因供樓被朋友嘲笑「唔識享受人生」 網民安慰:過多10年 佢哋只能羨慕你

「樓奴」每月辛苦供樓 被朋友嘲笑「唔識享受人生」 網民安慰:過多10年,佢哋只能羨慕你

樓市

廣告

香港樓價高企,就算能夠上車買樓,分分鐘要節衣縮食才能供得起。因此,部分人認為不應做一世「樓奴」,享受人生更為有意思。日前,有網民於討論區發文,稱有朋友取笑他每月要供樓,不懂得享受人生,但他卻認為,「佢哋仲慘」。

撰文:經一編輯部|圖片:Unsplash、香港討論區

樓主:身邊朋友笑我供樓慘

日前,有人於香港討論區以「身邊啲朋友笑我供樓好慘 其實佢哋仲慘」為題發文,指自己因為要供樓,反而遭身邊朋友嘲笑不懂得享受人生,但他卻認為那些朋友已「成三十幾歲人,樓都無,月光族,又唔為自己打算」,他們才是真正的慘。

因供樓被朋友嘲笑「唔識享受人生」 網民安慰:過多10年 佢哋只能羨慕你
圖片:香港討論區

網民:無得供樓仲慘!

帖文一出,引起網民對買樓、供樓話題熱議。有網民認為樓主的做法並無問題,指「供得起就無問題」,勸他不應該在意朋友的觀點。

  • 「各有前因,我供樓有幾年,去半個月歐洲玩,唔知有咩咁慘。」
  • 「我十二年前買咗第一層樓,又係被人笑我,叫我快啲賣咗佢,唔使咁辛苦,其中有個仲要住劏房。」
  • 「唔使理人點睇,反正唔買,租屋都係要使錢,唔知佢哋有咩好笑。」
  • 「穩健投資自己、物業同股票,一般十年八年都有嘢睇,之後複息效應愈來愈輕鬆,邊使三十年先享受到成果。」
  • 「要供樓真係好慘,不過,無得供樓仲慘!」
  • 「其實香港實際供樓佔入息比例都係30至40%左右,唔存在為咗供樓要犧牲自己生活質素嘅情況。真係要將大半份糧拎去供嘅人,其實連壓測都過唔到。」
  • 「有升有跌好平常。怪自己信傳媒做錯決定?都係呢句,供得起冇問題。」
  • 「過多10年,你啲朋友只能羨慕你。」

供樓平過租樓?

有網民力撐樓主,認為此刻供樓比起租樓更有價值,有人形容「交租直頭係虛渡光陰」。

  • 「交租仲慘!」
  • 「供樓同交租嘅分別就係首期。交租直頭係虛渡光陰就真!」
  • 「點解啲人成日講到好似好租樓唔使錢咁?其實供樓仲平過租樓(如果有首期)」
  • 「唔使理人點睇。返正唔買租屋都係要使錢,唔知佢哋有咩好笑!」
  • 「如果在後生時租同供唔太分別,但到人生盡頭你還有氣力去搬屋交租?呢個先係重點。」
  • 「正所謂小富由儉,大富由天,聚沙成塔,要擁有當然要付出啦!好正常啫,好過一生人要交租交到死嗰日咪仲慘!」

「延遲享樂啫,今日苦,將來就會輕鬆。短時間樓價可能會調整,但睇十年後對比返今日一定係升。供樓只有利息係成本,本金係資產,如果利息少過租金,供係著數過租。」

因供樓被朋友嘲笑「唔識享受人生」 網民安慰:過多10年 佢哋只能羨慕你
圖片:Unsplash

做「樓奴」不值得 樓價跌等於白供?

不過有網民卻指,為了供樓而放棄人生享樂,「乜都要慳」更慘。即使想量力而為,但供樓的金額基本佔收入的一大半。

「供樓無問題,但係為咗供樓咩都要慳就慘啲。食又唔捨得食,玩又唔捨得玩,買又唔捨得,最慘係差不多供完自己已經老了,一生為地產佬貢獻。樓價升都仲好啲,如果跌就…….」

  • 「樓價跌兩三成,嗰幾年供樓啲錢就白供了,仲要畀利息。」
  • 「有首期去投資的話,的確平過供。如果咩都唔做,擺喺度就真喺蝕。幾百萬樓租萬零,畀利息,扣管理費維修費,一個月落袋一萬都唔知有無。」
  • 「供樓班人其實咪一樣咁失敗,二十年後大維修,法團呃錢,又唔敢賣。」
  • 「香港地普通基層要供樓好難量力而為,好多都係借盡9成再加擔保人。量力又供唔到,供到基本都要一半人工。」
因供樓被朋友嘲笑「唔識享受人生」 網民安慰:過多10年 佢哋只能羨慕你
圖片:Unsplash

網民:層樓最後又係留畀仔女

又有人坦言即使供完樓,已經年老,自己並無辦法享受,「層樓最後又係留畀仔女」,但到頭來辛苦的卻是自己。

「未必嘅可以享受人生,你供樓係好,但享受過咩?層樓最後又係留畀仔女,無仔女仲慘,唔知留畀邊個…我相信大部份時下年青人係咁諗!」

「真係㗎!當年一知要開始供樓花,又未有得住,每個月畀8,000幾蚊唔知做咩?眨吓眼到今日都接近廿年啦,而家先知辛苦係自己,爽嘅係個仔。」

網民:供樓慘唔慘 得自己心知肚明

無論是支持買樓,或是認為不應該做「樓奴」,有網民認為買樓只是「各有所需」,慘不慘只有自己心知肚明,別人無法批評。

  • 「無所謂啦,人各有志!」
  • 「慘唔慘?只有自己心知肚明」
  • 「各有所需。」

「每個人諗法唔同好難講。我有租客係基金經理,每個月交5萬蚊租不痕不痛。呢種職業嘅人比較喜歡租樓亦係事實,佢哋錢搵錢容易又快,買樓對佢哋嚟講唔係好嘅投資,所以睇人吧。」

因供樓被朋友嘲笑「唔識享受人生」 網民安慰:過多10年 佢哋只能羨慕你
圖片:Unsplash

免責聲明:本專頁刊載的所有投資分析技巧,只可作參考用途。市場瞬息萬變,讀者在作出投資決定前理應審慎,並主動掌握市場最新狀況。若不幸招致任何損失,概與本刊及相關作者無關。而本集團旗下網站或社交平台的網誌內容及觀點,僅屬筆者個人意見,與新傳媒立場無關。本集團旗下網站對因上述人士張貼之資訊內容所帶來之損失或損害概不負責。

太古城上月最新放盤叫價是多少?

太古城上月最新放盤叫價大約…各區樓市買賣詳情請看

九龍區有哪些大型屋苑放盤呎價最低?

九龍區不少受歡迎的大型屋苑呎價對比上月都有回落…各區樓市買賣詳情請看