老seafood

老seafood横行的世代下 我唔要做世上最討厭的人

職場

廣告

我係一個好念舊嘅人(好聽啲叫念舊,難聽啲叫懶),幫襯開嘅鋪頭、用開嘅師傅,可免則免唔會轉。

但因為常光顧的那間髮廊執咗笠,唯有去搵新的髮廊。幸好,香港仍有許多人願意創業,髮廊開完又執,執完又開,我都唔擔心剪唔到頭髮。

剪頭髮,需要人夾人緣,可能喺你眼中係潮流之父,喺我眼中係垃能圾。

話說小妹膽粗粗,衝入一間新開張髮廊博一博,睇下會唔會夾到個新師傅。點知,個師傅好似食咗炸子雞,一開波就開我拖:「嘩,你啲頭髮幾耐無做負離子?!」個樣嫌棄到呢。

好,我忍你。

剪呀剪,唔夠兩分鐘,又嚟料:「你啲頭髮自己剪過嚟?」

我秒秒鐘幾十蚊上落,邊得閒自己剪啊?做得Sales,你唔開口我都知你想點。其實你越係踩我個頭/上一個髮型師,我越唔會覺得你有料到而幫襯你做多啲treatment囉!

好,剪完。我未認真望個髮型,已經被佢鬧:「你前面啲頭髮太蓬啦!啲髮質太差!」OK,係我髮質有問題?

返到屋企,我照鏡,越照越唔對路——李露眉,原來剪短咗成吋!仲惡人先告狀,鬧我啲頭髮有問題!

我認真分析咗好耐,有咩人無論做錯啲咩都鬧咗你先?鬧咗你,就唔使比你鬧?無錯,呢種人就係 老 屎 忽!

在老屎忽橫行的世代,我不停警惕自己,唔好有一日,成為自己最討厭的那種人。就算終有一日,我屎忽老去,仍會保持赤子之心,錯就要認,打就企定。

不過,喺屎忽老去之前,啲頭髮可唔可以快啲長返先?!

#shit啲頭髮幾時先長返