買樓地點近港鐵真係好？社會動盪！樓價仍高企550萬以上 | 1%Anthony | 經一專欄

撰文：1%Anthony ｜ 圖片：新傳媒資料室、unsplash

筆者： 你响沙田第一城住咗幾耐呀？
學員： 住咗十幾年啦！
筆者： 有冇諗過搬出市區？
學員： 咁又冇喎！
筆者： 返工唔遠咩？
學員： 呢度好方便架！
筆者： 點方便呢？
學員： 有架88R直出中環，幾個字就到，勁快呀！
筆者： 所以好方便？
學員： 好多地方都有巴士直到架！
筆者： 到處都有巴士架啦。

學員： 而家又有港鐵呢。
筆者： 但係出市區返工時間都長喎。
學員： 唔使一個鐘頭就返到啦。
筆者： 睇嚟大家對方便嘅理解，好似唔一樣，哈哈！
學員： 咁你覺得點先叫方便呢？
筆者： 幾個港鐵站或者巴士站，出門口半個鐘內返到公司。
學員： 咁你要求又高啲喎。
筆者： 唔高啦，我而家可以行路返工添架！

買樓要考慮地點

然而近年辣招多多，市場被扭曲，細價樓大幅跑贏大市，尤其是新界區的上車盤，有些新界區呎價，甚至比樓齡相若的市區樓更高。所以近年筆者與學員們都不斷進擊新界各區，雖然租金回報冇市區樓咁高，但只要識得搵識得揀，樓價升幅卻往往能夠跑贏，回報甚豐。

今年團隊成功撈底的地區，包括跌市重災區沙田第一城。記得去年高位的時候，入場版284呎、304呎兩房單位，曾經賣到600萬，年初跌市，團隊在450至500萬之間，就已經買到多間，恭喜各位學員！

筆者買開市區樓，以前都冇乜意沙田第一城，今次深入研究，也找來幾位在沙田第一城住了多年的學員引路。經過幾個月的戰鬥，團隊買到不少筍盤，現在那些入場版，普遍成交已經接近600萬了，近日社會動盪，樓價稍見回落，但仍然高企在550萬以上，住在那裡的學員，都覺得很方便。

買樓要方便的定義

明顯地，大家對方便的理解與體會有分別。對於很多住慣新界區的朋友來說，只要有港鐵到，又或者有特快巴士直接到市區想要到的地方，就是方便。然而對於我們這些從小到大都住在市區的人來說，方便的要求更高。

幾個港鐵站、巴士站，半個小時內返到公司是必須的，最好可以行路返工，還要就近消費購物區，還要有通宵車夜了可以很方便的返家，還要有很多民生街舖，夜了商場關了，還可以到附近小店吃夜宵。

租金反映生活配套

租金亦反映了這些生活配套。就以最近同學買入的半新樓為例，其中一個在市區，靠近奧運站，面積只有260呎左右的一房單位，樓價只需要530萬，租金可以高達1.6萬，相反另一位同學入新界西北，港鐵上蓋的半新樓，面積480呎的兩房單位，樓價需要700萬，但租金同樣都是1.6萬，可想而知租金回報相差有多遠。不過由買入到現在，論升值，確實是後者的爆炸力高一些。