職場制勝 新界 市區 車程 距離 委屈 成長 殘酷 香港人

住新界出市區有幾慘 離屋企遠 同事親戚都要你就|職場制勝

職場

廣告

新界職場制勝】唔知大家身邊有冇啲住新界嘅朋友,根據非正式統計加上個人偏袒因素,佢地好多時都比較不拘小節同平易近人!因為佢地都係委屈中成長,見盡社會最殘酷一面嘅香港人,而且仲明白到咩叫從來沒我份。

撰文:Purple弟弟 |圖片:電視截圖、unsplash

新界出市區有幾慘?

住新界出市區做嘢車程遠,時間長已經係老生常談,有幾慘都唔需要再多講。不過最慘係住新界唯一可以保證預計到時間嘅交通工具只得港鐵(一般情況下),當你搭巴士遲到一兩次之後,上司就會同你講:「搭地鐵啊嘛!」

呢個時候新界人內心已經崩潰,但臉上依然掛住港島區式SALES笑容。內心在咒罵「鬼唔知你啊媽係女人,我巴士平又平過地鐵,如果無塞車或交通意外時間又差唔多,仲要有位坐!我真係搵唔到任何一個要搭地鐵嘅理由。」張口在說著「我會試下㗎啦。」如是者,新界嘅朋友遷就咗佢老細!

離你屋企愈來愈遠

當你因為遲到被訓斥一番之後,返埋位坐低做嘢果陣,你隔離位個Yuki就明知故明咁問:「遲到啊?」、「喺啊,住得遠巴士一塞車就咁!」、「乜啊,住得近先易遲啊,成日覺得好快好快之後就出事!」

嗯,非洲啲人無嘢食都無你豐衣足食咁慘,食得多會撐爆個肚,內臟器官受損而死。「咁今日HAPPY FRIDAY一唔一齊成班同事食餐飯啊!」、「好啊,去邊啊?」呢句說話喺已經做好覺悟嘅新界人先至講得出口,如果當年湯告魯斯套Mission: Impossible嚟香港拍,題材一定係住天水圍嘅你,點約同事收工之後去屯門或者元朗食飯!唔洗問都知班同事一定會因為太遠而拒絕,而呢個星期五嘅晚餐,你只會離你屋企愈來愈遠。

就同事 就親戚 個個都要你就

如是者,新界嘅朋友遷就咗佢同事!同同事食完飯返到屋企嘅你已經疲憊不堪,老媽子遞上熱湯語重心長咁叫你聽日星期六早啲起身,你擘大個口得個窿咁問:「點解?」原來本身約左聽日嚟飲茶嘅親戚有人因為太遠唔方便,所以放飛機,老媽子於是好偉大咁提出咁不如我地過去,齊人啲熱鬧啲。

諗諗下呢班住港島區嘅親戚已經幾年冇嚟,由幾時開始住新界嘅人一定係遷就嘅一方,我真係看唔透。如是者,住新界嘅一家人又遷就咗佢親戚!所以如果你身邊有呢啲新界朋友,要好好珍惜同設身處地,得閒就返佢地一次半次!當你同新界朋友食完晚飯,飲完酒,已經沖好涼準備瞓覺果陣,唔好唔記得果位朋友,依然係天邊嘅一方截緊泥鯭的返屋企。