我係住劏房嘅毒男   你教我點敢結婚生仔?

我係住劏房嘅毒男 你教我點敢結婚生仔?

香港地寸金尺土呢句真係無講錯,有地畀高爾夫球場,無地起公屋,就算有公屋都係畀新移民住晒,咁好似我呢啲無父幹又搵得唔多嘅香港仔點算呀?

由細到大住天水圍,同屋企人關係又唔好,所以讀完書一出嚟返工就搬出去住。喺大埔返工,以前喺唐樓租一房一廳400呎,要4千幾蚊,不過月入1萬幾,都叫負擔得到。但係依家4千蚊只係租到一個床位咋!依舊係唐樓一房無廳350呎,租金已經加到接近1萬蚊!人工無三級跳,但樓價租金就起碼翻一倍。

唔似一個家
租唔起就惟有轉租劏房,大至百幾呎,小至60呎都有,唔好以為劏房租金就好平,都要4、5千蚊一個月。最諷刺係唔係無錢嘅人先要住劏房,就算你有錢買樓或者租私樓,依家都係得百幾二百呎。明明住屋係最基本需要,點解香港人就要屈係狹小嘅空間,完全稱不上「家」。

唔敢買嘢
有時買一樣野、一件衫都要考慮好耐好耐,真係好想要先買,唔係因為貴,而係真係無位擺。百幾呎啫係一個車位多啲,放得張床,好多野都放唔落,惟有好多野都喺張床上面做,例如睇電視、食飯,豆腐膶咁大嘅廚房,再加豆腐膶咁大嘅廁所加花灑,想轉身都轉唔到。

唔敢結婚
我唔係唔想拍拖結婚生仔,而係喺咁嘅住屋環境之下,我真係無辦法畀到幸福我嘅另一半。之前有拍過幾次拖,話就話好多港女都肯一齊捱麥記,但當佢地上過我住嘅地方睇過,我同佢嘅關係好快就不了了之。我唔怪佢地,因為由細到大畀父母當掌上明珠咁看待,有咩理由要跟我住劏房。就算佢肯,佢父母都唔會容許。

依家仲有啲屋企要男方買咗樓先結婚,我真係一世都唔洗旨意。依家租金係咁升,每月租屋加洗費已經一蚊都無淨,想買樓?難過登天。