【絕世筍工？】網民熱議大學畢業做保安的好處 巡兩次樓其餘時間做自己嘢 輕鬆賺1.5萬：何必咁辛苦
撰文：經一編輯部｜圖片：Unsplash
保安員工作性價比高 輕鬆賺15,000元
有人於連登討論區開以「真心唔明做保安有咩問題」開post，力撐保安員是一份筍工，反對其他人對保安員的偏見。樓主表示，保安員的工作性價比十分高，每日巡兩次樓，每次約30層，由左邊樓梯打鐘打到右邊，然後巡下一層。整個巡樓過程約1小時。
他續指，現時擔任保安員月入約15,000元，工作量不算多，每日開工9個鐘。每次巡完樓，且完成自己的日常工作後，就可以做私事，不會有人理會。與侍應、快餐店店員等工種相比，保安員是一份筍工，收入且穩定。因此，樓主並不想再搵工，他表示反正人工並非相差太大，何必令自己太辛苦。
樓主指：「論人工15k算係唔錯，工作量又唔多，行下就完，之後做自己嘢沒人理，當然最好就唔好訓覺，要訓覺就自己搵位，例如天台之類，座頭就唔好啦。」
樓主解釋，自己有大學學位，星期一至有份全職文員工作，月入約2萬元，連同保安員工作，每月收入約3.5萬元。他續指，早上番office，收工則擔當保安員，每天有3至4小時的睡眠時間。
「長夜（行內一種夜更的名稱）習慣咗其實無嘢，每日有三四個鐘訓覺，星期一至五收工我換件衫就可以去返office，office又hea ，收工急急腳走返屋企沖個沖訓陣覺又去做保安」
網民：保安員有晉升空間又輕鬆 係一份筍工
樓主帖文一出，不少網民都認同樓主的意見，同意保安員是一份筍工。
有網民表示，保安員有晉升前景，可以升做IC（Person In Charge保安部主管），再升至隊長、保安主任，月入分分鐘達2萬元，前景算不俗。又有網民指，只要和住客打好關係，保安員的確是一份好工。
「過年過節又有利是，平時冧到啲住客，又有嘢食有生果，當識多幾個朋友都好呀。」
又有網民指，做保安員的收入雖然不多，但旨在輕鬆。
「我讀計算機(Computer Science)嘅，搵過120K。依家就想去做保安，搵12k。輕鬆自在……」
更有網民笑言自己有移民打算，會考慮擔任保安員度過剩下留港的日子。
「老實講，我準備緊移民都想做保安過埋依幾個月，拎埋部ipad去開工，日日玩訓食收工做gym一定好爽！」
筍工定義因人而異 視乎個人對人生的追求？
雖然有不少網民都認為保安員的工作好筍，但同時有網民質疑保安員的人工、晉升階梯有限。更有網民反指，並非個個保安員的工作性質均與樓主一樣輕鬆。
甚至有網民反擊樓主，直言工作的好與壞全依個人要求而定。
「睇你人生想要啲咩，你唔鍾意人地對保安有偏見，人地都唔鍾意你對工作量多嘅工有偏見。」
