公司迫清假 打工仔連紅日放十多日長假 惹上司不滿黑面 網民意見超兩極！
撰文：經一編輯部｜圖片：Unsplash
樓主：我請完假之後，上司面都黑晒
日期，有位打工仔於香港討論區以「公司要我清晒十幾日 AL，我請咗三月尾四月頭，上司罵到我飛起……」為題開post，指公司要求他清假，於是他為免麻煩，決定在3月尾至4月初，一次過放長假。
「公司三月前要我清假，可以請到下年，又要七日通知乜乜乜。咁我睇同事邊日請假，發現三月尾到四月頭無人請，咪請晒去，廢事記邊日要返邊日唔使。我請完之後，我上司面都黑晒，WhatsApp話要同我傾傾，之後叫我唔好一下子請咁多日，要分開請……係唔係X線？唔通我之後半年個個星期五放假又無問題？」
網民：畀得你就請得落，驚咩？
帖文一出，引起網民熱烈討論。有網民斥樓主的上司太過苛刻，指請假是打工仔的權益，認為上司的要求不合理。
「真幾X街，又要人清假又唔畀人請咁多日，而且你都避開同其他同事一齊放嘅時間，起碼公司有事可以搵到人。」
- 「唔知有咩問題，去旅行都係放10幾日啦……」
- 「畀得你就請得落，驚咩？？」
- 「你上司有躁狂，你申請咗佢可以唔批，或者再同你夾，根本唔使鬧你。」
- 「你做咗幾多年？根據勞工法，你有權請假連續放，僱主不能say no。」
老細最想員工「假照申請、工照返」？
又有網民分享自己清假的經驗，表示清假通常是公司的要求，然而上司普遍並不會希望自己的員工放假。
「AL連長假放，通常係高層優先不成文規則。以前某公司會計部有2條team，team head按最高領導financial director 指示，因聖誕、新年趕住埋數，要求同事不可以聖誕連AL放。結果各同事真係無放假，但係finance director 同秘書喺聖誕加新年期間請咗一星期AL」
- 「老細最想員工假照申請， 工就照返。呢啲咪係角色同身份嘅問題囉！」
- 「清假可能係HR要求，不過你上級唔想你一次過放長假。以前做過啲公司，有同事請一個星期大假，上級會話你影響公司運作。另一個同事喺春茗抽到大獎（台灣機票），同上級講放一星期假，同樣畀人話會影響公司運作，最後他向HR反映後獲放行。」
- 「我好耐之前有個阿頭又係咁，又要人清假，又唔想你連住放，最好放一日，啲嘢留返畀你做。」
網民：連復活節放長假做法不妥
不過，有網民卻認為樓主的做法不妥，指他應該站在公司的立場，就算要請假，亦不應影響公司的運作。又有網民直言，四月初為復活節連假，樓主選擇在那個時間點請大假，變相連放差不多1個月假，難怪上司不滿。
- 「其實請假要有planning，就算係清假都盡量唔太影響公司運作，你係有權請晒所有嘅假，但上司可能覺得你無預先夾好，所以導致今次呢個局面。」
- 「你肯定係新人，唔知規矩季尾夠膽放假！」
- 「其實有時候都要站在公司和同事立場去想，作為公司一份子，因為自己放假而影響大家工作都唔係幾好嘅。」
- 「你啲同事就精，四月頭咁多日紅假，放埋大假即係好長。好似你咁十幾日大假連紅假放，即係成個月唔見人，咁公司無咗你都得啦，裁得。」
- 「如果係去旅行，請十幾日連紅假，都叫無可厚非，上司會哦幾句但都會批。而家疫情無得去旅行，連續放亦唔係必然，『但如果僱員要求』先至有得連放，即係暗示唔好咁多『要求』。疫情下大把人搵工，你老闆大把選擇。」
- 「因為踏住復活節連放，請假時都要預畀人串或鬧下啦！間間公司都係咁，當然也要睇你職位高低與否。」
「正常公司，連請咁多日，係要提早通知。 叫你清假已經畀面你，有啲大公司到咗cut off day，無清就會當無咗，或者變咗錢出畀你就算。 清假代表可以放假，請二、四，或者放半日之類…….如果無安排，一條友可以勁放十日八日，咁呢個人係公司都係可有可無。 」
網民教路點樣清假
雖然網民對樓主的經歷持兩極意見，有人則留言教路，稱就算不能連續請大假，可以透過以下方法將年假清走。
- 「每個星期五放下午，自己嘅工作，星期一返嚟自己做返。」
- 「玩佢，睇下邊日其他人請嘅，就請晒去！」
- 「一個星期放1.5日，2個月都放咗十幾日吧。」
- 「又無旅行去，上司咁講，可同HR交代。你攞兩日算數，有問題你同上司傾，留返通關去旅行。」
- 「如果玩嘢 ，放一、三、五隔日。二、四sick leave囉。」
- 「返1、3、5，放2、4。」
