上車 買樓 香港 消費 網民熱話

90後無父幹成功上車實錄 「就算大西北都好 上咗車先」|網民熱話

社會熱話

廣告

【上車・網民熱話】現時香港樓價咁癲,唔通買樓真係要靠「成功嘅父母」?有90後自小公屋長大嘅網民,分享咗由自己14年畢業,到今年年初終於成功上車嘅心路歷程,到底係有咩秘訣?

撰文:Smart ED編輯部|圖片:香港討論區、電視截圖、unsplash

90後嘅樓主自稱無父幹兼自小住公屋,2014年畢業時已開始留意樓市,諗買邊區同埋大概嘅budget。一直諗住都係9成上樓,預首期連雜費55-60萬左右。2017年尾睇屯門豫豐花園最細單位,成交價只需390萬左右,到2018年中個價升到500萬。

2018年尾終於儲夠心中嘅首期就開始搵樓,當時樓市正值穩定期/調整期。當時心儀嘅屋苑係屯門豫豐花園、豐景園,大興花園等等。

樓主第一次真正去睇樓係今年1月,豐景園,睇嘅全部都係最細嘅單位,最平無裝修既單位都要418/428萬,有裝修加多20萬。豐景園都接近30年樓齡,屯門,最細單位都要418/428萬,無父幹嘅樓主表示當時真係樓價貴少少都買唔起(得55-60萬左右,預只買得起400萬內/或400萬嘅樓)。當時心中後悔上年尾無買上面提過既新盤。

隔了幾日有經紀問樓主有無興趣睇新盤,樓主比起18年11月儲多咗幾萬,覺得資金充裕咗,就去睇下。最後買入高層一房單位,255尺400萬。樓主覺得首期唔多唯有睇餸食飯,反正唔係一世都住個度,價岩,供到,自己衡量過跌極都起碼值300萬,負擔到就買,「正所謂,等都有風險,跌就最多20-30%,升呢?」

樓主又奉勸大家,雖然依家樓價高,但唔代表買唔起,真係有自住需要嘅話,可以考慮住遠啲,儲夠錢再搬,等係有風險的。有儲蓄計劃,有埋另一半一齊儲更易買到。

樓主儲蓄計劃 :我每個月都會記數,紀錄每類型既消費每月大概幾多。例如我食飯錢每月大概用2500左右,有一個月3000既話我會搵下原因點解洗多左,如何避免再洗多。

 

 

唔少網民都大讚樓主好叻仔同踏實,欣賞佢靠自己計掂數就買,唔會好高騖遠。

亦都有人將重點放喺樓主人工一年升一萬。樓主有解釋自己現時做嗰行嘅人工好透明,亦都因為有年拎咗個牌,所以先升得多,普遍每年升20-30%左右。
樓主自稱以前係做auditor,認為係窮人向上爬嘅機會,唔洗好聰明,只要個人唔蠢,勤力就包餓唔死。有網民問到做auditor 工作壽命係咪唔多長。因為見好多人頂唔住咁多年嘅捱夜,好多做咗幾年或十年就轉其他公司。樓主則表示做auditor做3年拎咗個牌,出路就多好多,唔洗話要一世都做auditor。3年出番黎人工都有3萬中,勉強算不錯。

提到食飯食多咗五百都要諗同自責,有人覺得樓主就算買到樓,人生都唔會好過得去邊。樓主亦有回應只係每人有不同目標同埋興趣。無覺得計住計住好辛苦。「我平時都有足夠嘅娛樂,一年去3次旅行左右,唔會話為咗買樓就乜都唔去,唔消費。
又係個句,計好數就去馬,完成每年儲蓄目標,出花紅嘅錢就拎黎去旅行。」

另外有人問到,點解要用400萬買元朗 255呎 ,  呎價 $15,600 ,而唔買實用啲舊樓 。
樓主回應:「接受唔到樓齡高過35年,同埋想要屋苑。我諗住3年後會換樓,所以買住先。」
網民提問:
1, 首期付了多少
2. 萬一失業 可以頂到多少個月
3. 點解買咁遠? 如果返工方便ok