風水

風水搵樓|裝修師傅親歷「風水屋」威力:呢啲屋苑特別多家庭傷亡!

裝修設計

廣告

新盤選擇眾多,亦有不少買家四出尋找二手筍盤。每當搵樓時,準買家都會考慮單位價格、座向、景觀,並且「想像」入住後感覺,因此不時心大心細,期望揀到跟自己「Perfect match」的安樂窩。事實上,有買家喜歡鑽研風水命理,努力物色有利家居風水的居所,祈求換個環境改變好健康、事業和財運。

風水
(圖片來源:中新社)

五門歸心=五鬼拍門?

近日,網上討論區有網民表示「做咗裝修咁多年,單位風水真係唔到我唔信」,樓主從事裝修行業多年,見盡不少奇則單位,有住戶搬屋後生活出現劇變,自己進入個別單位更會「周身唔聚財」。

樓主憶述,以往不少客人搬屋後會經歷生意失敗、身體有毛病或者性情大變,更指「有啲屋苑係特別多人死老公」,無獨有偶都是單親家庭。

對風水有興趣的網民問及「將廚廁對調係單純喜歡,定係因為風水?」,樓主憑其經驗解釋,廚廁對調會將洗衣機獨立去拉遠,中間經過鋅盆、洗手盆,洗衣機去水很容易回流,隔氣去水不順暢,嚴重更會「谷爆喉」。

萬一樓上單位廁所漏水,隨時「飯都無得煮」,又提醒不要亂改公屋單位:「屋宇署有機會叫你還原。」

風水 有網民從事裝修行業多年,見盡不少奇則單位,住戶搬屋後生活出現劇變。
有網民從事裝修行業多年,見盡不少奇則單位,住戶搬屋後生活出現劇變。(圖片來源:連登討論區截圖)

有網民表示「『五門歸心』好難擺傢俬,想將廚房改開放式」,樓主認為,爐頭是財位,如果一開門見到爐頭會散財,更引起網民對單位間隔的看法:

  • 「五門歸心,廚房係中間有問題?」
  • 「而家好興整嘅閣樓同地台櫃,好唔聚財!」
  • 「做設計果班完全唔理技術野。」
  • 「單位明明新裝修都特別易殘,都係有問題。」
  • 「假天花有濕氣對衞生健康唔好。」
  • 「眼鏡房無屏風,出門前最好閂房門,可以擋一擋!」
  • 「試過去朋友間屋幾粒鐘feel到唔係咁舒服,頭又有少少痛。」

提防公路「聲煞」

除了單位內在因素可能影響生活體驗,有網民提到,屋企對正高速公路會「有聲煞」,對住戶可能構成健康影響:

  • 「通常一入屋你就知有聲煞!」
  • 「超近距離對住F1跑道,近巴士站,個單位格局係有問題。」
  • 「我剩係科學角度知道汽車多懸浮粒子。」
  • 「鑽石山居屋對正條F1跑道。」
  • 「唔駛睇風水都知賺梗!」

「如果你嘅視線係見到啲車,個感覺就好似時時刻刻都有車撞埋嚟咁,潛意識已經唔舒服、精神緊張。」

風水
(圖片來源:中新社)

有人專買墳景樓

期間,不少網民繼續提出其他風水疑問,當中不少人比較關心居住環境對家庭和健康的潛在影響,坦言以後買樓要請驗樓師和風水師:

  • 深井風水係咪好差?
  • 唔少外國人住豪宅區,港島風水差極有限
  • 住水塘附近咁唔通好正?
  • 今年西南好風水
  • 主人房望山景,見到有墳墓,有無影響?
  • 有人專買墳景樓,寓意升官發財
  • 凶宅係咪陰風陣陣?

「以前試過帶阿女睇樓,結果試過去到一間屋,一出升降機已經狂喊,喊到七彩。佢連屋外面條走廊都唔肯行。」

有錢人比窮人更迷信

不少意見認為,一般人與其靠風水改善生活,不如相信「一命二運三風水」,很多人命運早已註定,不必執著風水對自身的影響:

  • 做生意就可以講風水
  • 有錢人比窮人更迷信風水
  • 仲信幾千年前無根無據嘅嘢
  • 外國人無風水屋點發達

「見過室內擺好大座流水擺設,有啲水聲咁好治癒,一眼睇到已經好舒服。」

風水聽得多變常識

隨著討論逐漸激烈,有網民表示,愈早信風水,就可以愈早趨吉避凶,因而引來偏信科學理據的網民反駁,並且提醒大家風水只是生活的其中一種輔助:

  • 風水屋只是Debug(除去)單位將來有機會令戶主頭暈身痛的因素
  • 其實係環境心理學
  • 其實係個人自己形住風水有問題,做乜都疑神疑鬼
  • 風水係心理作用,個人會有信心
  • 背山面海無噪音、無廢氣,聽得多變咗做常識

免責聲明:本專頁刊載的所有投資分析技巧,只可作參考用途。市場瞬息萬變,讀者在作出投資決定前理應審慎,並主動掌握市場最新狀況。若不幸招致任何損失,概與本刊及相關作者無關。而本集團旗下網站或社交平台的網誌內容及觀點,僅屬筆者個人意見,與新傳媒立場無關。本集團旗下網站對因上述人士張貼之資訊內容所帶來之損失或損害概不負責。

圖片來源:中新社、連登討論區截圖