轉工

諗清楚先好遞信 轉工常犯6個錯誤 | 職場技巧

職場

廣告

年頭呢段時間唔使講都知係轉工熱潮,大家都係拎完年終獎金/雙糧之類就打算功成身退!搵新工/轉行之際,難免會遇上困難,不妨留意下係咪犯咗以下六大錯誤。

撰文:Smart ED編採部 |圖片:新傳媒資料室

轉工常犯6個錯誤

1.唔善用人脈

唔少人搵工都係不停上網搵,將自己份CV漁翁撒網咁大包圍。除咗等候需時之外,上網搵到嘅工作offer未必咁好,所以唔好怕怕羞羞,不妨用盡自己人脈去「拗撈」,俗語有云:識人好過識字,假如你識人又唔運用實在係太浪費了。

2.轉行/轉工過份看重人工

有時轉工人工未必有好加幅,甚至會輕微下滑,但你仔細諗下,對上轉嗰幾份工有幾多份真係因為人工?坊間有唔少調查都顯示,令人想轉工嘅因素最多不外乎係因為工作沉悶、人際關係以及公司風氣所致。有見及此,即使新工人工未如理想,但有好同事、好氛圍、好前景,絕對值得一試。

3.唔做功課就轉行

唔少人因為厭倦自己本身嗰行而選擇轉行,但轉行之前一定要做足功課,否則只會後悔終身。例如要先了解行業前景;行內實際所需技能自己是否配備等等,你都唔想自己一轉行二、三年就比AI取代,記得事前做好資料搜集。

4.意氣用事

人生如戲,有唔少人辭職都係一時之氣!當下開會比怒火摭掩雙眼,拍枱大叫一聲「我唔撈啦」,裸辭先發現搵工唔容易就後悔莫及,要轉工/轉行最好唔好裸辭,因為有研究指出有工係手更易收到offer,咁都合理嘅,有工係手hr都覺得你唔急同埋應該有能力,有bargaining power,所以唔好為啖氣做錯決定。

5.CV唔更新

畢業果份CV用足十年點得?除咗要加返呢幾年工作上嘅成就之外,轉行更加要由頭執過!畢竟唔同行業所需人格特質同技能都唔同,切忌一份CV走天下。

6.草率

大家一定要先認清問題所在先作決定,如果你係厭倦呢間公司而非行業,你要做嘅係轉工,反之就係轉行。

延伸閱讀:

靚女靚仔係唔係必要? 空姐入職Q&A