上司 下屬 後生仔 裸辭討厭 勇氣 網民熱話

唔敢鬧下屬怕後生仔裸辭 「做得上司要有被討厭的勇氣」|網民熱話

社會熱話

廣告

【上司・網民熱話】做打工仔遇著唔好嘅上司,固然日日返工都受氣,會好難頂。但調返轉頭,好上司遇上極懶下屬,鬧佢哋怕佢哋裸辭,又怕難請人又唔想再教過⋯⋯又可以點做?

撰文:麗爾|圖片:電視截圖、unsplash

樓主為主管,佢表示部門流動率高,下面同事(都係後生仔女)交接唔順利。樓主叫佢地做,又個個都唔識做,識做嘅工作又晚晚做到 6 點都未做完,影響到其他部門。「叫佢地 OT 又唔太願意,只係有時會 OT 1 hr (但工作仍未完成),backlog 愈堆愈多,我只好繼續親力親為落手做幫輕下,但隔離部門主管就提我咁樣做主管唔得,會做壞規矩,應要強硬 d 叫佢地自己 pick up 工作,即使佢地怕辛苦而 resign 都無法。」

樓主擔心再迫下屬,佢地會走人,到時大老闆會怪佢管理不善,想知大家有冇咩解決方法。

網民認為樓主作為主管,縱容下屬唔識做、做得慢,結果佢地唔做就要自己做,係好有問題。「你依家並無發揮主管嘅功能,你只係一個能力較高同積極工作嘅下屬」。建議樓主應該親力親為教佢地點做,教識佢地之後就唔洗自己做。

亦都有人認為,做主管其中一樣職責就係管理。「佢地唔識唔做,你又唔鬧唔教,咁你真係會自己做晒所有野。」

部分人表示示範俾下屬睇點做,係可以,但做埋一份唔得,緊急情況另計。「你管唔好班下屬你老闆會認為你冇管治能力,如果你認為公司要求員工嘅工作量合理,而佢地喺合理時間內都未能達標,咁你真係要建議公司請過批人。」並提到就算件事樓主做用一個鐘,下屬做要一日,都係要俾佢做。「呢樣係佢嘅工作,你係管理及指導佢嘅工作。」

 

樓主回應: 「我都明白,但真係怕講多兩次,班後生嘅真係會裸辭,因為佢地無經濟壓力,我呢度人工又唔係高,留唔住人。」

網民反問唔通怕人走就唔鬧?「唔好睇少班後生既抗壓力,有D真係要間中鬧下先做到野。再唔係你請中年人士夠穩定。」

有經驗者提到做得上司主管嘅,一定要有一套手腕,並非一味硬,也不是下下都對下屬好。所以做管理層嘅先會人工高啲。「如果唔洗用腦,阿豬阿狗都做得阿頭啦」。

網民:「你要識做,必須出手時先出手,下下親力親為係係管理能力出問題,你就唔適合做主管了。記住你究竟係想做一個‘好’上司定係成功嘅主管。自己楝(揀),做得上司嘅要有被討厭的勇氣。」

「樓主真係好,有D主管,叫下屬做埋佢嗰份添呀」

樓主亦有提過,人工唔高,都係請人嘅困難之一。「有諗過請中年,但中年人工要求相對又較年輕人高, offer 要夠吸引先有人肯黎,呢個問題又係解決唔到」

一眾網民認為,人工低自然吸引唔到真係勁人來,「呢種人工請到呢種條件嘅人係差唔多,解決方法係叫老闆出高薪請勁人黎做」

「唔係叫你高壓逼佢地做野,事實上亦無得逼,你要令佢地心甘情願咁去學去做,人工唔高係一個你解決唔到嘅問題,但係咪代表你無野可以做呢?」

「主管,係做監察部門,你應該諗點樣簡單化工作去提升部門效率。特別係年輕人多既部門 培訓工作素質係好重要一環 特別係部門風氣令環想的工作效率變成常態行為。」