重溫港人外地「柒出國際」懶人包 仲係咪個別事件?

職場

廣告

重溫港人喺外遊「柒出國際」嘅新聞…

話說三名「港女」喺台灣餐廳偷海鮮,偷完之後仲打算即時毀屍滅跡,偷偷哋喺廁所入面即時開餐,結果被店主當場捉住。

我哋好多人都討厭強國遊客,因為無禮貌、打尖、隨地大小便…

而當我哋向對方開火,對方只會話:「只係一小部分人係咁,其實我哋好有禮貌。你唔可以對我哋有偏見,要不是祖國…香港早就完蛋了!」

咁今次三港女「柒出國際」事件,又係咪個別事件呢?其實已經唔止一次了…

有環保組織大鬧行山客將露營完嘅垃圾棄置山頂,破壞環境。

2015年,超強颱風「杜鵑」逼近台灣,幾名香港勇士挑戰台灣東北部貢寮區龍洞攀岩場,結果被困…

救援人員到場,但港人要求救援過程唔可以掂到水,仲踩住救援人員個身當踏板,獲救後仲鬧救援人員垃圾。

數返幾年前,亦有幾名香港「租霸」,喺台灣租房唔交房租之餘,仲搞到成屋垃圾,廁所周地M巾,大小便…

亦有空中服務員或者Sales,都話除咗強國客,第二難搞就係香港人,少少事就投訴,以為自己畀錢就大晒。的士司機長期拒載,服務態度差…多年嚟一直都無改善。

唔知大家覺唔覺得,近年香港人開始愈來愈無禮貌喇。大家臉上面嘅笑容,「唔該」「唔好意思」都聽得愈來愈少。

係咪真係生活壓力太大,近年社會發生太多事,所以大家都笑唔出?

又係咪真係壓力大,就可以對其他人無禮貌呢?

香港成日都話靠旅遊業撐住經濟,所以大家要包容遊客。但另一方面,旺角得返大媽唱歌跳舞,貴到香港人食唔起嘅魚蛋,廟街已經無晒鑊氣嘅街邊小炒…

香港仲有咩值得外國人嚟觀光?

「喂!都係少數例子啫!香港好多正嘢㗎!的士司機都唔係個個衰人啦!」

無錯嘅,不過大家諗深一層。以前去旅行,我仲可以大大聲咁同人講「I Come From Hong Kong!」

幾年後,去到其他國家,人哋會否一聽見Hong Kong就皺眉呢?

我哋仲有冇機會同人解釋,香港只係少部分人係咁,其實…只係個別事件呢?