鏡粉老公群組：如果Mirror代言樓盤叫呢啲名 傾家蕩產都唔掂！老婆：咁要買幾個單位！
撰文：經一編輯部｜ 圖片：我老婆嫁左比Mirror導致婚姻破裂關注組
老公：樓盤叫呢啲名樓市就…
一位鏡粉老公今早在群組發言，疑惑「其實會唔會第日啲樓盤叫呢啲名，係嘅話個樓市就…」，然後創意爆棚地一口氣舉了多個樓盤名例子，包括「柏傲·然」、「愛·濤」、「MIRROR Town」、「THE ANSON」、「JER Residence」、「嘉駿匯」、「姜濤灣」、「縉士」、「樂文一號」、「柳應庭」、「瀚霆軒」及「193 XXX Road」，乍看之下與時下新盤盤名難分真與假。
老婆：佢我住柳應庭度
帖文一出旋即引來網民廣泛分享並熱烈討論，上述例子當中，網民覺得最搞笑是「柳應庭」（柳應廷，Jer），認為呀Jer不用改名，天生已經是一個樓盤名！其中一個太太更表示，「如果有人問我住邊，我答佢我住柳應庭度」，爆笑程度滿分。
網民：同時鍾意幾個鏡仔點算？
另外，亦有網民問Mirror Town是否有12座，然後Mirror本人住在頂層；有網民就回應指，「咁搞法一定炒到癲，每棟住專屬粉絲，如果同時鍾意幾個鏡仔點算？」「咁要買幾個單位喇」。
網民：唔好漏左花姐公園
有網民就真的列出「Mirror Garden鏡園」12座的名稱，包括「瑞輝閣 Frankie Court」、「智德閣 Alton Court」、「樂文閣 Lokman Court」、「士縉閣 Stanley Court」、「𤒹生閣 Anson Court」、「應廷閣 Jer Court」、「卓賢閣 Ian Court」、「瀚霆閣 Bishop Court」、「駿傑閣 Jeremy Court」、「爵安閣 Edan Court」、「姜濤閣 To Court」「傲然閣 Tiger Court」，然後花園叫「中央花姐公園」，如此數完一次，即使不是鏡粉相信亦清楚記得他們的名字！
在網民一片熱議之中，有清醒的鏡粉老公提醒一眾老公，「好玩唔玩攞呢啲嘢來玩，傾家蕩產都唔掂」，但這個被小編無意中見到的理性留言，早已掩沒於群情洶湧的討論之中。
