一分鐘消化十三.五

社會熱話

廣告

或者你會問:「十三.五食得㗎?」小編會答你﹕「食得,仲好難食。」但為咗增長知識,小編用盡吃奶之力,終於成功爭取消化咗呢份「中華人民共和國國民經濟和社會發展第十三個五年規劃綱要」,再嘔心瀝血地、用返人類既語言、簡單講返呢份大作的重點。

不愧為習大大親手打造嘅未來五年中國發展計劃,真係一份媲美佛學嘅作品。都知你班凡人淨係識willing to like & share而唔識欣賞概念文學,放心小編幫你點出重點來。但都係個句:「信者得救。」

經濟:2020翻一番

經濟方面,堅持以提高經濟發展質量和效益為中心,促進經濟增長由主要依靠投資。保持中高速增長,到2020年GDP同人均收入較2010年翻一番。

經過小編屈腳指一算,未來五年GDP平均增長率要6.5%至6.6%。雖然低過「十二五」嘅7%,但以內地經濟已進入「新常態」嚟講,真係好難。但大家可以放心,以中國式計算方法同中國式四捨五入,要做到以上目標應該無難度。

脫貧:硬出辦法來

扶貧方面,習大大就話,要採取超常舉措,拿出過硬辦法,按照精準扶貧、精準脫貧要求,用一套政策組合拳,確保在既定時間節點打贏扶貧開發攻堅戰。

睇唔明係咪?簡單嚟講,到2020年,中國全部人民會富起來,現行標準下的7,000幾萬貧困人口全部脫貧,592個貧困縣全部「摘帽」,冇晒貧困縣,真係so exciting呀!

不過,連習大大都用到戰爭嚟形容脫貧,就知道件事幾難,但錢解決到嘅問題就唔係問題,冇晒貪官的話~~~~~

人口:二孩總比一孩好

人口政策方面,堅持計劃生育的基本國策,完善人口發展戰略,全面實施一對夫婦可生育兩個孩子政策,積極開展應對人口老齡化行動。

為咗響應梁特首「三條比兩條」好論,習大大都要推出二孩政策。根據最新一次人口普查的結果顯示,內地生育率已經降到了1.18的低水平,遠低於歐、美發達國家同東亞鄰國。鼓勵生多個都係為咗未來發展,年青人仲唔感恩同生多個?

環保:保護地球 大大有責

環保方面,著力深化林業改革;著力保護森林資源,全面保護天然林、全面保護濕地、全面保護重要生物物種;著力提升質量效益,繼續加快造林綠化步伐、大力培育珍貴樹種和大徑級優質良材、積極發展木本糧油;加強森林保護體系建設。

用人類嘅語言嚟講,即係阿爺要搞環保。係,阿爺話搞環保都已經好多了,污染好似愈來愈嚴重咁,不過小編仍然相信,發展就是硬道理,根本唔需要處理污染問題。

不過,既然阿爺又再開到聲,咁大家就即管重視吓個地球囉,環保股又得閒無事可以炒作,因為搞環保一定是對的。

網路:強到二次元

網路方面,實施網絡強國戰略與「互聯網+」計劃,發展分享經濟,及實施國家大數據戰略。中國工信部正在制定《大數據產業十三五發展規劃》,未來還將出台促進大數據產業發展的推進計劃,促進規劃、標準、技術、產業、安全、應用的協同發展。

經過小編腦內翻譯,有理由相信內地未來會大大力發展互聯網,令中國唔單止成為一個實體強國,連網路上都係一個強國。而且仲要將網路帶入市民日常生活,咁就人人有工開,家家有電腦喇。

又啱既,你睇睇阿里巴巴同騰訊控股(00700),搞網絡搞到成個綜合企業咁,又金融、又零售、又娛樂電影,想唔入侵平民生活都唔得啦。