我住過灣仔深水埗旺角將軍澳 都係覺得將軍澳最好住 | 網民熱話

【將軍澳・網民熱話香港人成世人捱生捱死為咗咩?咪為咗一層樓囉。啲樓俾人炒貴晒,真係就快要瞓街都似。唔知大家有冇留意單新聞,將軍澳一個大型屋苑600幾呎單位一劏五,全部租出,每月淨袋4皮幾,相比單獨租出,每月租金只收兩萬幾,相差成倍。唔知咁做係咪犯法啦,但不覊就覺得咁做好無良囉。

撰文:不覊 | 圖片:unsplash、新傳媒資料室

將軍澳樓好值租

講開將軍澳,佢近科大,都唔少師生租將軍澳樓住,所以都幾多人租。

查實,我個人覺得,將軍澳真係幾好住。

我知一定有反對派話咩將軍澳又潮濕又多樓,但問心嗰句,我都仍然係覺得將軍澳好好住。

咁多年來,我曾經住過灣仔、深水埗、旺角同將軍澳,同啲旺區比,將軍澳真係唔算多人。

而且旺區好多都係舊樓,又或者係因為我窮鬼一個,住唔起新樓靚樓啦,住親都係啲幾十年唐樓,行樓梯真正行到傻,加上品流複雜,真係唔係幾盞。

反而將軍澳多新樓,唔好講工業區嗰邊啦,住宅區嗰邊其實真係環境幾唔錯。

好多隱世小店

得閒我會去單車徑行吓,區內仲有個單車公園喎,好多運動康樂設施任你玩,收費又夠平。

仲有,雖然將軍澳大型商場係好多,連鎖飲食集團都超多,但其實區內仲有好多所謂隱世小店,好以坑口村、田下灣村咁,就有好幾間特色小菜同西餐廳。

寶林富麗花園樓下間茶記又夠正啦。好似三姐、LARDOS同星匯扒房,我都好鬼鍾意去。

遇著無所事事想行開吓,坐程小巴一轉就入到香港人的後花園西貢,行吓海邊食吓海鮮,真係好鬼正。

查實,做香港人,仲有乜得選擇,但求有個竇口,有兩餐安落茶飯,就已經心滿意足。