡。

GDP增長一季低過一季,失業率有機會上升,將香港前景有幾咁暗淡講到幾咁暗淡。

另一方面,就從新盤海量供應著手,話黎緊陸續有新盤入伙,咁多租盤湧現,而且呢啲租盤又貼近市價,租客識揀都揀新樓住,到時佢層樓就好難租出。

業主一諗到層樓有機會丟空蝕租,都好大機會肯平租俾你。

第三招:喪SELL自己優點

上述兩招係理性分析,如果業主都係企硬唔減,就要開始SELL自己係好租客。

不斷強調自己從來唔拖租,間屋又企企理理,溫柔對待原屋傢俬,冇養貓冇養狗,有穩定職業,唔會得閒無事打搞佢等等,總之要畀佢知道「你是最好的」。

其實好多業主都好怕麻煩租客,只要你準時交租,以往冇乜添過麻煩,好多業主都樂意減少少畀你,費事冒招來麻煩租客的風險。

第四招:力數舊屋問題

SELL自己屬軟功,軟的唔得,就要開始用硬,就係力數層樓有乜問題。

不過數還數,都唔好踩咁盡,太盡激嬲業主,鋤租不成仲要被趕走,真係喊到無謂。所以數時要同時講優點但又講缺點,例如:

「呢間屋雖然近地鐵,但人多車多空氣差;隔離鄰居成晚嘈住搞到無搞好訓,雪櫃洗衣機用左一陣就壞、水喉漏水……(下刪100字)不過你唔想麻煩業主,所以最後都自己搞掂啲麻煩事。」

業主知道自己間屋有缺點,大都會知難而退,減價畀你。

第五招:扮可憐博同情

如果個業主覺得自己間屋好PERFECT,仲係唔肯減,就要開始動之以情。

話畀佢聽,今年市道唔好,人工冇加過,但柴米油鹽又貴左,車費永遠有加無減機制,屋企仲有老婆仔女要養,書簿費唔少,講到自己負擔有幾大,(拎定紙巾做道具)業主唔減會被人話不近人情,呢招絕呀。

第六招:以退為進

一哭二鬧都唔得,咁就唯有三上吊,話租唔起佢個單位,決定退租。

好多業主因為唔想丟空單位蝕租,而且再搵過租客,又要再畀一個月佣,加上依家租金又真係跌緊,業主未必可以再以相同租金出租,所以好多業主真係會屈服係呢一招。

之不過,出到呢招的話,又要有心理準備業主真係會唔同你續租,所以呢招未到最後,都唔可以亂出。

太古城上月最新放盤叫價是多少?

太古城上月最新放盤叫價大約…各區樓市買賣詳情請看

九龍區有哪些大型屋苑放盤呎價最低?

九龍區不少受歡迎的大型屋苑呎價對比上月都有回落…各區樓市買賣詳情請看