業主遇無品睇樓客彈足1個鐘 入屋無洗手兼擅自開全屋水龍頭、逐隻櫃門打開檢查 網民：應設睇樓費
廣告
業主賣樓放盤，好買家可遇不可求。近日，有網民於討論區內大呻單位放盤，卻遇到無品的睇樓客，對方不但對單位「彈足1個鐘」，又擅自打開屋主的水喉、櫃檢查等，做出一系列無品行徑，令該網民大呼「真係好惡頂」。
撰文：經一編輯部 ｜ 圖片：Unsplash、中新社
賣樓遇「無品」睇樓客 對單位「彈足1個鐘」
日前，有屋主於香港討論區以「遇到西客嚟睇樓」為題開post，大呻遇到無品睇樓客，屋主更列出該無品客3大令人無法接受的行為：
- 「聽到水聲，原來個客開晒全屋啲水龍頭！佢家姐走去浴室企缸開熱水爐、開花灑，淋濕衫籃啲污糟衫。」
- 「逐隻櫃門打開。」
- 「門、窗畀佢開過晒。佢要開窗、開櫃門係ok，但無問過我。係都我開啦。𠵱家疫情嚴重，佢又無洗手！」
除了未經屋主同意，擅自打開櫃門、水喉、窗等，那位無品客更將他的單位「彈足1個鐘」，數出5大缺點。
- 「話我新界地契沒有港島99年」
- 「剛做完大維修，佢話20多年後又要畀多一筆」
- 「話間屋無好似公屋伸出去嘅欄杵掠衫」
- 「要隔離左右街坊好」
- 「同層無人有神枱拜神」
該屋主除了列出睇樓客無品的行為，更形容「佢無心買就唔好嚟將我屋企反轉」。屋主指，疫情嚴重，而該睇樓客入屋前沒有洗手消毒便擅自碰觸櫃門、浴室花灑等，待他離開後，足足花了整個下午將屋企消毒。
網民：應立即加價10萬
屋主貼文一出，不少網民對他的遭遇表示同情，大罵該睇樓客的行為無品。
- 「連基本對人既尊重都無..樓主應該照畀佢睇，睇一次嗌高多10萬！」
- 「做人基本禮貌都要有，問聲屋主『唔該我可唔可以』…之後當面彈三彈四，完全下流X格行為，有品嘅都走咗之後話知你講乜，畀我就即刻唔該你走啦，因為呢啲通常『混吉』。」
- 「呢個係互相尊重問題。你識唔識禮貌，問准主人一聲好難咩？彈東彈西係壓價策略，呢樣我就唔怪佢。」
- 「幾多錢都唔賣啦！點知佢有無新冠肺炎㗎？佢自己都唔知啦！樓主為錢真係命都唔要？」
又有網民表示，換成自己遇到相同情況，會第一時間將該無品客趕走。
- 「遇到呢啲人其實真係唔需要畀面。佢做得出這些不尊重業主的行為，你就應該立即趕走個瘟神，是但搵個藉口趕佢走。」
- 「畀我第一時間趕走佢啦！」
買二手樓前驗樓屬正常？網民：你去shopping都會搞吓人地啲貨！
雖然大部分網民同情屋主的遭遇，有網民卻認為買二手樓前驗樓屬正常，不明屋主為何反應大。
- 「咁都叫西客？唔通要個客唔睇樓唔講價，一個電話就話買，然後馬上去律師樓畀票簽名？唔係話無呢啲客，遇唔到係你運氣唔夠。」
- 「其實你去公司shopping，你都搞吓人哋啲貨啦，你係咪搞過就會買咗佢先？咁啲售貨員出Post話你係西客，你受唔受先？」
不過，樓主回覆表示，他不介意買家將單位檢查清楚，惟介意對方在沒有問過樓主的情況下，將單位「反轉」。
網民建議下次應即場阻止 可設睇樓費、清潔費
看到屋主的貼文後，亦有網民分享過往賣樓的經驗，提醒屋主遇到無品客可如何應對，包括應當場阻止無品客的行徑。
- 「你應該現場即時指出，𠵱家先喺網上呻有咩用？」
- 「如果唔係急住賣，我會即刻叫停佢，唔滿意就返去考慮下啦。感覺唔舒服就要講『唔好！停！』」
- 「其實業主有責任，應該即時出聲，喺業主在場下一齊驗…擅自開埋櫃門點解唔出聲？唔使惡㗎，當場問 agent、買家，唔見咗珠寶手飾邊個負責？」
又有網民認為可以設睇樓費，隔絕這類無品客人。
- 「香港人素質越來越差係常識吧，睇樓遲到，遲到唔預先講聲，見到面唔打招呼，有啲黑口黑面，醒目業主𠵱個時侯應該睇樓收取500元清潔費，這樣可以隔絕『混吉』買家，費事買賣不成中招就唔好啦！賣樓都係求一枱實客，價錢適合幾枱客就能成交！記住業主係大哥，只要價錢適合唔使擔心自己件貨賣唔出！」
- 「每次睇樓收500蚊，我覺得就可以踢走一班無誠意嘅人。」
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
太古城上月最新放盤叫價是多少？
太古城上月最新放盤叫價大約…各區樓市買賣詳情請看。
九龍區有哪些大型屋苑放盤呎價最低？
九龍區不少受歡迎的大型屋苑呎價對比上月都有回落…各區樓市買賣詳情請看。
