企業高管被炒魷 欠租、破產、成身「街數」！業主憂追數單位變凶宅：有咩方法趕佢走？
撰文：經一編輯部｜ 圖片：unsplash、連登討論區
租客隱瞞破產欠租多月
誰會料到一心收租歎世界的業主，都會遇上令人心驚膽跳的時刻。最近，網上討論區有收租業主發文求助：「租客已申請破產，佢先生有抑鬱成日想跳樓」。
樓主親自描述目前租客的背景：「之前呢個租客成個幸福少奶奶咁，全職主婦，全家都好幸福咁。」其丈夫則是專業人士，屬於企業高管，樓主理應安心出租。
但好景不常，該對租客過去半年開始欠租，樓主打聽後，得知租客丈夫因為疫情被「炒魷魚」，樓主最初諒解失業之苦：「咁諗住佢都好眉好貌，爭一兩個月就算啦，點知拖拖吓爭左7萬幾蚊。」
雖然樓主可以經電話聯絡租客，亦會回覆短訊，不過其後發現租客欠下很多「街數」，而且已經被申請破產，但並無將情況告知樓主。
憂追債單位變潛在凶宅
雖然該名男租客目前找到工作，但收入大不如前，「佢地繼續逐個月交租，之前欠租仲未還到，我應該點做？」
樓主在言詞間流露擔心：「我有啲驚佢地睇唔開跳樓，但又唔想咁拖住，成日要驚佢地交唔到下個月租。」眼見自資購入的單位不幸成為潛在凶宅，樓主因此發帖請求見指點。
事實上，坊間好租客難求，際了期望租客準時交租，亦要對愛惜單位，才是業主出租單位的著眼點。
樓主在發文中講述親身經歷後，有網民建議樓主經法律途徑，盡快「請走」租客，以免發生不幸事件，影響樓價；亦有人認為，即使租客欠租，樓主仍未積極追討，提醒「你咁好人，分分鐘佢地得寸進尺」。
堅持追數： 個個跳樓威脅咁無人交租啦
- 忍到半年你都幾好，仲有冇多層我都想租
- 最多變凶宅，收返再賣都仲有一半價錢
- 當佢600萬樓 事故單位8折一定走到
- 個個都用跳樓威脅咁無人俾租啦
- 租金是一年性交一次
- 你間屋風水唔好住到人破產
收租講人情：賠錢叫佢搬走，拎返間屋最優先
「如果你都證實佢地真係無錢，我係業主嘅話，當跌咗錢就算，再同佢地講欠租之後先還，等佢地搵地方搬，拎返間屋係最優先。」
- 如果張約就完，咪側側膊話想收返樓自己住
- 兇宅重難搞，價跌無人想買
- 你不如驚迫佢走果陣，佢真係係你度跳仲好啦
- 賠錢比佢，之後叫佢走，咁就唔驚佢跳樓你樓價跌
- 作為業主寧願蝕幾個月租，點都好過凶宅打折
「租到完咗死約就算啦，求其搵個藉口，移民又好，收返層樓再算。」
欠租15日可入稟追討
參考社區法網提供資料，指出租賃協議可能包括一項條款，列明若租客未能依時繳付租金，業主有權沒收有關租賃（即終止租賃並收回物業）。
即使租約並無列明沒收租賃條款，因欠租而沒收租賃權一般亦會根據法律而隱含於租約內。
一般而言，若租客未能在租金到期日15天內繳交租金，業主已有權終止有關租賃及有權取得法庭（包括土地審裁處）的收回管有權命令，以追討該物業的空置管有權（即要以交吉方式收回該物業）。
但當租客是在租期內第一次欠租，只要租客在業主接管物業前，在法庭規定的時間內交付所有欠租及業主的法律費用後續，即可挽回該租賃。這通常被稱為「沒收租賃權的濟助」。
