米線

寡佬有一種簡單叫食米線

社會熱話

廣告

撰文: 有腳嘅雀仔

正所謂「鹹魚白菜,各有所愛」,米線就係我所愛。

由細到大我都唔鍾意食飯,人大咗有得揀都唔揀食飯,只會揀食米線。

琴晚「一支公」收咗工唔知食乜好,又走咗去食碗米線先返歸。

米線舖喺香港開到成行成市,總有一間喺咗近,而家落街就有一間,就連返工附近都一定會有米線揀。

有時屋企無飯開,放咗工就要煩食乜。老麥唔飽肚、茶記夜晚又貴食,想「平靚正」都係得米線揀。話說我屋企附近有間食粉麵嘅舖頭,我次次去親都會叫牛雜米線,廿九蚊就有交易。

間舖有大排檔傳統嘅摺枱同摺凳,相比以前最唔同應該係佢有冷氣唔會熱。一坐低夥記就會好爽手擺低杯水同問你食乜,兩分鐘內一定食得!

我對呢間鋪情有獨鍾,可能貪佢有以前大排檔嘅味道啩,寡佬有時都多情,鍾意緬懷一下過去。

我媽子有時會特登撇低我,同我老豆出街撐枱腳,好瀟灑咁留張字條叫我自己煮米線食,對我好到呢…

知我者莫若我媽子! 佢知一碗米線就可以搞掂我呢個寡佬!

寡佬生活就係可以咁簡單,講完。