做咗同事十年 請飲都唔去「你搞清楚 同事唔等於朋友」 | 網民熱話

熱話

【同事・網民熱話】有冇試過有同事俾「紅色炸彈」你,因為日日都見,唔好意思唔去而勉強去飲?近日有網民提到自己俾帖一位一起工作咗十年嘅同事,呢位同事最唔去飲兼冇做人情。樓主不岔,認為該同事極為冷血,大家對呢件事又有咩睇法?

撰文:麗爾|圖片:unsplash、電視截圖

樓主:

有個合作同事十年,請飲都唔去
其他人都出口,識左十年交淡如水
人情又唔做
這個人受人恩惠當應份
真係冷血
職場無情係呢類老屎忽做成

被請者未必想去

唔少人覺得被唔熟嘅人請飲都好似俾人「割咗忽肉」咁。有得逃避紅色炸彈,慳返一千蚊當然最好啦。

而講到識咗十年都唔飲樓主嗰餐,網民持唔同意見。有人問樓主點解識咗該同事十年,仲唔清楚佢為人。亦提到除非樓主同同事FD到做到朋友,否則同事的確冇責任去幫你夾錢擺酒。

「請飲即係請人地飲食,講明請!佢唔去即係唔想你破費,而且你請喎,做乜要佢做人情?」

「老實講,出帖前有無問咗同事先?人地唔係必定會去」

同事唔等如朋友

有網民表示「而家做同事 又唔係朋友 你唔會咁搞笑丫嘛」。認為所謂嘅「請飲」,根本就係叫人夾錢俾樓主開party。「 做咗十年同事就應份夾錢比你開party?」

「人地還要用一晚時間被逼看你班唔識既人自我感覺良好,又要比錢。真係唔係深既交情做唔到囉」

反問樓主為乜請飲、與該同事交情又如何?因為識咗十年所以要飲你嗰餐,人地唔想嘅話,反轉嚟認其實係佔緊人便宜。有機會該位同事唔去,只係因為唔鍾意出席呢啲活動,可能因為要養家生活,無閒錢嚟。

網民意見:「做同事請飲一定要去???

僱員合約根本冇一個條例寫明一定要去?????
好老實講依家人情真係好X貴下下都係800-1000蚊食一晚,
可能你同事依排手緊想慳錢姐……….. 」

同事唔係同你有親

企喺該同事立場,做咗十年同事,應該好清楚大家為人。「平時沒關照,忽然請飲,有乜好带協。」形容俾封炸彈嚟作人情,職場利益行頭真令人心淡!「返工係搵錢 唔一定要比人搵錢」

網民支持唔想去就唔應該去,認為「君子之交淡如水,唔去咪唔去,唔洗諗太多,同事唔一定係朋友」,勸樓主都係投放心機喺自己個婚禮。

同事並非同你有親,樓主應檢討吓自己,隨時可能得罪咗人仲未知。如果係十年交情,樓主更加唔應該整封炸彈人地嘆,要設身處地為其他人諗下。

時間多久,不代表感情深厚。對住10年,人家可能已經覺得好痛苦,平日只是以禮相待。

「而家香港乜野都貴,人地生活可能都猛猛緊,人地仲要貼成千蚊出黎,花成晚時間,就係為左夾錢去睇你地開party做show? 」

「可想而知樓主為人唔係好受歡迎啫!」「樓豬睇錢睇得好緊要」

唔去係好正常

網民提到「有類人係所有飲宴都唔去,如果係呢類人你都照比帖仲要投訴,唔好同人講話做咗10年同事。如果個同事個個飲宴都去,唯獨是你個唔去又唔做人情,你應該諗吓自己同人地實際關係如何?」

表示人係係互動嘅。「你睇人衰,人哋眼中你更衰。」

網民亦提出有啲人識咗幾個月,都比面去飲; 有啲識咗幾年都唔去。有類似經驗者表示最憎啲人係唔係都俾帖。「之前有個同事,根據都唔同樓層,做咗幾個月真係講嘢都無十句,之後走埋,後來結婚都send張帖黎,真係你老板丫!」

有人覺得樓主同事唔去係好正常,因為牽涉到錢。「今時今日人情幾貴呀.去到$人地會同你計:我同你只係同事咋.不是朋友!!!!」

「所以每次見親呢D唔識做嘅人,我就當跌三百算了,唔會出席。」

「其實結婚呢d野真係夾錢做show,相信除左當時人之外,無乜人會真心enjoy 去飲,無返咁上下交請的話人地真係無責任同你夾錢開party,又要出錢又要出時間,所以最好唔好炸人啦。」

有相反經驗被人呃咗話會參加婚禮,但到最後只回WhatsApp話黎唔到 ,下次食飯。「當然我結完都一年,冇X搵過我囉!人情冇唔緊要 我要蝕埋張餅card佢 呢d算唔算仆X?」