咪做傻瓜同人搶 2個方法執筍盤
筆者： 「聽都聽到悶啦。」
朋友： 「早幾個星期回一回氣，以為會轉勢添。」
筆者： 「邊有咁快？講過好多次暑假係傳統旺季。」
朋友： 「代理話唔好發夢，樓市唔會爆破！」
筆者： 「冇話會爆破喎，只係升過籠要調整吓啫。」
朋友： 「佢仲話宜家係業主市，唔貴唔賣架！」
筆者： 「咁咪唔好賣囉，呢個係人哋自由。」
朋友： 「咁我應該點？」
筆者： 「業主唔貴唔賣，你唔可以唔減價唔買架咩？」
朋友： 「但係樓價指數又衝番上嚟…」
筆者： 「都話暑假係傳統旺季嘛，做乜係要暑假同人爭？」
朋友： 「但係代理話唔買遲啲肯定仲貴喎。」
筆者： 「咁佢自己有冇買丫。」
朋友： 「咁又冇喎。」
筆者： 「咁咪係囉！」
樓價指數，嚴重扭曲，創新高又代表甚麼！
政府不停加辣，令二手市場的放盤急速下跌，成交嚴重萎縮，在這個被扭曲的市場，樓價指數的參考價值其實不高！事實上，雖然樓價指數不斷創新高，但其實二手市場成交非常淡靜，很多時候都聽見一些知名的大型屋苑，竟然整個星期零成交！樓價指數是一個平均數，一、兩單成交，就會拉高成交價，有何意義？
堅持高價…放售個多月無人問津
今年有不少朋友趁高位放盤，其中有位朋友看見自己的屋苑，最近成交創了新高，例如賣了$450萬，於是就堅持要$460萬才賣。然而筆者看過屋苑的成交，其實$450萬左右的成交就只有一個，其餘都是$400萬至$420萬之間，而且成交非常疏落，每星期只有一單半單。這代表了甚麼？唔洗審，如果以這個屋苑計，這個星期肯定又創新高，這就代表市價是$450萬嗎？只是代表有一個傻瓜，此時此刻願意用$450萬來幫你接貨而已！朋友堅持要賣$460萬，放售超過一個月都冇回音，莫講話賣唔出，連睇樓客都少，最後還是投降。
唔貴唔賣…代價不小！
最後朋友的單位以$428萬沽出，其實價錢已經不錯。
如果繼續等落去，都唔知要等幾耐！如果市況真的調整，則要等市場氣氛慢慢回暖之後再出售，可能要多花兩、三年。損失了兩、三年時間，其實只是多賣5%左右，但如果你善用這筆資金，選擇其他更適合的投資，又何止賺番5%？
不要在暑假搶，堅持唔減價唔買！
如果你都想買到筍盤，請控制一下自己的情緒！
首先，筆者已講過無數次，暑假是傳統旺季，而家盲中中週圍衝，很難會買到平嘢，何不等暑假過後，氣氛轉靜的時候才考慮呢？
其次，既然業主可以堅持唔貴唔賣，為甚麼你不能堅持唔減價唔買呢？事實上很多地區放盤量正在增加，新盤又會一浪接一浪，議價空間會逐步增加，忍耐一吓吧！即使價錢沒有很大上落，單就暑假過後氣氛轉靜、有價講，都已經慳到幾十萬了。
作者為1%投資培訓中心課程總監，教授物業投資、上車及裝修等課程。暢銷書《上車又住又賺》及《樓轉命運》作者，網誌《第一桶金》總瀏覽逾300萬人次，並曾擔任TVB《有樓萬事足》顧問。
Fan Page《第一桶金》： www.facebook.com/anthony.wealth
