分享至
    【診所職場事|寶豬趣聞】自備儀器做大腸鏡嘅女士|珍寶豬

    【診所職場事|寶豬趣聞】自備儀器做大腸鏡嘅女士|珍寶豬

    有日一位女士嚟到診所。
    佢登記時同我:「我做埋大腸鏡OK呀嘛?」

    我:「呢個要轉介你去做嘅,一陣同醫生講就可以」
    佢:「我而家做都得喎」
    我:「我哋診所冇得做呀」
    佢:「冇工具儀器呀?」
    我:「係呀。而且你做腸鏡之後都要飲咗嘢清咗腸先嘅,都係要轉介你去做」
    佢:「我自己有帶工具嚟呀,一陣做埋啦」

    撰文:珍寶豬funnyclinic)|圖片:電視截圖

    女士自備儀器做大腸鏡

    吓?我見你個人嚟得好輕鬆吓喎,你收埋啲儀器喺邊呀?
    我:「你自己帶咗嚟?喺邊呀?」
    佢喺手袋入面拎出一盒嘢:「呢個」
    我:「呢個咩嚟㗎?」
    佢邊拉開盒嘅拉鏈邊講:「內窺鏡囉」
    …嗯,我見到嘅係一枝圓身筆形嘅嘢,再有條線加個USB插頭咁嘅。

    我:「…做大腸鏡應該唔係用呢啲啦,我哋都唔會用呢樣嚟幫你做㗎,一陣入
    醫生房等醫生同你講呀,你收返埋盒嘢先呀」
    佢拎起枝筆形物體,伸向自己籮柚:「就咁擺入去睇喎」
    我:「呢個唔到我哋呢啲普通科診所做嘅,你放返好佢先啦」
    佢手部重覆郁動:「放入去囉?」
    我係叫你放返入個盒呀,唔係放入你屁股呀!
    我:「放返喺盒度…你一陣入醫生房同醫生傾啦」
    佢望住枝筆形物體似乎好失望:「呢枝咪鏡囉,你唔而家同我做嘅話,我唔睇㗎啦」
    係就係鏡…不過呢啲鏡用嚟睇鼻哥窿都應該OK嘅,放入腸就應該幾刮吓…
    我:「一係一陣入房你再同醫生講啦~好冇?」

    最後佢堅持要用自購嗰枝鏡嚟做大腸鏡,醫生叫咗佢走…

    大腸鏡 醫生 珍寶豬
    圖片:電視截圖

    延伸閱讀:想要「過時」病假紙嘅先生|珍寶豬

    延伸閱讀:鍾意聞臭腳嘅先生|珍寶豬