止蝕好定死揸好？讀者愈跌愈坐 終頂不順沽在最低位大輸60%

撰文：龔成｜圖片：unsplash@Nik Shuliahin

持有數量及成本均價：

0003煤氣10000*$15

2318平保6000*$86

700騰訊500*460

2800盈富10000*28

3067恆科20000*16.2

1628禹州110000*3.3

現時已損失30%以上，尤其禹洲唔知點算。

禹洲係110000(十一萬股)，我大部份都係2018股災前已持有，捱过一波都又一波，越踩越深，現已屆退休之齡，唔知仲等唔等到佢哋翻身！

2） 頂唔順睇住跌，沽清平保同禹洲，竟然係差不多最低位，損失60%，請問其它的如何處理較好？

如果止跌回升，可否再買入？

龔成老師︰

其實你投資最大問題，唔係選股或者定平貴方面。而係你依然放開唔倒，賺差價的心態。一見個價跌，就覺得隻股票出問題，個心就慌。

你要明白我地投資係長線，最主要睇係企業質素，而唔係個股價。因為只要企業有質素，長線股價一定會增長，中短期波動，我地係唔應該太在意，重點要放在企業質素上。

禹洲集團（1628）主要於中國廈門、上海、福州及合肥從事物業開發、物業投資、物業管理以及酒店業務。

佢係新加坡、香港、上海、合肥、福州、廈門等地均設有分支機搆。

整體質素都有，但未算好強，佢在行業中，未算有好大的規模與優勢，另外，負債較高都對這股造成風險。加上業務有點波動，這股唔建議投資太多。

由於近其中央政策，不利房地產行業，故其出現大調整，都係正常。

由於禹洲質素較弱，你減持係可以，但未必一定要全沽。(但沽左就算)

其餘股票，都係有長線投資價值。不過你已在退休之年，持股就應以收息股為主，而你持有股票，大多是增長型，風險偏高。

煤氣(0003)、騰訊(0700)、恒科(3067)雖然都有質素，但我建議你都要慢慢減持，換至一些收息股，去創造現金流，支援你退休生活才算理想。

以下是一些有質素的收息股，你可以參考下，現價都合理，可以分注慢慢入貨。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。