老闆不會教你買樓投資 氣氛差才是入市時機
撰文：1%Anthony ｜ 圖片：新傳媒資料室
朋友： 而家唔好買樓呀！
筆者： 點解呢？
朋友： 我老闆話架，經濟前景不明朗，風險會比較高。
筆者： 咁佢有咩建議？
朋友： 佢話…若有能力，自住應該買，投資炒賣就唔好。
筆者： 你同老闆Friend唔Friend？
朋友： 一般啦~~
筆者： 唔怪得啦！
朋友： 你唔係咁睇？
筆者： 梗係唔係啦！入緊貨啦~~
朋友： 你唔驚咩？經濟唔明朗喎！
筆者： 就係唔明朗先有筍嘢執嘛，明朗就唔會劈價啦！
朋友： 又係喎……
而家應唔應該買樓？
好多朋友都想問：「而家應唔應該買樓？」
不同的人，有不同答案！
如果問你問地產代理，通常會說：「梗係應該買啦！而家唔買，遲啲個市升番，買唔到呢啲價！」
最好跟佢抽新樓添啦，哈哈！
如果你問姨媽姑姐，通常會說：「而家跌緊喎！嚟緊可能仲會跌多幾成架，睇定啲先啦！」
但係佢哋自己就未必有買樓經驗！
如果問老闆、前輩，通常會說：「經濟前景唔明朗，如果有能力，自住樓可以買，投資炒賣就唔好啦！」
唔熟我都會咁答，哈哈！
唔少投資者都密密出手
如果熟嘅，當然就唔係咁講！
其實市場上有唔少投資者，最近都密密出擊，悄悄出手，包括筆者與及學員們，都能以低兩、三成的價錢，買到筍盤。
街外人問起，當然會話前景不明朗，風險高啦！
從投資者角度看…
首先，筍盤有限，個個出去爭，自己咪買唔到！
俾你係業主見到咁多人睇樓，你都反價啦！
其次，俾投資意見，很大責任的！
尤其是對方如果係投資新手，責任更大，所謂…如果有足夠能力，自住唔怕買，投資就唔好…
因為自住的用家，不太在乎樓價升跌，就算跌咗，自住嘛、長線持有嘛，都唔會炸型，叫人投資，輸咗點算？！
從老闆、前輩角度看…
首先，佢自己都未必識！其次，就算識，點解要教你呢？
你投資賺到錢，風生水起，對佢有咩好處呢？
如果個個都識得投資賺錢，如果個個都可以好似筆者早期的學員，個個都有幾層樓收租，坐擁千萬資產，還有誰會為他出外打拼呢？
對老闆來說，最理想的情況是買自住樓，若收入提升，就再換間大啲、靚啲嘅自住樓！
永遠都是自住、自住、自住，人生就不斷供樓、供樓、供樓⋯⋯
沒有現金流，因為物業自住不出租；沒有資本增值；
因為物業不會出售，為了供樓每個月就得努力工作，不敢怨言…
教育是培養聽話的打工仔
傳統以來，教育就是要培養聽聽話話的打工仔…
多年前拜讀《富爸爸窮爸爸》就明白到，傳統的教育都沒有教理財知識。
因為社會要培養的不是資本家，而是乖乖的為資本家打工的小市民。
要突破框框，就要靠自己領悟、進修、實踐。
氣氛差是入市時機？
有經驗的投資者，都喜歡在氣氛差的時候出手！
市況淡靜，成交疏落，業主放極都賣唔到，個個睇完都唔還價。
在這種情況下，才有議價空間，才可以劈價。
今次這一浪，其實是一個好機會，上次跌市是2015年底到2016年初，已經是3年前了！
錯過今次機會，可能又要再等3年！
如果你問我：「而家應唔應該買樓？」
問心講：「跌咗咁多唔買，唔通等佢升返上去先買咩？！」
甚至是：「有能力的，不妨買來投資，自住就未必是時候。」
點解相反？！
因為投資的話，你可以靈活控制，資金充足的話，你可以買多啲、買大啲；資金不足就買細啲、買平啲。
自住的話，需要的面積可能要比較大，質素要比較高。
今年會有很多新盤陸續登場，普遍策略都是低開，反而可以睇定啲再作決定，二手唔啱就揀新樓。
太古城上月最新放盤叫價是多少？
太古城上月最新放盤叫價大約…各區樓市買賣詳情請看。
九龍區有哪些大型屋苑放盤呎價最低？
九龍區不少受歡迎的大型屋苑呎價對比上月都有回落…各區樓市買賣詳情請看。
