六個裸辭合理化理由

社會熱話

廣告

近年坊間流行裸辭,即是在未搵到下一份工作之前就已經辭職。但原來有好多公司及人事部主管都對裸辭存有意見。

近期網上流傳,有大公司人事部員工透露指,主管請人會篩走有「空窗期」的求職者,主要因為憂慮求職者有機會到任後很快離職或有經常轉工之嫌;又指出主管認為「裸辭的人全部都係屋企拎零用錢嘅廢物」,事件旋即引起網民熱烈討論。

有網友認為主管有上述想法是「神邏輯」,認為咁樣對待求職者極之不合理及存在極大偏見。

其實「裸辭」要承擔好多風險,冇左份工,要憂慮生活問題,無論係經濟定係心理上都存在壓力,所以當打工仔真係有裸辭決定,確實要鼓起無比的勇氣。

不過,要人做到裸辭的地步,總有非走不可的合理原因!小編觀察到幾個網絡論壇及Bloggers,綜合了網友提出裸辭最合理的六大原因。如果有以下的解釋,就唔驚被HR問到口啞啞。

第一:真係冇得射波去見工

有網友分享,礙於公司請假制度,自己根本無辦法擠出時間去見工,要拎病假一定要搵網絡旗下的醫生,更要有發燒的徵狀先可以拎到醫生紙請假;如果要拎年假都要一個月前通知。

老實講,機會嘅野話黎就黎,咁唔彈性的請假制度,真係令員工冇預備見工的空間,裸辭係唯一另覓出路的辦法。

第二:全職進修

活到老學到老,如果想繼續全職進修,讀返書自我增值都無可厚非。始終自己拎多張沙紙,多把刀,競爭力都大啲。網友普遍都會揀進修英文或外語,亦有唔少人會揀專業證書課程,學多樣技能旁身。

用這個理由,見你的公司或人事部會覺得你上進,但要謹記要讀返啲相關的課程,如果冇證明,會被公司覺得你吹水。所讀的課程亦十分緊要,如果你走去報啲興趣班,同你見的工作完全無關,咁就唔提好過提。

第三:健康響警號/患上絕症

如果發現身體有毛病需要求醫或者長期休養,都冇得你唔辭職喇!有可能係原本份工作太辛苦,捱懷身子。除此之外,如果心理出現毛病都不宜長期處於疲勞狀態,要身心需要足夠休息,嚴重的話更要及早求醫。

利用這個原因有點冒險,因為會被公司認為你健康有問題。所以一定要向人事部證明你已見痊癒,唔會影響工作表現,先可以採用呢個理由。

第四:家庭發生突變

這類可以算係私人理由,最合理的理由就是有家人患病,或者有小朋友,要你長期在屋企照顧。也可以是家人過身,自己需要辭職先有時間及空間沉澱情緒,休息是為了走更遠的路嘛。

這個私人理由亦十分合情合理,但同第二個理由一樣,一定要向公司證明現在屋企情況已經妥善處理,唔會影響工作表現。

第五:世界那麼大,我想去看看

「豁出去漫遊」好可能只係後生一輩覺得好合理要裸辭的原因。「人生有幾多個十年」,當然趁後生,仲有青春的本錢就出去望多啲個世界,例如去工作假期、打工換宿等。

雖然一定有「腦細」覺得咁樣似係去玩,但只要你真係從中領悟到不少人生經驗,而依啲經驗係同你將來職場有關,你絕對可以係面試時直接分享。如果腦細buy,都好大機會加你分印象分!

第六:長期對公司憤怒、失望

有打工仔表示,有時做到OT都搏命地做,對公司非常忠心,但卻得唔到公司的體諒,當員工係機械人,長期被chur爆;遇到仲會郁啲就發脾氣的老闆都係好悲哀,自己日日受氣。

更慘係薪酬長期唔加、員工福利冇改善;而辦公室裏亦出現不公平待遇,最常見就係明明自己勤力過人,又做得野,老闆反而升左啲冗員,委屈到咁,真係唔走唔得……

不過,出動呢個理由十分危險,因為好多人公司都唔鍾意求職者數臭前公司,有機會扣印象分,所以未到最後,都唔好用呢個理由。

撰文:CM LO