五個免費飲水地方

生活消閒

廣告

天氣熱到不得之了,好環保咁帶咗水樽出街,一覺唔覺就飲晒成枝水。7仔買支水閒閒都要6、7蚊,仲要好細枝,兩啖就飲哂。如果唔想畀錢買水,等小編話你知邊度有得免費撲水。

1)康文署管理的公園和遊樂場

基本上,所有康文署管理嘅公園同遊樂場都有水機,例如:油麻地京士柏遊樂場、九龍公園 、尖沙咀東海濱平台花園、彭福公園、觀塘海濱公園、郵輪碼頭公園。唔少公園都有水機設施,方便大家行公園或者玩完一身汗可以補充返。

2)各大專院校和教育機構

學生喺學校嘅時間分分鐘多過喺屋企,水機呢啲設施當然有。 唔好諗到咁偏僻嘅中大同科大先,其實有唔少大專院校都座落喺市區入面,真係總有一間喺左近。

例如:尖沙咀加連威老道有中大專業進修學院尖沙嘴東海教學中心;工聯會業餘進修中心喺油麻地、尖沙咀、中環等旺區都有分校。校園範圍大多數都可以入去嘅,只要你唔好攪攪震就得架啦!

3)快餐店

大型連鎖快餐店都可以免費攞水,只要唔怕臉皮薄,去水吧好有禮貌咁問佢:「可唔可以畀杯水我?」通常都得,因為佢地應該分唔到你係咪食客。雖然杯水唔會好大杯,但都叫做有水入口。有啲服務好啲嘅仲可以問佢攞杯冰水,唔洗飲水機嗰啲比太陽曬熱咗嘅暖水。

4)體育館

體育館一定必備水機,人地做運動成身汗有飲水,你行街行到成身汗都要飲水。體育館除咗有水飲,仲有非常涼嘅冷氣嘆。不過嘆還嘆,小心凍親。

5) 政府機構

政府機構例如警察總部 、綜合家庭服務中心、長者咭辦事處都有水斟,多數都係蒸餾水機,所以有冷熱水斟嘅。如果去到政府合署,唔知邊到有水斟,可以喺水牌搵下社會保障辦事處、保護家庭及兒童服務課都有水斟嘅,再唔係厚面皮問下「實招」囉!

如果想睇埋詳細嘅撲水地圖,可以去Water for free呢個網頁,佢有埋有晒各個撲水地點,可以幫你輕鬆搵水飲!

撰文:高 清

如我有特別需要申請政府津貼,有什麼津貼可以申請?

如是長者/傷殘人士,可以留意長者生活津貼長者咭樂悠咭傷殘津貼申請綜援等等,在住屋方面,可以考慮申請公屋

如果我想外旅/返回內地,有什麼需要留意?

首先,要留意特區護照/回鄉證是否需要續期,以及留意不同貨幣的匯率走勢,包括人民幣兌港幣日元兌港元英鎊兌港元等等。