同事

能力低 態度惡劣 但奈佢唔何 兩類極品同事有免死金牌 | 有心無默 | 職場制勝

職場

廣告

職場制勝】要數最極品同事,肯定係嗰種恃住自己有免死金牌,喺公司為所欲為嘅人。

撰文:有心無默 |圖片:unsplash

極品同事有免死金牌

其中一種,係老闆或者公司大客嘅「寶貝」親戚。試過可以一整日揸住罐可樂周圍搵人傾偈,突然話肚餓就走落樓下食Tea,交帶落嘅嘢完全冇做過。

但上司同事又奈佢唔何,只可以隻眼開隻眼閉。慶幸呢位同事冇點利用呢個身份作威作福(至少暫時冇),所以帶來嘅傷害都唔算嚴重。

而另一種,就係人稱嘅「無敵組合」──長俸公務員加一張白卡(即醫療補助計劃)。

加減數都可以計錯

F先生就係一個例子,遲到、早退、經常請假呢啲大路嘢基本上做齊晒。

而佢本身工作能力係低到一個地步,就連最簡單嘅加減數都可以計錯,英文能力更加接近係零。

有次有位女同事(啱啱轉部門過嚟)出於好意過去想幫下佢,語氣其實已經非常好,點知F先生聽完居然咁講:

「妳而家係咪教我做嘢?妳喺度做咗幾耐?妳知唔知我做咗幾耐?有不滿嘅就叫阿頭嚟搵我。」一輪嘴講完之後,仲一手掃晒旁邊啲嘢落地。

阿頭同老闆都知

事後嗰位女同事當然係喊到七彩,如非必要都唔想再同F先生有所接觸。

阿頭同老闆當然知道F先生有幾「極品」,然而佢有醫生證明自己有病。因為怕會惹麻煩上身,所以都唔敢隨便炒佢。

唯有安排佢去一啲無關重要嘅崗位,處理一啲瑣碎嘅工作。

有次,上司臨旅行之前交低啲嘢俾佢做。

其實都係簡單點下貨品,最多半日可以完成嘅嘢,預咗佢會搞足一星期。

F先生起初都係笑笑口話收到,點知轉個頭就將成份點貨單掉入垃圾桶,係有位阿姐好心幫佢執手尾。

同事當然有微言

老闆唔敢炒,焗住要面對呢位咁惡劣同事。其他同事當然有唔少微言,間唔中食飯閒都會講下佢壞話發洩,仲幫佢改咗個花名(名就唔直接講,總之係形容佢嘅身材)。

結果呢個花名唔小心傳到F先生耳邊,佢即刻搵上司「傾偈」,同佢講:

「喂,阿邊個同邊個(其他同事)幫我改咗呢個花名喎。我已經打過去平機會投訴,你諗下點處理啦。」

有同事頂唔順轉工

其實上司都幾肯定平機會唔會處理,但佢真係太怕事。

所以只係私底下叫班同事唔好再講F先生壞話,希望多一事不如少一事。

直到今日,好多同事都依然受緊佢氣,當中不乏頂唔順轉工嘅人。

最後帶返個頭盔,我並冇打算歧視任何人。

只係想講返,真係有唔少人會借自己嘅「身份」做擋箭牌,然後輕輕鬆鬆每個月袋幾萬人工。

香港呢個地方有時就係咁唔公平。

編按:作者有心無默是網絡作家,以創作為樂。真實身份為故事星人。著有《西營盤》、《絕命上映》、《絕望走廊》等暢銷小說。