區議會嘥錢項目

社會熱話

廣告

區議會選舉剛剛閉幕,大家有冇去投票呀?你的一票真係好緊要,因為區議會同民生好大關係,佢地洗的一分一毫又係納稅人的血汗錢。

由2013年起,特首梁振英在施政報告提出,區議會每區會預留1億元用來發展社區重點項目。大拿拿1億元點用好?如果你睇左以下區議會歷年的「建設」,你應該預測到呢1億元將會有咩下場。希望你睇睇下,唔會覺得投錯票……

東區:逾21萬元的不能避雨亭

呢個設計真係唔簡單,就好似一把穿窿遮,原來估價高達33萬元,最後撥款逾21萬元興建。本來計劃興建的是插入地底「有柱基腳式」,但因為相關路段地底有電線和暗渠,而改成「巨型石墩式」。

呢個設計受到唔少人批評,因為石墩形佔去不少空間,根本不能避雨,其後又因為避雨亭位置設在英皇道新威園對開的巴士站外,被投訴太阻街,結果起左兩個月又要晒錢拆,而家搬左去人流冇乜的海堤街,根本冇乜人用,仲有網民嘲笑呢個避雨亭為「廢墩」。呢21萬元就真係好似倒入鹹水海咁。

荃灣區:逾70萬元四不像燒鵝

呢隻巨鴨(區議會話係鵝,小編唔識睇)用意係突顯「深井燒鵝」特色,嗯,呢隻活生生既,睇到都唔忍心食。呢70萬元可以買到千幾隻燒鵝派街坊。荃灣區既居民,真係辛苦你地啦……

灣仔區:約300萬元蟠龍匯瑞

呢座高12呎,以仿金銅製成的金龍雕塑,耗資約300萬元。金龍同灣仔有咩關係,小編就睇唔透啦,不過區議會仲成立「蟠龍匯瑞基金」,再用多25萬元重鋪金箔。嗯,呢條應該叫「cap水金龍」。

荃灣區:逾20萬元荃灣珠寶金飾坊

又嚟到荃灣區。呢個金元寶地標,造價逾20萬元,話要吸引自由行旅客幫襯該區金舖。吸唔吸引到旅客就唔知啦,不過一定吸引唔到小編。荃灣區既居民,想唔想搬走?

中西區:逾15萬元上蓋連坐椅

呢個被喻為「不能避雨亭」既孖生兄弟「上蓋連坐椅」都好厲害。本來係巴士站興建上蓋,但由於「又」受到限制,現址設係般咸道被斬既老樹旁邊。大家可以去曬太陽、吸廢氣啦!

除左以上「建設」,嚟緊觀塘決定以5,000萬興建「世界級」音樂噴泉,到時真係拭目以待!