銀行

銀行6大鬼鼠收費 唔理會好蝕底

理財

廣告

成日聽見啲知慳識儉嘅公公婆婆輩講,呢度慳一蚊、嗰度慳幾毫,好快就可以儲到錢買樓上車,呢套理論對於各大銀行嚟講都相當合適,因為佢哋時不時就喺我哋班尊貴客戶身上呢度收幾十、嗰度收幾百,跟住到咗業績公佈又賺咗幾個億喇!唔想傻傻被收費而不知?咁就要留意以下銀行嘅6大鬼鼠收費喇~

1. 最低結餘要求絕非一成不變
大家都知道大部分嘅戶口都需要你擺多過最低結餘嘅金額喺入面,不過你哋可能忽略咗嘅係,唔同類型嘅戶口其實有唔同嘅最低結餘要求。

通常你去銀行整少少戶口嘢,可能都會有啲職員嚟游說你升級你嘅戶口做嗰啲「優X理財」、「X卓理財」等等好好聽嘅名,但以後你再聽到呢啲「尊貴禮遇」嘅時候,就要打醒十二分精神喇,因為除咗將你個戶口類型變得好好聽之外,佢哋其實同時會提高你嘅最低結餘要求。

一旦你無為意而又一直無擺返足夠金額入個戶口嘅話,銀行就會一直每月扣款約二百至三百蚊不等嘅手續費,係扣到你負數都仲會繼續扣落去,不知不覺咁陰乾你戶口,銀行就袋袋平安。

2. 信用卡年費
除咗戶口,有時銀行打畀你話幫你升級張信用卡嘅時候,你可能又無為意佢哋晍時提高你嘅信用卡年費,到佢自動扣數你先發現,甚至扣完幾個月你先發現。

亦有啲信用卡聲稱免年費,但原來佢嘅所謂免年費只限頭幾年,過咗一定期限就要開始收年費。以滙豐信用卡為例,免年費優惠只適用於頭兩年,其後就會開始收,如果你唔記得咗打去waive,就會無辜被扣數架喇。

其實一個簡單嘅小動作就可以避免被收取年費,以滙豐同恒生嘅信用卡為例,兩間銀行都歡迎用戶自行打上佢哋嘅信用卡中心熱線申請豁免年費,輕輕鬆鬆幾分鐘就拎返幾百蚊。

3. 月結單收費
為咗環保同減低成本,依家多數銀行都會鼓勵客戶使用電子月結單服務,為咗咁,大部分銀行都開始為郵寄結單徵收手續費。

以收費最低嘅東亞銀行為例,郵寄結單每半年收費$10,全年合計$20;花旗銀行郵寄結單每半年收費$20,全年合計$40;星展銀行向使用郵寄結單嘅信用卡客戶收取每年$50;而收費最貴嘅就係滙豐,滙豐嘅郵寄結單收費以每份$20計,換言之一年下來合計,郵寄月結單客戶可被收取最少$240。

不過,通常18歲以下或者65歲以上嘅客戶、領取綜援及傷殘人士都可獲豁免郵寄結單年費嘅。如果上網方面困難不大嘅話,大家都係快快脆轉哂用電子月結單,為荷包著想亦為環保出一分力。

4.取消定存收手續費 

有時你哋可能會拎一筆穩定存款去做定期,希望攞高啲利息,但係要留意,如果你想提早拎返存款,唔單止無哂原有嘅利息,仲要被罰款同畀手續費。

以恒生為例,提早攞定存嘅客戶將不會獲發利息,而且需要畀最低200蚊嘅罰款額。而罰款額就係以提取日同到期日之間嘅差距嚟定,定存計劃愈新,提早拎返啲錢嘅成本就愈甘。

5. 取消戶口收續費
唔好以為取消咗個戶口就一了百了,因為取消戶口係要收手續費架!

以取消恒生戶口為例,結單戶口(卡號碼666結尾)就要收$50;綜合戶口(卡號碼882/888/001結尾)就要收$200。

6. ATM食錢
用櫃員機提存款,有時會出現「食錢」情況。有時係你提款時少咁張,又或者係用機存款時部機計漏一張半張咁。

如果遇到呢個情況,記得記低你提存款嘅日期時間,同埋櫃員機編號,儘快打上銀行嘅服務熱線講返你嘅情況就可以。唔好拖太耐,因為櫃員機記錄同閉路電視錄像保存有時限,如果你隔成幾個月先投訴,只會口同鼻拗,咁就會白白無咗啲錢架喇!

 

註:以上資料僅供參考,一切以各銀行及相關機構最新公布作準。