診所職場事 寶豬趣聞 兩性期望
撰文：珍寶豬 ｜圖片：電視截圖
我：「呢科我哋唔做㗎～」
佢：「你知唔知邊度有得做呀？」
我：「呢啲應該去整形外科啊」
佢：「貴唔貴㗎？」
我：「一定唔平㗎啦，唔係幾百蚊就得嘅事～」
佢：「你知唔知大概幾錢呀？」
我：「割個雙眼皮都萬萬聲嘅…」
佢：「吓？咁貴？我冇咁多錢喎！點算呀？今次死梗啦」
我純粹八卦：「點解會死呀？我又唔覺得你個樣有咩問題喎…」
佢：「我原本都覺得自己冇問題，係我男朋友話我又肥又醜…叫我去整」
痴線，係睇樣嘅就當初唔好一齊啦，一齊咗之後先嫌三嫌四，搏打咩？
我：「…嗯，我唔知我咁講你啱唔啱聽，不過我都係覺得整容嘅嘢，唔好為人而整，你自己本身想整就冇問題，如果你本身係唔想嘅，就唔好為咗討好人而去做。你明唔明呀？」
佢：「我都明…不過佢成日拎其他女仔相出嚟講呢樣講嗰樣…又話個胸至少要有F…」
大家姐行出嚟問：「你條仔幾吋長呀？直徑幾多呀？」
喂喂喂喂喂！問呢啲做咩呀？
小姐被殺個措手不及，唔識俾反應：「吓？」
大家姐問：「佢要你F呀嘛，佢有冇廿吋長呀？」
20吋，1吋2.54CM，即係50.8CM…好恐怖喎？
小姐：「…冇呀，佢邊有咁長…」
大家姐：「咪係囉！你叫佢變咗廿吋先好講F啦！廿吋都冇！唔好做人啦佢！」
咁全世界應該死剩晒班女人了。
小姐：「ER…ER…ER…好…唔該姑娘」
小姐離開後，我問大家姐：「你見過男人有廿吋長咩？」
大家姐：「冇呀，廿吋係幾多呀？」
暈。
【診所職場事】先生的上司 上＋下回
有日一位先生嚟到～佢行埋嚟登記處同我講：「你哋算係點呀？」
撰文：珍寶豬 ｜圖片：電視截圖
我：「咩事呀先生～」
佢：「我噚日嚟睇過㗎！」
我：「係～咁有啲咩事？」
佢：「我今朝交咗張假紙上去，佢哋頭先收工前同我講，懷疑我張假紙係假呀！」
我：「吓？」
佢：「而家又要我嚟多轉，算係點呀？」
我：「你俾張假紙我睇先啦～同埋俾埋你覆診卡號碼我呀」
我睇睇排版，的確係噚日寫嘅病假紙嚟喎…
我：「張病假紙冇問題呀～佢哋有冇同你講邊度覺得有問題呀？」
佢指住診斷一項：「呢度呀！」
我：「URTI上呼吸道感染？有咩問題呀？」
佢：「佢哋話打過嚟問你㗎！」
我回想…今日食晏前的確有人打過嚟問～
電話響起。
我：「你好，乜乜診所」
佢：「我係上司」
邊個上司呀？我阿頭坐咗喺房喎！
我：「請問係邊位呀？」
佢：「我打嚟係要查詢我其中一名下屬嘅病情」
我：「啊？如果你想問關於病人嘅嘢，你要由病人授權咗先啊，可以用書面方式問。我哋唔可以喺電話同其他人透露關於病人嘅嘢啊。」
佢：「我唔問關於佢嘅嘢，淨係問你咩叫URTI！」
我：「上呼吸道感染」
佢：「佢有冇發燒呀？」
我：「我唔可以答病人嘅病情」
佢：「咁個上呼吸道感染有冇發燒呀？」
我：「上呼吸道感染有分好多種，每人反應都唔同，我答你唔到呀小姐」
佢：「咁個上呼吸道感染係咪要放假呀？」
我：「有病嘅最好多休息」
佢：「咁你寫咗幾多日假紙俾我個下屬呀」
我：「關於病人嘅嘢，我真係唔可以答㗎小姐，你手上如果係拎住張病假紙嘅，其實上面已經寫得好清楚。」
佢：「咁個上呼吸道感染要放幾多日假呀？」
我：「其實你咁不停轉位問都係冇咩意思嘅…」
佢：「問你咩都唔知唔答，你唔好答啦！」
嘟。
先生你所講嘅『佢哋話打過嚟問你㗎』應該係呢單啦？
上回講到先生話上司打過嚟問關於佢嘅嘢～但基於病人私隱條例，我哋係唔可以向第三者答關於病人嘅任何問題。而且電話內，你話你係劉德華都得啦～
撰文：珍寶豬 ｜圖片：電視截圖
我同先生講：「啊？今日係有人打過電話嚟問關於病假紙上嘅問題嘅～」
佢：「係呀！你做咩唔答佢呀？」
我：「因為呢啲係先生你嘅私隱，我唔會隨便喺電話度同其他人講呀～」
佢：「我唔需要咩私隱呀！」
我：「你唔需要我唔知㗎嘛」
佢：「我個樣似係咁保守嗰啲咩？我唔需要咁秘密呀！」
咁你不如話埋銀行密碼俾我知呀，咁你就真係夠開放啦～YEAH～
我：「私隱嘅嘢又唔關保唔保守事嘅…係用嚟保障返你哋啲個人資料同私隱啫」
佢：「我唔駛你做埋啲懶好心懶秘密嘅嘢㗎啦！我唔該你啦！」
我：「咁我而家有咩幫到你？」
佢遞出一張卡片：「你同我打電話去呢度」
我：「做咩呢？」
佢：「你打去耍個冧，同我氹返掂我上司！」
我：「點解我要打去講對唔住呢？」
佢：「係你今朝得罪咗個女人㗎嘛！」
我：「我都係做份內事啫？佢如果係HR嘅，佢應該知道咩係私隱㗎？佢可以上網查吓咩叫病人私隱呀～而且我同佢講過可以由你授權再以書面方式問啊。電話入面我連佢係代表咩公司都唔知～」
佢：「佢會講道理嘅就唔係女人啦！」
咁你又講得好有道理。
我：「如果你要我而家打電話去同佢講返你張病假紙係真嘅，冇問題」
佢：「加句誠懇啲嘅對唔住得唔得呀？」
加戲加對白位位五舊好冇？
我：「我只可以做到打電話同佢講返張病假紙係由我哋診所發出～」
佢：「打呀打呀打呀！」
電話接通。
我：「喂？小姐你好，我哋係乜乜診所嘅，Ｘ先生親自嚟到診所希望我哋可以打返俾你講關於佢張病假紙嘅問題，佢嗰張病假紙係由我哋診所發出嘅。」
小姐：「你是但搵個女人打嚟就當係姑娘呀！」
嘟。
先生焦急問我：「點呀？」
我重覆返小姐嘅最後一句：「佢話『你是但搵個女人打嚟就當係姑娘呀！』，之後就CUT咗我線」
佢：「死得啦！今舖真係死得人多啦！我仲可以點證明我真係嚟睇過醫生呀？」
我：「一係寫埋張到診紙俾你啦～」
佢：「真係死得啦死得啦死得啦」
我：「寫埋俾你先啦…」
佢：「死得啦死得啦死得啦，個女人變態㗎」
返工遇著變態同咩都懷疑嘅阿頭，又真係好慘嘅…
【診所職場事】媽媽癲咗 上＋下集
有日一位太太嚟到。
佢都未入晒個門口就大聲叫：「我個仔喺出面呀！」
我以為有啲咩事，就即刻彈起身：「做咩呀？暈咗呀？」
佢：「行緊嚟呀」
哦。即係好似古時皇帝咁，總會有人大嗌『皇～上～駕～到～』。
我安靜地坐返低。
佢行埋嚟：「我個仔就嚟到㗎啦」
我：「有冇帶身分證明文件？」
佢：「細路嚟咋喎」
我：「冇帶唔緊要，學生手冊都OK，如果都冇就你寫返佢啲資料俾我啦～」
佢拎出手冊：「我要寫封信喎」
我邊登記邊問：「寫咩信啊？轉介？」
佢：「你可唔可以望住我講嘢呀？」
我停止登記，用雙眼感動佢：「係～寫咩信呀？轉介呀？轉介去邊呀？」
佢：「你咁樣知唔知好冇禮貌？我係客人嚟㗎，你喺度做㗎。」
嗯，所以我停晒所有工作，喺度陪你傾計啦。
我：「請問小姐你要寫咩信呀？」
佢：「學校話我個仔發燒，話而家係咩流感高峰期，叫我帶佢睇醫生。」
我：「哦？係呀？咁我繼續登記㗎啦」
佢：「只不過我覺得冇需要囉，你寫封信證明佢冇事，學佢就一定要照返㗎啦」
我：「明白～一陣睇咗醫生先。如果佢真係冇事冇燒嘅，可以寫嘅。」
佢：「佢係有燒㗎喎。」
…..咁你即係要我哋造假呀？
我：「有燒嘅話，我哋寫唔到㗎，話時話，你頭先話個小朋友行緊嚟，咁耐嘅？佢唔舒服有冇大人陪佢行嚟㗎？」
佢：「唔駛理佢，你寫咗封信俾我先，我轉頭就要同佢返去學校㗎啦，我有俾書簿費㗎，邊可以郁啲就話接返佢走㗎」
上回講到太太想個仔即刻可以返得學，要我哋寫封證明佢冇事。
我：「要睇完醫生證明佢真係冇事先可以寫嘅～如果有唔舒服有燒，最好留喺屋企休息啦，返學好易傳染俾其他人㗎」
佢：「佢傳俾人咪好囉」
我：「…..」
佢行出門口大嗌：「行到嚟未呀？扮咩死呀又？」
佢對住我又大嗌：「登記好未呀？」
佢再行返埋嚟：「寫封信幾錢呀？」
我：「我哋診金連藥就係三百蚊，如果寫一封信，我哋係唔需要額外加錢嘅，不過當然要醫生認為係有需要寫先會寫。」
佢：「三百？」
我：「嗯，係呀」
佢：「駛唔駛咁貴呀？我唔要藥，唔要醫生睇我個仔都得㗎喎！」
唔睇醫生嘅，你不如叫隔離生果舖睇你個仔呀？
我：「嚟得診所嘅，就個個都係睇醫生嘅…咁診金係一定有。」
佢抬頭向天搖幾搖，再望住我講：「真係人都癲」
你一早癲咗啦，你唔係唔知呀嘛？好明顯吓喎。
佢：「咁嗰三百你袋幾多呀？你分到幾多呀？」
我：「吓？」
佢：「你嗰份我唔俾㗎啦，因為你乞我憎。」
我：「我哋唔係咁計嘅…你睇咗醫生先啦，都要小朋友冇燒冇病先可以寫到信證明佢返得學嘅。如果係會傳染人嘅，就留喺屋企抖下啦！」
佢：「我都廢事同你講啦，個個傳染人都要留喺屋企嘅話，啲愛滋佬唔會周街走啦，你哋唔寫就算啦，我唔求人㗎，我都有尊嚴㗎！」
愛滋呢，就唔會透過空氣同飛沫傳染嘅…而且唔該你唔好下下乜佬物佬咁難聽。
