公屋停車場多名車 有人月入數萬、擁私樓仍住公屋?網民:「公屋富戶」大有人在!

網民熱議公屋富戶 停車場多名車、家庭月入達10萬元、買樓送畀仔女仍住公屋?網民:好多都又車又勞!

社會熱話

廣告

香港地少人多,樓價高昂,想買樓上車並非易事。其中,不少人會選擇輪候公屋。現時,輪候公屋需時起碼需要5.6年起跳。雖然普遍市民認為公屋可改善本地房屋問題,惟有網民於討論區開post,指公屋體系內存在富戶問題,導致許多有需要的市民無法入住。

撰文:經一編輯部|圖片:Unsplash、政府新聞網、AM730

「公屋富戶」大有人在?

早前,有網民以「公屋富戶好XX街」為題開post,熱議「公屋富戶」的問題。該樓主表示,不少人住公屋買名牌,又揸靚車。他表示,太多人吹奏濫用公屋的行為,導致不少真正有需要的人「租幾年劏房都上唔到樓」。

帖文一出,引起不少網民回應,有人附和樓主,指出「公屋富戶」大有人在。有人表示,見過不少公屋住戶有名車,相信「養車」的使費早已超出公屋住戶入息上限。

  • 「真係好多租公屋嘅又車又勞,有啲仲日日fb 出post分享生活幾咁多姿多彩。」
  • 「工作關係成日要係屋邨遊走,公屋停車場好似車展。法拉利、波子、林寶唔使講,個個場都起碼一部。間唔中有賓利、麥拿倫、勞斯萊斯。」
公屋停車場多名車 有人月入數萬、擁私樓仍住公屋?網民:「公屋富戶」大有人在!
有網民形容公屋停車場猶如名車展覽。(圖片:Unsplash)

現金出糧成制度漏洞?

除了有名車,有網民直言部分公屋住戶月入數萬元,惟以現金出糧。因此,他們隱瞞真正的入息,繼續居住於公屋。這亦是導致「公屋富戶」出現的因素之一,

  • 「識人做陪月住公屋,每月幾萬蚊收入,但同政府講無業 (連富戶租金都唔使交),平時收現金。」
  • 「現金出糧個堆工種搵唔少。又唔使交稅,一層公屋擺係度 一層私樓出面住。」

「公屋富戶」購買自住單位或以子女名義置業

討論區過往已有不少有關「公屋富戶」的帖文,網民紛紛表示這個現象並不罕見。他們解釋,這些住戶普遍早期申請公屋,後來生活得到改善後,部分會將自住的公屋單位買下來,部分或會以子女的名義置業,自己則繼續居住於公屋單位中。

  • 「大把,多數仔女結晒婚搵到錢。上一代對住都冇咩要求㗎啦,講緊基層,唔係富二代,啲仔女又定期畀錢佢地」
  • 「識人住公屋,屋企係上面有好多塊地、屋、車。大部分親戚移民美國加拿大,早幾年隔一排就會俾政府買走一啲地去發展,金額唔係億億聲但都幾千萬一塊。」
  • 「有親戚好多年前唔知係俾政府收農地定寮屋,換咗間公屋住。後尾發咗(達),買咗幾層樓擺仔女名下,又送晒仔女去外國讀書。兩公婆都仲住喺度,房署都冇佢符。」
  • 「買咗嘅公屋。另外有一間私樓,有一間唐樓,有餐廳 。」
公屋停車場多名車 有人月入數萬、擁私樓仍住公屋?網民:「公屋富戶」大有人在!
圖片:政府新聞網

超過公屋入息上限5倍 須搬離公屋單位

事實上,根據政府今年4月更新的公屋住戶入息及資產限額,現時一人公屋戶入息上限為1.28萬元、二人家庭為19,430元、3人家庭則為24,410元、4人家庭的每月最高入息額為30,950元。

若住戶超出公屋入息限額2倍但不高於3倍,需繳交多1.5倍的租金。若公屋住戶超出入息限額3倍但少於5倍,則需支付雙倍租金。據現時的「富戶政策」,如果公屋住戶的家庭入息超出限額5倍,或總資產淨值超出公屋入息限額100倍,會被要求遷出所居住的公屋單位。此外,若住戶擁有私人物業,同樣需要搬離單位。

以1人家庭為例,若住戶入息超出6.4萬,必須遷出公屋單位;至於2人家庭的入息則不得多於97,150元、3人家庭則為122,050元。

網民:人哋畀貴租唔係都可以keep住間屋咩?

雖然不少人抨擊公屋富戶問題,認為他們有經濟能力卻霸佔公屋單位,使許多有需要的市民無法入住。惟有網民表示根據現時的富戶政策,這類「公屋富戶」本來因為入息較一般住戶高,需要支付雙倍租金,故他們有權利居住於公屋內。

  • 「富户人哋畀貴租唔係都可以keep住間屋咩?」
  • 「公屋富戶唔係濫用公屋,係政策下只需要交兩倍租。」
  • 「其實交倍半/ 雙倍租金嘅人都唔少,講緊至少家庭月入5、6萬。」

樓價太高 有私樓住唔通仲住公屋咩?

不過有網民坦言,「公屋富戶」現象反映出本地樓價過高的問題。他解釋,就算公屋的居住環境比不上私樓,這些收入較高的住戶仍因租金便宜,選擇繼續居住於公屋單位內。

  • 「唔否認嗰啲超晒資產同入息嘅人仲住喺公屋係X街,但係大家講到公屋環境咁差,點解超晒入息都仲要keep住間公屋?某程度上都係因為樓價太貴。如果樓價係合理水平,有錢邊個唔想住靚樓?有靚會所,鄰居質素又好,使留喺間垃圾公屋?」
  • 「公屋富戶講緊全家月入五至十萬,資產兩百萬,係極限嚟。呢班人出去私人市場又買到啲咩?佢地就係有需要先住公屋,有私樓住唔通仲住公屋咩?」
公屋停車場多名車 有人月入數萬、擁私樓仍住公屋?網民:「公屋富戶」大有人在!
網民反指:「大家講到公屋環境咁差,點解超晒入息都仲要keep住間公屋?某程度上都係因為樓價太貴。」(圖片:政府新聞網)