身邊個個都申請公屋抽居屋 00後呻：咁後生已經「唔諗買私樓」好悲哀

撰文：經一編輯部｜ 圖片：香港討論區、Unsplash

樓主：00後係咪已經買私樓冇望？

近日，有網文以「身邊個個都申請公屋抽居屋，我呢一代（00後）係咪已經買私樓冇望…?」為題，在香港討論區發文，表示「宜家先知身邊好多朋友同學申請咗公屋，原來係為咗用綠表抽居屋，問返佢地點解想買居屋，原來都係因為覺得冇可能買到私樓，就算抽唔到居屋，都終有一日會等公屋。」

樓主又指，「真係覺得我呢一代好悲哀，悲哀係在於諗法，仲咁後生就已經唔諗買私樓，一早只想抽居屋或終有一日等到公屋。」

網民：邊個年代20歲係好易買樓？

帖文一出，網民多數不同意樓主的想法，其中一派網民認為，無論任何年代買樓都是難，20歲就埋怨自己買不到樓好難搞：

• 「邊個年代20歲係好易買樓？」
• 「乜六十後七十後當年，有人發夢會21歲可以買私樓咩！」
• 「我外父以前喺荃灣買樓 ，700尺，5 萬蚊，做地盤都係4-5蚊一日；我30年前買樓，450尺，70萬， 人工6000一個月」

「以前普通人買樓，好多都係差唔多嘅公式，畢業、打工、儲錢、結婚同時租樓搬出、兩公婆一齊儲錢、買樓、一齊死供爛供，依家部份後生係以自己一畢業人工，就去怨買唔到樓，中間辛苦儲錢同慳錢嘅步驟跳晒，好難搞架啵 !」

網民：買樓唔係想像中咁難

此外，有一批網民認為其實買樓沒有想像中困難，但年輕人要威要買新樓，又不想放棄每年換電話同去旅行，所以才會覺得好難：

• 「自己供唔掂咪搵老婆一齊供囉。」
• 「兩公婆每人月入2萬，洗1萬儲1萬，1年都24萬啦師父。」
• 「嘉湖大把貨，定係後生仔要威要買新樓。」

「要買樓，首先你自問可唔可以放棄每年換電話同去旅行，節衣縮食唔亂買野？如果可以的話已經係一個好開始。」

網民：一定要買到樓先叫有大志？

另外，亦有網民反問為何一定要買到樓才算有大志，如果是住屋需要，公屋、居屋和私樓分別不大：

• 「有乜問題？居屋=星加坡組屋」
• 「如果攞嚟住，私樓同居屋有乜分別？」
• 「乜一定要買到樓先叫有大志？有地方住咪得囉，公屋私樓都一樣，你話豪宅就有分別姐」

「宜家d公屋靚過80年代果d好多，很多都另人眼前一亮，環境配套絕對好過殘舊私人屋苑。如果抽到市區如西九果d，就真係恭喜晒喇，好過住私樓，大把人羨慕你。新私樓管理費承惠每呎4蚊，豪宅2千呎管理費過萬，維修除時掩你幾萬，唔係買到就一定住的很開心。」

網民：居屋係為財富增值

亦有心水清的網民表示，現今世代好多人抽居屋是部署財富增值，更指住幾年居屋，放盤賺錢就追到私樓：

• 「呢代好多抽居屋係為左財富增值，唔係為住。」
• 「抽到居屋住幾年放盤賺錢咪追到私樓囉，係一個好方法。重要係先擁有資產先啦。」
• 「夠18歲就應該去申請公屋，綠表在手，基本上等如送左2-3百萬俾你洗，幾多居屋3-4年升1倍，業主袋2-3百萬，之後買私樓。」

大家又有什麼想法？

延伸閱讀：【獨家相片】居屋天降30cm大型石屎 晾衫架救一命 女住戶：成條手臂咁長 差啲揼死人！

延伸閱讀：【居屋揀樓2020懶人包】新居屋5月揀樓日 4大注意事項 附攪珠結果、揀樓程序