【診所職場事|寶豬趣聞】小姐兩邊鼻哥窿尺寸唔同咗|珍寶豬

【診所職場事|寶豬趣聞】小姐兩邊鼻哥窿尺寸唔同咗|珍寶豬

職場

廣告

有日一位女士嚟到診所。

佢嬲爆爆咁樣衝埋嚟登記處:「點做嘢呀你?」
我都唔知發生咩事就硬食一臉屁:「請問咩事呢?」

撰文:珍寶豬funnyclinic)|圖片:電視截圖

「如果你唔搞返正佢,我會直接放棄你哋!」

佢:「你班死白痴唔同我搞返正佢嘅,你唔駛旨意我以後會再嚟呀?」
如果你係指搞返正閣下嘅為人的話,請恕我哋無能為力。
我:「搞返正啲咩呢?」
佢:「我個鼻呀!」
我望望佢個鼻,望望佢個樣,又唔覺有咩問題喎。
我認真問:「你撞親嚟?」
佢:「你個腦就撞親呀!我邊忽似撞親呀?」
我點知你啫,你又話搞返正又話係個鼻,咁唔係撞親就仆親先整到個鼻唔正啫,唔係咩?

我:「咁你係有啲咩事呀?」
佢:「你唔認得我咩?你唔知我係邊個咩?」
醫生,係咪又係你啲fans呀?你自己出嚟應酬佢哋啦好冇呀?
我:「唔好意思呀小姐,我哋日日見咁多人認唔到呀,你如果係要睇醫生嘅我同你登記啦」
佢:「我噚日先嚟睇完咋!我就係睇完個鼻就變到咁呀!」
我:「你個鼻有啲咩事呀?」
佢:「我食完藥打完個乞痴之後兩邊鼻窿入面唔同咗呀!」
即係你本身唔食藥就唔會打乞痴呀?個鼻窿又點唔同法呀?變咗三角形?
我:「Er…唔同咗呀?有啲咩唔同咗呀?」
佢:「兩邊個size唔同咗」
你都係一個幾獨特嘅人,我做咁耐都係第一次遇到有人會度住自己個鼻哥窿尺寸。

我:「你係指兩邊鼻哥窿變咗一大一細咁呀?你俾你個名我呀,我幫你拎返排版出嚟俾醫生睇睇呀」
佢:「如果你唔搞返正佢,你哋真係唔駛旨意我再嚟呀!我會直接放棄你哋!」
你唔好講到好似曾經擁有過我哋咁先得呀,我想打冷震呀~
我:「俾醫生睇咗咩事先啦」
佢:「仲可以有咩事啫?食完藥就變到咁啦我,你哋有問題啦!」
實係因為食藥先搞到咁啦~

延伸閱讀:【診所職場事|寶豬趣聞】想要維他命Sample嘅小姐|珍寶豬

延伸閱讀:【診所職場事|寶豬趣聞】一定要醫生聽電話嘅小姐|珍寶豬

【診所職場事|寶豬趣聞】小姐兩邊鼻哥窿尺寸唔同咗|珍寶豬
圖片:電視截圖