儲老婆本唔容易 港男6個必學儲錢法

社會熱話

廣告

喺香港做男仔唔容易,唔拍拖又俾人笑毒男、拍拖又要照顧埋女朋友嘅洗費,如果唔係又會俾港女笑庹縮。想儲錢咩?好似難過登天。唔想月月清做「月光族」,跟住以下男性儲錢Tips學吓啦。

撰文: Jackie
圖片: 網上圖片

1. 煮飯仔代替出街食

現在出街食餐飯,去高檔少少嘅餐廳,兩個人食都要最少500蚊。但如果去啲平價餐廳、甚或去「老麥」,又怕女朋友嬲嬲豬,一個月搵一萬幾千元,點頂得順。其實喺屋企玩吓煮飯仔,既溫馨又可以慳返唔少錢,仲可以進修吓廚藝,一舉幾得。

2. 善用員工優惠或網購節日

所謂「識人好過識字」,有時朋友喺唔同公司返工,享有唔同員工優惠,有睇啱嘅可以影低件貨、size等資訊,再請朋友代購。依家網購又經常做優惠,例如「雙11」、「Black Friday」、「Thanksgiving Day」,有心水貨品可以等到待呢啲日子先買,隨時慳返幾百蚊。

3. 信用卡積分換禮品

首先,用信用卡之前,一定要確保自己有還款能力。只要你有自制,用信用卡都未嘗唔係一件好事,因為喺某啲餐廳用特定信用卡可以有額外折扣,仲可以儲積分。儲滿一定積分,可以換禮品或現金券,用嚟買禮物送畀女朋友,氹到佢開心之餘又荷包滿滿。

4. Happy hour飲嘢平一半

兄弟之間,梗需要無女人煩住嘅men talk時間,但食飽飯去飲幾杯,每人都要幾百蚊落樓。下次可以善用Happy hour,好多時都有買二送一、特選啤酒咁,一百幾十蚊就可以放工鬆一鬆,同兄弟吹吓水,又可以錫住個荷包。

5. 轉售名牌

好多男士同女士一樣,都係咁貪靚,靚得嚟要潮,就買落好多名牌衫褲袋。不過,潮流嘅尖端總係不停轉變,要跟上潮流就要買新衫,但買新衫一來貴,二來衣櫃已經無位,咁點算好呢?其實坊間有唔少轉售二手物品嘅平台,例如Carousell,提供平台畀用戶出售各式各樣二手物品,幫你嘅舊愛搵新主人。咁就可以從交易中得到嘅錢,補貼新買的衣物。

6. 事先張揚儲錢計劃#

如果當你的伴侶知道你有儲錢嘅計劃,唔只全力支持,餐餐食麥當勞都無問題,仲同你一齊制訂長遠嘅儲蓄目標,咁就真係可以疊埋心水,娶佢做老婆啦。

伸延閱讀:
【銀行鬼鼠收費 唔理戶口隨時陰乾】
http://www.edigest.hk/Vip/detail?id=6941
【信用卡Min Pay陷阱 借4萬變還15萬】
http://www.edigest.hk/Vip/detail?id=6512
【加息1厘每月要供多幾多?】
http://www.edigest.hk/Vip/detail?id=6899