只還Min Pay唔找卡數會點？條數越滾越大 清數無期｜1% Anthony

撰文：1%Anthony｜圖片：unsplash

借錢好過爭卡數？

相信大家每日都會收到唔少推銷電話…叫你借錢！有啲係銀行打嚟，有啲係「扮」銀行打嚟！銀行打嚟，如有財務需要，聽吓無妨，而家P Loan幾抵借；扮銀行打嚟，小心啲，隨時俾人說你去借財務公司，甚至…點分呢？唔敢話百份百一定啱，只是筆者以前曾經在某大美容集團做過市場推廣管理，曾聘用過一些電話推廣公司，可以分享一下，他們都會說是代表某某公司，例如某某銀行打俾你，識聽就識分，例如開頭唔會有一大堆聲明，談話期間亦比較自由發揮，會同你傾閒計，你會感覺到佢會好想了解你多啲。有時推廣公司會同幾間金融機構合作，銀行唔啱，有機會介紹俾財務公司。

講起P Loan，好多人都好驚…唔使太抗拒！點都好過欠卡數，每月還Min Pay！只還Min Pay，條數會越滾越大！情況就像我當年碌卡炒股…贏錢就梗係少年股神啦，輸錢咪係無知債仔囉！遇上金融風暴，仍然唔識死，每個月只還Min Pay，等極都返唔到家鄉，條數越滾越大，高峯期欠下數十萬，大約是當年兩年的人工，最後我都係決定大刀闊，斬倉止蝕，然後借P Loan債務重組，之後兩年，全份人工攞晒去還錢，自己就瘋狂秘撈賺生活費，慘爆！

私人貸款利率貼近按揭息

所謂P Loan，即是私人貸款…近年辣招多多，按揭市場唔易做，於是銀行積極開拓私人貸款市場。很多私人貸款，年利率其實低至接近按揭利率，即兩厘多，例如每借10,000元，每月利息才10多元，利息即是幾多？以15元為例，每年就是180元，就咁計，即是180元除以10000元，利息即是1.8%？不！這是「月平息」而已，沒有計算你還款時欠款逐漸減少的元素，例如還咗一半，只欠5,000元的時候，你仍然每月還15元息，那個月的利息就不是1.8%了。坊間一般流傳一個計法，就是…實際年利率 = 月平息 x 1.9，以剛才的例子計算，就是1.8% x 1.9 = 3.42%，也不算高。

如果之前唔生性，欠落好多卡數，不妨考慮一下。一來可以盡快還清債務，二來如果還款能力許可，又有多餘的借貸能力，不妨可以借多少少來做投資，但切記不要做高風險的投資，例如我當年貪心走去炒窩輪，今日就賺到豬頭，明天就輸到豬抦，何必呢？

錢是借回來的，最重要是唔好輸，可以搵一啲比較穩陣的投資，自己有信心掌握的投資，如果冇心水就唔好挾硬嚟，一般小投資者可以考慮Reits，資深投資者可以考慮債券。我自己就當然揀磚頭，除咗買樓收租，物業發展、工廈活化等，都是非常安全，而且回報不俗的投資，每年都有15-20%左右的回報。