失敗的70後 收入唔多 想$1000月供股票
龔成你好，我係一個失敗的70後，打算開始學人月供股票方法去理財，我見坊間有每月1000元供股，我收入唔多，希望利用這方法，令自己有所謂的經濟基礎，謝謝你回應
龔成老師：
其實，無人是失敗的，每個人都有強項、成功的地方，你發掘這部分就可以了，正面思維，會助你吸引正面事情。
現時開始理財仍可以的，每月供$1000是好開始，但你要找手續費較低的銀行，因為金額較少，手續費佔比相對會較多，所以你要比較下。你可以供盈富（2800），從點滴開始累積財富，慢慢再想方法增加，總之開始左第一步先。(對照龔成信箱Q3065)
問2：
你好，我係90後新手，想學更多投資知識，一直都有留意你
想報你的班，但係每次都係一三上堂，所以我一直都報唔到，因為我逄一三都要上夜晚既堂
而你既書，80後，兩本都已經睇左，想問線上果個課程，宜家睇，仲岩唔岩我？
同埋因為我仲係學生，本唔多，你推既大部份，我都唔係本去供，所以有無咩其他細價股可以留意下？
龔成老師答：
其實我的課堂，有時會開星期六，有時會開二五，你可留意我fb的公布，相信你會夾到時間的。
我的網上課程是講「財務自由」，即是教你由零開始儲錢，如果有效累積財富，運用投資工具，達成財務自由的方法，相信都是適合你的，網上課租與股票班題目不同，股票班是集中教股票的。
好多人本唔多，因此投資細價股，但這是錯誤的做法。我地投資，最重要是買入優質資產，令財富得以長期增值，我地無必要因為要「就個本」，而買入不對的資產，這是有問題的概念。所以，我地應以「優質」行先，入場費是次要。
我寧願你儲多點錢，等本金足夠後，買入較優質的股票。其實，港燈（2638）的入場費只要3千多元，你都可考慮下。(對照龔成信箱Q3059)
問 3：
龔Sir 想問你買優質股既同時，會唔會買埋Put option 以防止就算佢質素依然好 但遇上突發事件可以保住盈利及往後再可以以低於合理價購入？
龔成老師答：
唔會。因為這行為是矛盾的做法。
而我買優質股，是長期持有，中短期股價波動，不用理會，如出現突發事件令股價下跌，對我無損失（因為我不會因短期事而賣），而我會把握這時機而入貨。(對照龔成信箱Q3056)
問4
你好，請問點睇1149？
龔成老師答：
中國安芯（1149）停左牌好耐，比較麻煩，最慘係佢已經無乜野公布，而家只有得個等字。睇翻佢停牌前，股價已大跌，明顯唔係好野，暫時無野做到。就算之後復版，都偏向向下，最好唔好對這股有期望。(對照龔成信箱Q3057)
問 5：
成哥，我想請教你一些意見。我想離開呢份工好耐，呢份工得幾千元，而且做得唔開心。
我想韓國入貨賣衫，只是網上賣，但是也要租房去影相存貨，也唔一定賺錢，但是我想離開呢份工，想做賣衫賣袋，但又怕無錢
咁你說點好？
龔成老師答：
其實可以並行去做的，打工的同時，利用空閒時間，去做小生意，若然小生意能成功，就全職去做。我之前都是一邊打銀行工，一邊做兼職、做小生意、寫專欄、寫書、教投資班，只是到近年才辭職，全職寫書教班。
你可從小做起，入小小貨放上網賣，根本唔洗租房存貨，因為你只需要入小小，試市場，之後才愈做愈大，所有成本就是入貨的成本，根本有限。至於影相，就更加唔洗租房影。
你的問題是，太多野限制住自己，唔好想太多，行動最重要！你成日想這樣唔得那樣唔得，根本事情無你想像般難，你可以由小做起，一步一步上，咁就得架啦。(對照龔成信箱Q3058)
問 6：
你好，請問1848現價入合理嗎？
股票是否有一定質素？
另外，本人有50萬放係股票度，可否建議放應放多少在收息股？
龔成老師答：
中國飛機租賃（1848）質素不錯的，佢過往的生意與盈利都保持增長，而且股本回報率都好高，賺錢能力不錯，有長線投資價值。
加上現時市盈率不高，已反映了行業增長減慢，而及業務潛在風險的因素，所以現價合理。
至於分多少比例在收息股，這個要視乎你的年齡、負擔、個人對風險的承受程度等。一般來說，年輕人會投資較多在增值股，收息股可能只佔3成，年紀大的，就會集中在收息股。(對照龔成信箱Q3068)
問 7：
老師，我想再問?941你點睇？我之前由84睇到佢上89但冇買。之後落返83，我手快快入左。Thank you
龔成老師答：
中移動（0941）回落，只因為之前除淨了股息$3.2，股價自然地調整。中移動現價合理，可長線投資。
佢話晒都是擁有全球最多的移動客戶和全球最大規模的移動通信網絡，客戶總數達8.5億，並保持內地市場領先地位。
但面留意，中移動高增長已過，往後將進入平穩期，加上賺錢能力比過往減弱，股價將呈平穩及略有增長的狀態，而股息亦會平穩。(對照龔成信箱Q3069)
問 8：
你好龔成先生，我想問下，我e家22歲，薪金並唔算高，可以承受較高既風險，想搵下d比較高潛力既增值股，想有咩股可以推介？
另外，我見你話之前月入8千，但儲1萬，係因為做兼職同做小生意，想問下係做咩小生意，希望可以分享下經驗，因為都想試下向被動收入發展
之前都有諗過開網店，但卻唔知點處理貨源所以放棄了，希望龔成先生可以無私咁分享，謝謝
龔成老師答：
如果你想找潛力股，可考慮比亞迪（1211），風險不算高，但有潛力，另外，亦可小注考慮福壽園（1448）、中生製藥（1177），不過現價略高，但就有較大的潛力。
我當時在大陸的批發市場，入了一些精品、玩具，然後在香港黃金海岸賣。現時入貨已很容易，你到淘寶睇下就得，我幾年前，曾上去睇過d手機殼，一個只是$3，要入1000個，雖然我最後無入，但這只是例子，現時上網入貨好易，有d仲好平。
最重要的是，你唔好咁易放棄，小問題一定有，解決一定有方法，這條路唔得，就行另一條！最重要是你肯不斷試！(對照龔成信箱Q3070)
Q3071：
龔成老師，想問一下2280慧聰網，值得中短期持有嗎？
算是潛力股嗎，謝謝
龔成老師：
慧聰網（2280）近年盈利增長好快，但同時市盈率達到30倍，近期這類股都熱炒，相信中短期會不錯（當然，股價亦會較波動，所以我自己不太鼓勵短線投資）。
長期不是沒有投資價值，但理價的確不平，值博率一般，如果小注都可考慮。
Q3072：
你好，我係好多年前在$14買入「102凱升控股」，後來一股變兩股，之後就係咁跌…而家得返$1.1
想問下呢隻股有潛力上返去嗎？
龔成老師：
其實只要分析企業本質，就知答案，不要被買入價影響。
凱升控股（0102）每年的生意額只有幾億，公司好細，再睇一睇財務數據，5年裡有4年蝕錢，賺錢的1年，只賺幾十萬，我不看其他數據，已知這股無投資價值。
另外，公司在5年內，試過供股、1拆2、再1拆2，明顯是玩財技的股票，對小股東不利。除非有大型炒作或其他企業動作發生，否則股價難以上升。
多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。
另外，由於提問人數眾多，見諒無法即日回覆，如果是普通的提問，預起碼要3天以上才能回覆，若然是較複雜的提問，起碼要7天才能回覆，希望各位能諒解。
編按：龔成是於公屋長大的80後青年，畢業後於銀行從事投資相關工作，雖然月薪僅萬多元，但因為理財及投資有道，只花五年時間，於28歲已累積到100萬元資產，目前淨流動資產有數百萬元。著有暢銷書《80後百萬富翁》、《80後2百萬富翁》及《財務自由行》，並出任創富課程導師。
facebook專頁：https://www.facebook.com/80shing
